《😭你無法知道大數據年代擦不上榜努力寫作的作家在哭😢》完☑️☑️☑️: 😥😥😥😥😥😢😢😢

終於要講下個小說網喺呢幾個月生意係點。由於小弟只係業餘人士，攞唔到太多商業機構先睇到畀錢買返嚟嘅資料，所以得呢半年嚟嘅粗略數據分享下，半年前亦都係我開始會喺嗰度玩嘅時間。（由於小弟平時消費態度同一個精算師無乜分別，買包米都要計微積分咁滯，所以我去親邊間餐廳食就執到邊間，希望唔會整冧個網。）

三月嗰陣，個網係有470k總流量，但到咗八月，只係得返190k，你話大唔大鑊？呢度唔係賣名錶或手袋靠幾個富二代闊太就可以生存到，要知道廣告網站收入同流量係完全成正比，即係呢個網收入足足跌咗六成（60%）！而喺同一時間裡面，另一個P字頭小說網嘅流量就由250k升到去450k，但嗰個網唔係廣告網站，所以唔等於嗰邊好好搵。

我之前講過，大約每日人氣過700就可以攞到第一，300到700就二至五，咁根據滑坡理論，或然率獨立事件互疊，統計學分佈密度積分，加一堆廢話…你就會知道成個網嘅人氣大概落喺榜一作品人氣嘅7至9陪左右，即係每日大概有總人氣6000，乘返八月有31日，大概就會得到每月總流量190k，同商業分析網上面嘅資料係非常脗合。

咁即係個網收入有幾多？呢度作一個粗略推算，以一段Youtube片1M流量就有1000USD計算，我相信呢個類型嘅網站都係差唔多，雖然媒體網站嘅廣告效益唔會夠Youtube娛樂短片嚟，但係由於每一個人氣都會click好多個網頁（暫時統計係5個，即每次每使用者會睇五個分章咁），我相信個範圍都會落喺75%到150%之內；假如當一模一樣，即係佢三月時嘅營收大概有$3800港子，而到咗而家就得返$1500港子。

你諗住整個網站一個月有千五蚊收都唔錯？唔好唔記得…第一名發放 HK$10，第二名發放 HK$9，第三名發放 HK$8，第四名發放 HK$7，第五名發放 HK$6，第六名發放 HK$5，第七名發放 HK$4，第八名發放 HK$3，第九名發放 HK$2，第十名發放 HK$1。咁根據DSE數學嘅Arithmetic Sequence計算，佢每日嘅潛在支出係55蚊，假如一個月係有31日，每月潛在總支出就係$1705，暫時嚟計係有機會做成200蚊嘅赤字（當然收入條數好浮，可能打完甜之後scaling factor大咗，但斷估點都唔會超過我估算嘅double即係$3000港子。），另外重有domain域名費，server hosting費，寫app費…一大堆有的沒的。





待續。