《時。噬》: 恆叔 II

「嘩，搞乜你又返嚟啊？！你嘔清未架？今日啲清潔工好忙，我已經要親自做埋！再嘔我反面架！就算我哋咁好傾都係咁話！」恆叔把我從沉思中拉回來。

「啱喇，你繼續睇實佢，晨曦直接命令落嚟，要佢喺到好好休息。暫時唔可以返平民區住。」除了恆叔外，其他守衛都是冰冷無情。

恆叔一聽到晨曦兩字態度馬上有所轉變，「哦哦哦，係！晨曦命令到就交畀我啦！」

「咁小事，再做唔好就無人保得住你。」說罷便轉身離去的守衛有點瞧不起恆叔。

房間裡又只有我們兩人了，準備又要受到疲勞轟炸了。我走近床邊癱坐在上面，腦袋仍然是高速運行的狀態。此刻我已經放棄了平時的慬慎，我再無暇管這些事，自然地想法都寫在臉上告訴世人了。





「啊仔，好煩惱啵。都係嘅，你應該做咗啲幾嚴重嘅事先要將你扣留喺到。但係上邊又無落武力看守嘅命令，又幾奇怪～」

我開口問，大概是今天對恆叔說的第二口話，「武力看守？」

恆叔解釋著，「係啊，不過你哋唔知都正常，一般嚟講我哋要睇住某啲人嘅時候，上邊會因應唔同情況而落柯打，有機會危害到其他人就會需要武力看守。簡單啲講，佢敢亂嚟就可以打柒佢。」

我不至於要武力看守吧，或者這樣說，我連自己犯了什麼罪也摸不著頭腦。身為人，非得要冷血看待所有事情才有資格繼續嗎？算了，就算我現在想到頭在房間裡原地爆炸也不會得到答案。

「啱架喇，你留喺到都無嘢做，咪當嚟渡假囉，喺到抖下，唔洗同人逼。嗱，飲杯水先啦！」渡假？什麼意思？啊，夠了，別再自尋煩惱。我把整杯水灌入口中。





不知不覺間就這樣躺著進入了夢鄉。明明才起床沒多久，明明一點都不累….

「快啲走…！唔好信…晨曦…講嘅嘢！」砰！

「赫！」坐了起來才意識到又是這場惡夢。

「嘩，嚇死人咩！」恆叔坐在旁邊一張椅上，受到極大的驚嚇。

「今次你索性坐低望？下次咪咀埋落嚟？」





「啊仔你好呢味？嗱我講明先！我唔係架！我尊重，但係你唔可以逼我！」恆叔受到的驚嚇比剛才更是強烈。

「唉，講笑咋。我係話你奉命睇住我，可以坐喺到咁舒服？」今天沒怎麼說話，就算是恆叔也只好將就下。

恆叔總算是心情稍為緩和，「講還講，咪拎呢啲嘢嚟講笑嘛真係！」

「你未答我。」我望著他。

「係啵，細細聲話你聽啦。」他示意我把耳湊到他嘴邊。「梗係唔得啦…你見唔到我特登坐你側邊架咩？坐出啲都會畀人見到…」臉貼臉的情況下我也差點聽不見。

我白眼都快要翻到腦後邊了，「其實…你都幾特別。」恆叔再嚇一跳。「冷靜啲聽埋我講先啦，唔係你諗嗰種，我意思係其他守衛都好不近人情咁，唯獨係你唔同，點講好呢？你畀我感覺到我重係同人相處緊。」

「係咩？」恆叔開始沾沾自喜，「我當你讚緊我架喇。」我的確是。

他繼續道「不過你都唔怪得佢哋嘅，其實以前大家無咁緊張架，自從近排啲事好似頻頻發生。就好似…」他停了下來，望向我，「係囉，你呢單都係奇奇怪怪嘅事啦，總之呢到變得好唔同啦唉。」





「聽你咁講，你喺到好耐？」我問。

「十幾年囉。」十幾年…

十幾年？！他至少有三十歲，十幾年，意味著…

「你…」未等我把問題問出口，兩個守衛又走了進來。

「傾夠偈喇，晨曦要見你。」兩人二話不說把我弄了起來。該死的，真不是時候。左右護法全程半句話都沒說，彷如只會執行任務的機器，不出一會把我搬上了40樓。