男友出軌，我決定送26頂綠帽比佢: D : 廁所裡的風花雪月（3）

「你咁瘦，要食多啲野呀。」細嫲拎住一大兜蕃薯糖水，慢吞吞咁行出黎。

D先生企起身：「你坐低啦，等我黎。」

佢係櫃度拎出三隻細碗，用紙巾抹咗一抹，再逐碗逐碗分俾我地。

「呢碗細嫲既，呢碗我既，呢碗妹丁既。」

又叫我妹丁。哼！





「Cheers! 」細嫲好興奮咁同我地碰碗。

我飲咗幾淡，全身頓時充滿暖意，甜到入心：「唔，好好味呀。」

「咁我日日都煲，你要乖乖地過黎飲啊。」細嫲拍拍我個頭。

睇黎唔理十八歲定八十歲，女人都係咁中意俾人讚。

「咦，婆婆，你上電視啦！」某電視台重播緊十年前既電視劇。





「係呀，執紙皮執到全香港都識得我，係咪好威威呢！」

「點解你想做演員既？」聽人地講，做臨記淨係得最低工資，飲個下午茶都唔夠，有時仲要受盡風吹雨打，連踩十二個鐘。咁做，唔係攞苦黎辛咩？

「因為可以見到大明星，好好玩架，佢地都好錫我！」

「咁係因為細嫲你夠可愛，咪人見人愛咯。」我又賣口乖。

細嫲笑到卡卡聲，見牙唔見眼。





我同細嫲有傾有笑，D先生埋頭食糖水，但我知佢聽緊。

唔知點解，見到佢趾高氣揚，我想兜巴星過去，叫佢收聲。反而佢粒聲唔出，我又忍唔住撩佢講野。

「你無同我講過，你屋企有個大明星喎。」君子報仇，十年未晚，我係枱底踢咗D先生一腳。

D先生用另一隻腳踩住我，輕描淡寫咁話：「你宜家咪知道咯。」

我受制於佢，彈動不得。

「我地屋企唔止有明星，仲有個英雄添呀。」細嫲指一指D先生：「佢細細個就話要做警察，要除暴安良，為民請命呀。」

有牌爛仔。我對住D先生做口型。

「你地係度眉來眼去呀？有意思咪講出黎囉，等人地考慮下你。」





老一輩既人就係咁，行埋一齊就覺得襯，阿貓阿狗都可以扯到紅線。

D先生冇佢咁好氣，亦懶得澄清：「你快啲睇下，字幕上面有你個名呀！」

「係喎係喎。」細嫲眼定定咁望住屏幕。

......

「我走先啦！多謝你碗糖水。」我攬一攬細嫲。

「好啦，我唔做電燈膽啦！你地去玩下，唔好咁快番黎呀！」細嫲目送我地去搭lift，仲同我地揮揮手。

「你阿嫲好趣緻呀。」係lift入面，我望住倒數緊既紅色數字，打破冷場。





貿貿然跟個三唔識七既人走，仲要上埋佢屋企食糖水，諗番起都覺得自己大膽。

「佢中意熱鬧嘛。唔係整呢樣，就係搞果樣，都無時停既！」

「好過係屋企無聊無野做，望住架鐘過日神呀。」

「到啦。」D先生禁住個開門制。

我以為佢送到呢度：「我會掛住你...」

話都未講完，一擰轉頭，我個胸就同佢既心口撞到正一正：「阿嫲既糖水。」

「幾步姐，唔爭在送埋你返樓下。」D先生徑直走係我前面。

我地穿過公園。





兩個陌生人唔講野，理應唔會覺得尷尬，但係一旦開咗個頭，再閂番埋個話匣子，就會有啲怪怪地。

佢應該都係咁覺得。

「多謝你頭先無篤爆我。」

「費事俾你阿嫲知道你既真面目啦。」

「細嫲靠執紙皮，一手湊大我既。可以話無佢，就冇今日既我。」

「唔怪之得你咁錫佢啦。」

你阿爸阿媽呢？我好想問，但係又知唔應該問，畢竟同佢未有咁熟。





「老豆老母係我四歲果陣，車禍走咗lu。」D先生自己講出黎。

呢啲野真係唔知好過知。

「Sorry呀，勾起咗你既傷心事。」我拍一拍佢肩膀。你話我眼淺又好，感情泛濫又好，但係我聽到呢啲事，真係好想喊。

「咪傻啦，咁多年已經慣啦，慣咗就冇咩野。」佢反而比我仲豁然。

「其實我阿爸都走咗。」

D先生望咗我一眼：「都係意外？」

佢誤會咗我既意思：「唔係死咗，搬咗出去姐，無一齊住。」

「咁你仲有冇同佢見面？」

「冇啦，見黎都無意思。」其實我阿爸阿媽無離婚，我亦都有阿爸既電話，想搵隨時搵到。不過咁多年黎，除咗定時俾家用，佢都無咩點理過我地。

既然有各自既生活，咪各自安好算咯。

「我地都算淪落人。」佢話。

係香港地呢個地方，幸福既家庭買少見少，不幸既家庭就各有各不幸，一係就個老豆著咗草人間蒸發，一係就個老母生完唔養，總之完整既家庭無幾個。

「仲要不打不相識。」我笑住咁話。

「點呀，係唔係要打番場？」

「打咪打，怕你啊。」我拉高衫袖，一個拳頭揮埋去。

「死妹丁，同你熟啲就郁手郁腳。」佢側身擋開咗。

「你勒索我喎，點計先？」我叉住條腰質問佢。

「鬼叫你咁串串貢吖，幫你執野，仲要俾你鬧，我條氣唔順。不過你好彩，我唔打女仔 ，唔係實打到你變豬頭。」

「咪行住。」幾個著黑色衫既飛仔，唔知係邊度彈出黎，擋住我地既去路。

其中一個拎住條鐵通，係地下拖行，發出難聽而刺耳既聲音：「就係呢條友多管閒事啦，郁佢！」

「我淨係會打人渣。」D先生定定望住佢地，一手將我推開。