男友出軌，我決定送26頂綠帽比佢: Secret風波（中）
你有無試過因為一個人，而愛上一個地方？
九龍灣呢個地方，就好似一個轉唔停既走馬燈，每行一步，都會自動播放我同丁家岐一齊既畫面。
德福廣場。
行咗十幾廿萬次，唔知點解，都仲係傻傻分不清一二三期。
要係咁大個商場搵一個人，聽落似天方夜譚。但係我相信，情侶之間存在心靈感應，只要丁家岐係附近，我就一定可以感知到佢既存在。
就好似每一次我覺得丁家岐會Wahtsapp我，下一秒，佢個名就會係我手機彈出來。
不知不覺間，我經過我地第一次約會既地方——二期對出既戲院。
記得果日，我本來就遲咗出門，再加上又唔識路，所以電影開始咗三十分鐘，我先腳步匆匆咁出現。
丁家岐反而一啲都唔急，一路玩手機，一路隨手將爆谷塞落口。
「你黎啦？」佢拎出一粒爆谷，遞到我嘴邊，我好順口咁接過。
「咁我地入去啦！」佢舉起兩張戲飛。
「唔好意思呀，遲咗咁多。」
「傻啦，幾耐我都等你。」
佢突然又講玩笑咁補多一句：「不過下一次我地都系係地鐵站等啦。」
我地小心翼翼係黑暗中穿行。
突然腳下一絆，就係我跌落地之前，佢好似拎籃球咁拎起我隻手。
「無事嗎？」
「我無事。」我搖搖頭。
坐低之後，我個心跳得好快，塊臉有啲熱，一股電流竄遍全身，手腳都軟埋，好似岩岩坐完過山車。
我分唔清係因為受到刺激，定係呢啲就叫心動既感覺。
我唔敢亂郁，我驚我一郁，佢就會鬆手。佢隻手好大，我隻手好小，如果可以一直咁樣拖落去，感覺都唔錯。
我既嘴角不自覺咁翹起。
偷偷望咗丁家岐一眼，佢好專心咁睇緊電影，應該無發現我既小心思。
我地睇既電影，係日本版既《那些年，我們一起追的女孩》。張票我到宜家都仲keep係銀包，有記念價值吖嘛，雖然上面啲字都甩哂色。
之前睇過台灣版，有柯震東同埋陳妍希。日本呢套係翻拍，劇情無變過，連對白都一模一樣。基本上角色講任何一句對白，我都可以接得上下一句對白。
不過無論睇幾多次，都係會被浪漫既情節感動得一塌糊塗。
「你相信平行世界嗎？」
「嗯？」
「除了這個世界，還有另一個一模一樣的世界。也許在那個平行時空裡，我們是在一起的。」“柯景騰”抬起頭，眼神深遠。
「真羨慕他們啊。」“沈佳宜”亦都望住同一個夜空下既同一輪明月。
那些年錯過的大雨，那些年錯過的愛情。
最後“沈佳宜”著住婚紗，但新郎唔係“柯景騰”，我喊到收唔到聲。兩個人明明相愛，點解到最後唔可以係埋一齊？如果會分開，係唔係姐係證明唔夠中意？
丁家岐即刻拎紙巾俾我，然後靜靜咁望住我。等我平復情緒後，佢先帶我離開早就四下無人、一片光燦燦既戲院。
「你覺得係咪真係有平行世界？」我仲沉浸係頭先既情節。
「有啊。」
我匿入佢懷裡，佢身上有好聞既柔順劑味道，令我覺得好安心。我好認真咁問：「如果我係平行時空蕩失路，搵極都搵唔到你，咁點算呀？」
丁家岐錫咗我額頭一下，輕描淡寫咁話：「傻妹，咁你咪企係原地，等我黎搵你咯。」
企係原地，等佢黎搵我。
果一刻，我堅信，發生咩事都好，唔駛怕。
因為佢就係我既方向。
「宜家輪到我黎問你一個問題。」丁家岐低頭望住我。
「咩呀？」
「你覺得我定係柯景騰正啲？」
聽到呢個無厘頭既問題，我笑咗出來。
「喂呀，我好正經問緊你架。」佢用力掐一掐我條腰。
「你咯。」
丁家岐好滿意咁點點頭，又再追問：「點解既？」
我知道佢想聽咩，莫非就係想我讚佢咋嘛。
「你靚仔過佢。」
「你又幽默又好玩。」
「你一行黎，氣場無人能及。」
「你認真打籃球既時候好型。」
「因為我中意你。」
......
行咗一大圈，都唔見丁家岐。
無計可施之下，我唯有黎到佢屋企樓下，諗住碰下運氣。
佢住八樓，我數一數樓層。佢個單位無開燈，即係無人係屋企。
頭頂係色彩繽紛既燈飾，商場傳黎充滿節日氣氛既歌曲，幾步之外既馬路上車如流水。
今個聖誕會唔會同丁家岐過，或者應該講，我們地仲會唔會係埋一齊，都係未知之數。
正值戲院散場，一堆人有講有笑咁湧過來。
「仲以為Paloma先係女主角！點知佢只係出場咗一陣！好可惜！」
「係咯，佢索過女主喎。」
「套戲勁長，我全程都係度諗：幾時完呀？好急尿啊。」
「急尿就去廁所啦。」
「個反派係唔係無腦架？就咁放走果兩母女。」
「佢應該暗戀個女主啊。」
我係人群之中逆向而行，被人連撞咗幾下，突然覺得透唔到氣。
丁家岐既背影突然一閃而過。
我奮力撞出人群之外，不管不顧追過去，跑得急，一唔小心就撲咗落地。
眼見佢就要消失，我唔理得咁多，用盡全力大叫：「丁家岐！你同我企係度！」
街上有一半人擰轉頭，眼神錯愣咁望住我。
頂，認錯人，原來唔係佢。
爬起身既時候，先覺得手腕痛，用唔上力。
咁大個女都未試過咁狼狽。我覺得好委屈，坐咗係路邊，眼淚好似唔駛錢咁滴落黎。
唔知喊咗幾耐，一個陰影籠罩著我，對我伸出手。
我望下對波鞋，再望埋佢既主人。
今次真真真真係丁家岐。