【👋🏻🌉】偽外傳：QQ的放蕩文學分析教室（完）☑️☑️☑️: 《再別康橋》二

我：「何以見得呢篇係淫詩嚟呢？」
Q：「唉，你哋男仔就係乜都要咁直接，畫到出腸先得，都無啲想像力嘅。」
我：「都唔係吖，有時落完雨操場有一氹氹嘅積水，之後又出太陽喎，啲女同學著住校裙經過，我哋就可以打斜角好間接咁欣賞到佢哋嘅五光十色。」
Q：「妖，你哋真係無個正常㗎…嗱，咁你不如就試下用呢幕景像嚟寫首淫詩啦。」
我：「吓…背詩已經想死喇喎，重要我作詩添？！」
Q：「咁你當個女仔係我囉，為我作得唔得先。」
我：「妳嘅話，嘻！我返屋企慢慢揭開睇個夠都得啦，使乜喺學校昅得咁辛苦等其他人以為我係迷戀女神嘅變態啫。」
Q：「你…係咪想死呀！」
我：「唔！唔好！痛…痛呀…咪扯！知錯…」
Q：「咁你當係Vienna女神囉，好未？」




我：「嗯…雨後彩虹春光洩，氹前彳亍倩影澀。」
Q：「啱喇，但春光同倩影寫得太出，人哋會睇得出，所以要再修改做其他花鳥風月遮掩一下。」
我：「點解啲文人咁麻Q煩㗎。」
Q：「我問你，文人最多係乜？」
我：「文人最多係…滿肚墨水。」
Q：「錯！係文人多大話呀，文人最鍾意隱惡揚善，避重就輕，文過飾非。」
我：「聞過識飛？我都識！…呀…痛…痛！」
Q：「你試下再亂嚟吖嗱！」
我：「你咁暴力肯定唔係文人嚟。」
Q：「梗係唔係啦，我都唔講大話嘅。」




我：「不如我問下妳條仔妳有無講大話？」
Q：「唔得閒同你癲呀，入返正題！知唔知再別康橋呢四隻字點解？」
我：「康橋咪即係英國劍橋，咁條粉腸返中國咪同條橋講bye bye囉。」
Q：「睇落就係咁，你認為佢係咪掛住條橋？」
我：「點知喎，黃鶴樓同鳳凰臺都有人掛，掛住條橋有乜出奇呢？」
Q：「呢啲叫借景抒情，醉翁之意不在酒，其實徐志摩根本就唔係掛住條橋，而係指桑駡槐，呢條友咁鹹濕又多情，你覺得佢掛住咩？」
我：「女，女，同埋女。」
Q：「所以呢，我哋可以假設康橋根本就唔係劍橋，而係一個女仔名嚟，又或者代表咗一條女。」
我：「一條橋…一條女…一條叫康橋嘅女…喬喬…QQ…嗯…妳繼續啦。」
Q：「另外，橋本身代表咗分隔，同埋達到嘅手段，你知唔知分隔生死嗰條叫乜橋？」




我：「奈河橋。」
Q：「咁分隔牛郎同織女嘅呢？」
我：「鵲橋。」
Q：「即係話，佢別咗條橋，就無方法得到個女仔，要同康喬妹妹講再見，而且標題叫做再別康橋，即係話唔係第一次別，可能已經別咗好多次。」
我：「咁康喬即係邊個女仔？」
Q：「即係咁，徐志摩同林徽音係喺英國識嘅，有可能係佢啦，又或者佢收埋咗另一個世人唔識嘅女仔都唔出奇，呢個唔係重點。」
我：「咁又係，佢咁鹹濕，是但有靚女就上㗎啦，但講到嚟呢度佢都係同個女仔講bye bye啫，唔見得呢首詩有幾淫喎。」