男友出軌，我決定送26頂綠帽比佢: 學生會競選（下）

「1號候選內閣焰王，556票；2號候選內閣雲霄，537票。無效選票，13票。

宜家正式宣佈，焰王為下屆當選內閣。」

廣播一響起，走廊爆出歡呼聲。

「贏咗啦！贏咗啦！」

我正想行出去，咁啱陳子俊被人七手八腳抬起黎，好似皇帝出巡，經過我地班房：「焰王一出，誰與爭鋒！」





我同佢既視線短暫撞上。

佢冇將段片擺上Secret，我亦無將件事既真相話俾丁家岐知。

要唔要同佢講聲恭喜，或者多謝？

未黎得切比任何反應，佢就已經俾人抬走，一陣風咁沖咗落樓。

所以都係算啦。





我行出走廊，望落去。新翼一樓果間細房，係雲霄既基地。勝王敗寇，果層一個人影都冇，死寂一片。

唔知丁家岐宜家點呢？

彷彿係心靈相通，有人推開門，走出黎既，正正係丁家岐。

佢好似係度搵緊人。搵咗一圈，最後目光停留係我身上。

丁家岐對我揮揮手，指一指學校門口。





佢需要我。我點點頭，以九秒九既速度跑落樓梯。

都唔知自己急咩，又無人催我，又唔係趕時間。

跑到一半，先諗起冇拎書包。

又折返課室。

所謂來回地獄又折返人間，就係明明上一秒仲係好憎一個人，恨不得將佢碎屍萬段；下一秒又好想快啲見到佢，個心砰砰咁跳，跳得好誇張。

我準備咗一肚子說話，想要安慰丁家岐。

唔緊要啦，差個廿票，係佢地好彩姐。

你已經盡哂力，如果冇咗你，雲霄根本唔會走到今日。





頭先你講野真係好有型，全場最佳非你莫屬......

不過佢好似冇咩事，無唔開心無好失望。

「忙咗咁耐，終於有時間陪你！」丁家岐見到我，眼角帶有笑意。佢拖實我只手，好似驚我走失。「想去邊呀？」

呢排奔波勞碌，佢都捱到好殘。

我望住佢瘦削既臉頰，兩個大大既黑眼圈，真係睇到有啲心痛。

「無咩邊度想去啊，不如搵個地方坐低傾偈？」我話。唔想佢太辛苦，想佢歇下。

「都好。」





我地經過一個遊樂場。

「呢個時候，居然一個人都無。」丁家岐嘖嘖稱奇。

「可能依家既細路都匿哂係屋企打機掛。」

「係咪想去盪鞦韆？」見我望住，丁家岐輕輕掐一掐我隻手。

我點點頭。

「大唔透既傻妹。」丁家岐拍一拍我個頭，寵溺咁笑一笑：「你放心，有我陪你。」

真係好耐冇盪過鞦韆。

次次去親，班細路都會眼巴巴望住我，好似問緊：姐姐你咁大個人，做咩要同我爭。詩韻佢地就更加唔使講，會直接笑鳩我：好幼稚呀你。





難得丁家岐又肯陪我幼稚。

丁家岐放低書包，等我坐上鞦韆後，企係我後面，輕輕力推我。

「你唔盪呀？」我問。

「我想推你。 」丁家岐回答。

鞦韆越盪越高，我合埋眼，風係耳邊刮過，一起一落，有種飄飄然既快感。

「係喎，點解你咁快走得？」我問。

「都輸咗啦，留係度都無意思。」丁家岐理所當然咁話。





係我印象中，丁家岐要既都可以得到，好似從來都唔會輸。

「有冇唔開心先？」我試探。

「勝敗乃兵家常事。」佢好灑脫咁話。

點會無啊？係唔係男仔都中意扮堅強，有事都話無事，唔可以喊要隱藏情緒？

「係我面前，唔可以講大話。」我隻腳掂地，擰轉頭，望住佢對眼，唔放過一絲講大話既破綻。

「係有少少啦，」佢敗落黎，終於肯承認。

佢摸一摸我既頭髮：「不過，有你做我既安慰獎。」

我一直覺得，摸頭髮呢個動作，比起接吻擁抱拖手，黎得更親暱。

唔知係咪盪鞦韆盪到腎上腺上升，我反握佢隻手，企咗起身，一野將佢禁落鞦韆坐低：「咁我要好好安慰你。」

「凱婷？」丁家岐極其疑惑，睁大眼睛，瞳孔放大。

我塢低身，毫不猶豫，係佢唇上輕輕一啄。

不過呢個吻乾乾的，好似無咩感覺。

平時都係我欲拒還迎，第一次見我咁主動，丁家峻驚訝到講不出半句話。

「你仲未除口罩......」

「......」

唔理啦唔理啦，一係唔主動，一係就主動到底，邊有人臨陣退縮架。

我坐落佢大脾上，貼近佢，不停扭動身軀。

「你......」

呢個時候，佢唔係應該錫落我條頸，雙手係我身上亂摸一通，然後伸隻手入我件衫，大大力揸我既胸咩？

點解佢眼神裡面毫無慾望？

我默默咁注視佢，伸出手，解開校裙上既第一粒鈕扣。

露出鎖骨。

跟住到第二粒鈕扣。

露出白色既胸圍，上面有個小蝴蝶結。

我仲想解落去，丁家岐即刻推開我，喝止我：「夠啦！」

我惶惑不安，唔知自己犯咗咩錯，惹到佢生氣。

有個問題盤旋係心頭，我唔敢問出口：你唔係想要呢啲咩？

你對其他人又得，對我就唔得？係咪因為我無果種性吸引力？

佢都覺自己語氣重咗，即刻同我say sorry：「我今日有啲攰，不如我送你番屋企？」

強烈既恥辱感突然捲席全身。

我頭先到底做咗啲咩？

寬衣解帶送上門，但佢唔受。我覺得自己好cheap。

「唔使啦，我自己識返。」

我咬緊嘴唇，忍住眼淚，要保留最後一絲既尊嚴。