男友出軌，我決定送26頂綠帽比佢: D : 廁所裡的風花雪月（4）

成條鐵通扑落黎。

D先生用手踭擋住鐵通，一記上勾拳打過去，正中鐵通仔既下巴。

「仆你個臭街！等我...」

D先生懶得同佢廢話，一腳踢過去，踢到佢企唔穩，失去重心，向後撻咗落地。

「黎呀，我最中意一個打幾個。」D先生對佢地舉起兩隻中指。





根據過往經驗，呢啲大型打鬥場面，戰鬥力為零既我，次次都俾人捉。

所以我好醒目咁閃咗人，匿埋係一棵樹後面。

我係空氣，我係空氣，佢地睇我唔到，佢地見我唔到。

我見到好多拳頭同飛腳，交錯得亂七八糟，都唔知邊個打邊個，睇到我一舊云。

就係我用手揞住塊面，不時係手指隙之間偷望，好似睇緊恐怖片既時候，有陰影籠罩係我頭上。





D先生好似麻鷹捉雞仔咁，箝咗我出黎。

「你跑得快唔快？」

「唔快。」我搖搖頭，心都就黎跳出黎。

「咁你要跑快啲啦，成村人追殺緊我地。」佢拖住我隻手，然後一路跑跑跑跑跑。

昏黃既街燈，狹小既後巷，身後係雜亂既腳步聲，耳邊係我地急促既呼吸聲。





遠處有燈火。

我地兩枝箭咁沖過去，D先生一腳踢開「小心地滑」塊黃色警告牌，砰一聲閂埋門，反鎖埋。

「安全啦！」

我地挨係門上，拉低口罩，索哂氣。

我望一望D先生，佢掛哂彩咁既款，成隻眼俾人打腫咗，臉上既傷口仲流緊血。

佢扭開水龍頭，用個塞堵住排水口，放滿一盤水後，成個頭浸落去。

我隨手扯咗啲廁紙俾佢。

「唔使。」佢擺擺手，望住我：「連累咗你，唔好意思。」





「你做咩惹埋啲咁既人？」

「有個靚妹，仲細個你，飲醉酒，差啲俾佢地帶咗去酒店。」

「係你朋友定親戚呀？」

「以前住我樓下，睇住佢大。」

「咁佢宜家點？」

「唔知呀，成家人搬走咗啦。」

「呢啲人渣敗類，細路女都搞，我見一次打一次。」D先生拎走個塞，望住啲水流轉呀轉，佢伸隻手指落去，想逆轉水流既方向。不過好快，水流又變番原本既方向。





「佢地係咪匿埋係入面？」

「仆街，夠僵同我死出黎！」

出面喊打喊殺，粗口滿天飛，好似愈嘈愈勁，係咁踢門拍門唔肯走。

「佢地係出面呀！」你問我驚唔驚？話唔驚係假既。

「唔駛理佢地，橫掂佢地入唔到黎。」D先生當佢地冇到，拉底廁板，坐咗上去。

「但係我想番屋企呀。」

「佢地一時三刻都唔會走。」D先生望一望架鐘。

「咁點算呀？」我唔要係度過夜呀。





「諗下點打發時間仲好過啦。」

我望住一格格粉紅色既瓷磚。

「但係...呢度殘廁黎架喎。」

D先生拎出打火機，點著枝煙，吞雲吐霧：「係呀。咁我考下你，係殘廁入面有咩可以做？」

殘廁就好似7-eleven，24小時營業，梗有一間係你附近，無須預約，無須計鐘數。雖然隔音就差咗啲，但勝在空間寬大，可以搞大動作，最緊要係完全免費。

俗語有云：分手總要在雨天，激情總要在殘廁。所以，孤男寡女係殘廁入面，你話有咩可以做呢？