她的伴奏者: 14

「Mozart先，慢少少開始」子瑜示意ok，又一個煎熬嘅黃昏

四個重音開始，子瑜入黎無論係音色同時機都把握得不溫不火，明顯有落唔少苦功。

但咪住，都無聽過佢練嘢嘅…

「今日好左喎，但都係有少少唔自然…」我話
「屌，你想點㗎，成日都話唔自然」子瑜同我熟左就完全唔客氣
「差少少咋，但我又好難形容俾妳聽…」





有時音樂嘅嘢真係好抽象，吹啱晒啲音同節奏係好勁，但呢個淨係考級level，如果你無感情投放的話始終都係音符唔係音樂。

「妳試下瞇埋眼吹？」我大膽建議
「睇唔到譜喎」
「吹咁多次都熟啦，錯幾個音唔緊要」

好明顯地子瑜放慢左少少，我為左配合佢喺伴奏嗰度emphasise多啲，等多一陣。

條友一直以來真係睇譜吹就算…一叫多啲感情即刻錯幾粒音，睇唔出女仔會有呢啲問題。





「就係要呢種感覺，起碼要呢個level」我話
「乜唔係啲音啱晒就得咩？」
「如果你考普通級就係嘅，但AT唔係咁簡單」我講出呢個殘酷事實

子瑜好似有啲唔開心，佢肯定係練左好多好多技巧嘢。

「咁…技巧嘢都重要嘅…」我即刻補鑊
「得啦，我點會因為少少嘢氣餒」子瑜攞返起支笛繼續吹

夜晚，我簡簡單單煮左個兩餸一湯就算，大家都攰。




「喂？媽？我同柏豪食緊飯啊。」食飯嗰陣子瑜媽打黎。

子瑜開左個speaker，叫我講兩句。

「啊auntie你好啊，法國天氣好嗎？」
「哎唷柏豪啊，法國天氣還好啦，你同子瑜相處成點啊，子瑜有無恰你啊？」
「啊～子瑜呢就…有啲任…」想講嘅時候俾子瑜捏住我隻腳，痴撚線女人！
「有啲賢淑，又溫柔…」我講完先發現越講越洗唔清

對唔住Miss Wong，身為文學人竟然犯下用錯詞嘅彌天大錯。

「哈哈哈哈，我個女原來有咁好咩？點啊你地，有無嘢食㗎？我最擔心係呢樣嘢。柏豪你唔知啊，子瑜佢懶到可以兩日唔食嘢，肚餓又…..」下刪兩萬字

我望一望眼前一個人清晒半碟肉餅嘅子瑜，笑咗下。
「Auntie佢喺我屋企好食好住啊，唔使擔心！我日日煮飯㗎」我一路忍笑一路講





依家有啲似外母問一對新婚夫婦相處成點，呢種生活好舒服。唔係子瑜，我根本唔會煮飯，間屋亦都唔會有咁多歡笑聲。

我又亂諗嘢了。

「得啦媽，我要食飯喇，拜拜」

兩個人靜左一陣，我忍唔住笑左。

「你笑乜啊？」
「笑妳食咁多嘢。」
「古古怪怪。」佢夾起條菜

屏住呼吸，腳跟準備
「今晚妳洗碗！」彈射成功，成功轉移至梳化




「唔得啊！又係我洗」子瑜放低碗飯走過黎
「又係？聽聞次次都係我洗喎，況且今日無乜油膩嘢，洗都洗好快」我開電視睇，唔理佢

最後佢都係屈服自己洗，哈。

洗完都係八點半，兩個人無所事事望住電視發吽豆，但聽日又要返學，去唔得遠。

「喂，不如落街？」我問
「去邊啊夜媽媽？」
「去…超市？反正屋企好似已經無乜糧食」
「MC咩…不過都好，上次都係你自己去買」

超市咁夜真係無乜人，反而顯得我同子瑜勁似夫妻食完飯落樓買嘢散步，可能我ff得多。

「買唔買意粉？妳住左咁耐都未煮過西餐？」我試圖打開對話，但子瑜淨係望住凍櫃啲啫喱眼甘甘。




「哦，甜品吓話」我望到個價錢，再望下子瑜水汪汪嘅眼睛，好吧。

買買吓醒起屋企廁紙就快用晒，自然走去廁紙嗰度。不過，我聽到有啲怪聲…係打茄輪嘅聲音…我隔住個貨架偷睇，哇使唔使咁猴擒啊，教壞細佬咩。

呢個時候，不識時務嘅子瑜竟然好大聲咁問我有咩睇，屌。而敦倫緊嘅二位亦都發現左有人偷睇，大大聲叫：「仆街邊個？」

千鈞一髮之際，我放棄左購物車，拉住子瑜跑得有幾快得幾快，唔知跑左幾遠，發現後面終於無人。

「哇屌，嚇撚死我了，好彩走得甩。」我索晒氣
「跑幾步…就喘晒氣，你都好虧喎」子瑜自己都係索晒氣
「仲好講，唔係你使搞到咁落魄，篤穿人地好事，你知唔知阻人…會俾人燒春袋㗎？」子瑜面都紅晒，我知道我又失言了
「er…我意思係頭先咁電光火石就比較危險…」
「哈哈哈我屌…你咪以為我真係不吃煙火啦。阻人扑嘢燒春袋吖嘛，我知道啊，但我真係估唔到會有人喺超市啫…」
「人地緊火咪要超市出火，可能本身係落黎買dom」我分析
「得喇，無興趣知道佢地幾時敦倫，仲買唔買嘢㗎？」子瑜問




「買，不過去第二間。」我話

呢單嘢，子瑜同我都忍唔住笑。

「啊你話如果條友認得我地下次超市見面會唔會好尷尬？」我問
「咁一直唔好去呢間咪得。」子瑜又啱喎
「但另一間吉之島好遠喎，唔通次次都好似頭先咁跑過去咩？」
「以後每個星期六日先買一次咪得，唔使夜媽媽出黎。」子瑜提出一個相當好嘅建議
「咁聰明又唔見妳吹笛嗰方面係咁。」

就係咁，呢個女人培養左我生活嘅編排。

「哇…呢啲啫喱成十五蚊個，不如去糖水舖食」我望住盛惠四百蚊嘅單據嘆氣
「兩回事咯，啫喱係開心嗰陣食嘅，糖水舖嗰啲係唔開心先去。」
「吓？」我其實唔係好明，但見到子瑜蹦蹦跳跳咁就無問落去。

我覺得好快要問老母攞錢。