《😭你無法知道大數據年代擦不上榜努力寫作的作家在哭😢》完☑️☑️☑️: 😥😥😥😥😥😥😥😢

各位讀者以及作家，你哋好。

呢篇文章唔係小說嚟，無錯，我唔止識寫小說嘅；你哋可以當評論睇，當議論文睇，說明書睇，甚至係散文都得。如果你係一個網絡小說作家，又或者係資深小說愛好者，抑或熱衷文字文化嘅有識之士，我係非常歡迎各位喺呢篇文章下面留言；無論係試抒己見，深入深討，留個閱字畀我，謾罵本人都無任歡迎。

呢篇文章無關任何寫文嘅事宜，唔會講潮流風氣，寫作文筆，修辭手法，故事思想，甜故爭拗。只會講幾樣嘢，網絡流量原則，排行榜，擦流量，同衍生出嚟嘅問題；本人會盡量維持客觀持平，用理性嘅角度嚟描寫事實，至於閣下嘅睇法同回應可以話係悉隨尊便。

首先想講，我唔係一個作家，作家係一份職業，或者係一個志向，代表住一個人希望賣文為生，利用文字創意嚟建立自己嘅事業；喺網絡上我無用任何一隻字轉換成我嘅金錢利益，就算有利益都係當捐畀嗰啲勞苦功高嘅site host。其次，排行榜對我嚟講同一件玩具無乜分別，主要都係用嚟做社會實驗同數據分析，當然我係會諗辦法用文字嚟滿足讀者同呢個世界，但唔代表排行榜於我心中有幾重要，強者勝劣者敗本來就係千古不變嘅道理，寫得唔好無人睇我自然就會躝屍趌路；正如我唔會走去參加畫畫比賽同歌唱比賽嘅道理一樣（填詞應該OK），寫得差上唔到榜其實唔使喊，天知道你可能有其他長處呢，問題係呢個社會會喺各種角度整到你喊。第三，喊嘅唔係我，我對寫作無夢想，亦唔算係好大興趣，如果無人睇我都可以樂得封筆將時間花喺其他事情上面，其實唔錯；喊嘅係一堆真正有熱誠希望自己努力寫作會獲得少少回報嘅作者，無論係從事寫作多年嘅作家，抑或想挑戰自己語文能力嘅學生，我相信排行榜喺佢哋心目中係重要嘅（如果你係一個當網絡文章網站係自己靈魂留言板嘅作者咁唔使睇我呢篇文章）。

有無人鬧我呀？我咪又係鍾意騭喺個排行榜上面獻醜…欵…咁我諗我寫嘅嘢唔太差嘅，而且都keep住每日廢噏，希望唔會對其他作者做成困擾啦，當然如果你痛恨我都可以鬧我嘅，但唔好打，我驚痛。





講咗咁多廢話，開始入正題；呢篇文嘅主旨就係探討網絡流量同衍生出嚟嘅問題，首先要知嘅就係Google Analytics同Google AdSense呢兩樣嘢…呀，夠字數喇，本喵先行休息，下章再續（唔一定明天）。