男友出軌，我決定送26頂綠帽比佢: Secret風波 （下）

丁家岐帶住一臉疲憊同憐憫，我掛住一臉淚水同鼻涕，係熙來攘往既街道上，毫無頭緒咁你眼望我眼，好似兩尊擋路既石像，完全唔知想點。

過咗一陣，我地既聲音同時響起。

「你做咩坐咗係度？」

「你做咩唔開電話？」

「我打機打到手機無電。」





「我行街行到攰咪坐低。」

其實我想問既，係你做咩一見到我就走，做咩走咗又翻轉頭。我好肯定佢想問既，係你點解要搵我，點解我匿埋你都唔肯走。

扮傻詐懵裝無知，睇黎我地都係高手。

「呢度咁凍，不如去甜品店坐下？」見越來越多人望住我地，丁家岐提議。

我頓咗一頓，之前只係一心想搵到佢，無諗過搵到佢之後，我地之間既死局，應該點樣破。





「好。」我都唔想聽日打開報紙，就見到自己張相係上面，標題寫住「情侶街頭鬧交 港女賴死唔肯起身」。

丁家岐伸出黎既手，從來都無收埋，不過我選擇視而不見。

我企起身，每行一步都好似比針拮，行咗唔夠三步就停低。

「等一陣先，」我叫停佢：「我腳痺。」

「......」





應該係維持同一個姿勢太耐，坐到麻咗冇哂知覺，隻腳都唔屬於自己。

丁家岐塢低身，輕柔咁幫我按摩小腿側邊。

我慢慢感覺到佢既撫摸，佢玩開結他，又打籃球，指頭結繭，掌心粗糙而帶點溫熱，我扶住佢膊頭，舒服到不自覺呻吟咗一聲。

丁家岐下意識望咗我一眼，咁岩我既視線又落係佢身上。

我覺得佢離我好近，一齊咗四年，我地理應係最親密既人；但係我又覺得佢離我好遠，好似有個同佢一模一樣樣既人企係我面前，但唔係我過去所認識既丁家岐。

畢竟，佢應承過我，以後唔會整喊我，令我傷心難過。

我又忍唔住諗，佢既手勢咁純熟，唔知係咪幫過好多個女仔按摩呢？

一諗起佢隻手掂過其他女仔既身體，沾染過佢地既香水，摸過佢地既臉頰，我就覺得好抗拒，唔係好想佢掂我。





丁家岐應該feel到我唔係太自在，好快鬆開咗手：「有無感覺好啲？」

「嗯。」我下意識避開佢既視線。

「咁行啦。」

佢行係我面前，無拖住我隻手，我暗暗鬆咗一口氣，因為我唔多識拒絕人。

「你想食咩呀？」

「無所謂。」再甜既甜品，都填唔滿我心中既苦澀。

佢隨意揭咗餐牌兩下，自作主張幫我叫埋：「我想要一個芒果拿破崙，一個北極熊豆腐櫻花冰，唔該。」





「有啲野我想講清楚。我唔想我地之間......」丁家岐欲言又止，佢面露苦楚，係犯咗錯悔不當初果種痛苦。

望住佢懊悔個樣，因為自己既行為而付出代價，我覺得......

好痛快。

「你直接講啦，唔好長篇大論，亦唔好兜圈。」我直視佢，第一次講野咁有底氣。

我已經做好最壞既心理準備，就算佢同我講，我地之間唔止有小三，仲有小四、小五、小六......甚至多到可以湊成一枱打麻將，我諗我都接受得到。

丁家岐應該未見過我咁有氣勢，所以當堂窒一窒，過咗三秒，先繼續講：「有人造我，千字文係假既，我亦都無同人瞓過。」

哦。

無做過，唔會有證據。口講無憑，我只可以選擇信，或者唔信。





「你要信我。」

今次有相有片為證，仲要俾我親眼見到，佢先無得否認。咁其他果幾次呢？有邊個偷食完，會承認自己偷食架？

既然佢已經講過一次大話，就唔爭在講埋第二次第三次。啲人唔係成日話，一次不忠，百次不用咩？

我望住碗櫻花冰，好似同隻冰極熊前世有仇，用匙羹狠狠咁一插到底。

北極熊個頭裂開咗，表情無辜咁望住我。

丁家岐既面上閃過一絲驚恐，可能驚下一個輪到佢掛。望住佢既表情，我又感覺到一絲報仇既快感。

好啦發洩完，我笑嘻嘻咁推咗佢一下：「同你講玩笑咋。如果唔信你，我點會翻轉成個九龍灣都要搵到你？」





我拎出手機既cap圖同佢分析。

「造得你既話，佢既目的就係想破壞你既形象，要你眾叛親離俾人杯。

呢個人一係同你有深仇大恨，例如你殺咗佢老母，或者搶咗佢條女；一係同你有利益沖突，只要堆冧你，佢就可以上位。

既然你話冇做過，話同你落club上床果位，我覺得純屬抽水呃like，可以無視。

至於千字文果個女仔，好有機會同爆料者係同一個人，兩個post都係佢自導自演。

而呢個蘭桂坊女仔，同爆料者應該係朋友，或者係俾錢請翻黎接近你，所以先會事先知道你既行蹤，根本成件事都係圈套。」

丁家岐消化緊我既說話。

接下黎我要問既問題，真係唔係呷醋，而係為咗搵蛛絲馬跡。

「你同蘭桂芳果個女仔，點樣識架？自己諗下啦。」唔駛答我架，我都唔係好有興趣想知道。

嗱，我分析得頭頭是道，足以證明我既歷史唔係白讀架。

歷史教導我地，人既劣根性永遠都存在，所以權鬥同陰謀都係會一而再再而三咁出現。

歷史亦教導我地，成大事要沉得住氣，永遠唔好俾人知道自己既真正意圖。

今鋪唔會係丁家岐既死期。

就算佢要死，都應該由我給出致命一擊。

呢個遊戲太有意思，我要繼續玩埋落去。