[校園][純愛]《身旁的那一個》: 第七十章

有時我都服咗嵐嵐呢個人

真係先知咁樣

佢嗰日講嘅嘢最後全部應驗晒，

首先愷晴不嬲都有帶紙巾

佢仲叫我冇嗰陣問佢拎添，





第二就係佢都知戲院會凍啲

嗰陣十一月天氣又開始轉涼

所以佢都著咗啲比較保暖嘅衣物

如果呢個時候我再畀件褸佢，

咁點會啱用呢係咪先





第三就係睇緊戲嘅時候，

突然間遇到啲驚險鏡頭嗰陣

佢真係挨住咗我隻手臂

啲女人係咁㗎啦又要驚又要睇，

雖然有個靚女挨住，





不過我嗰陣又好似冇乜特別感覺

我就冇整蠱佢呀見到佢咁驚

如果佢係嵐嵐我就會玩嘢嘅

我唔知你哋有咩睇法又或者有冇同感啦，

有啲行為真係對住特定嘅人先會做

我唔係講扑野屌閪嗰啲咸濕嘢

大家唔好諗歪

我一直以嚟都覺得人與人之間個化學反應其實好奇妙





無論係同性又或者異性都好，

有啲嘢你淨係會對住某幾個人做

好簡單例如吹水

你對住其他人可能冇乜嘢講，

不過對住特定嘅人嗰陣，

嗰個人唔一定係你嘅老友死黨

不過你都會滔滔不絕咁係咁講嘢





我上面講，

話如果係嵐嵐驚嘅話就會整蠱佢就係咁解

好似好仆街啦下，

呢方面唔係重點，

我不嬲正氣

相信睇緊嘅你哋都有同感.

我同佢兩個睇完戲之後都冇乜特別嘢發生，

咁就不如講下聖誕啦





唔知你哋仲記唔記得，

上年聖誕節係我拗柴嘅時候

參加嗰個乜鳩足球義工搞到咁

今年我醒呀唔會再玩呢啲嘢

見過鬼自然怕黑

不過我記得嗰陣都算特別嘅

唔係話好特別嘅叫做有啲嘢講下啦，





話說我哋班當時有個人過完呢個聖誕節就會走

唔會喺香港玩埋會考

所以今年嘅聖誕聯歡節，

呢個人就做咗主角

佢之前冇喺故事入面出過場嘅

而本身佢人緣都唔錯，

求其畀住個名叫佢a先啦

因為呢個緣故，

所以當年我哋班好積極搞聖誕聯歡會

買咗好多嘢籌備啦，

食嘅又好玩嘅都好

原本又想去miss屋企嘅

點知主角話想喺學校搞

咁冇辦法啦佢係主角梗係就佢，

佢話呢間學校畀咗好多回憶佢

正正係因為咁，

於是last day諗住喺返呢度搞

我嗰陣就冇呢啲感覺

問心我就唔憎恨呢間學校

咁多年返學我亦唔覺得辛苦，

係當時嘅我對身邊好多嘢都冷感

大家唔好見怪

人會成長㗎嘛係咪先

所以嗰陣我都有份幫手籌備呢個聖誕聯歡會

都係同嵐嵐佢哋買下嘢呀，

miss又話想送驚喜個佢

諗住整個powerpoint記錄咁多年喺學校嘅生活，

因為嗰條友有玩運動

年年校運會都有佢衝線嘅英姿，

不過話明係驚喜，

第一當然要神秘啦

第二亦都唔會叫晒全部人幫手

越多人知咪越容易穿煲

到時搵日留堂叫全部人一齊傾

淨係唔叫主角，

佢幾笨柒都知啦下話，

所以就諗住淨係叫幾個電腦比較好嘅人幫手，

我就係其中一個

講明先我係唔識用powerpoint

點解畀人叫幫手，

咪又係因為鍾曉嵐條賤人囉

佢條友就係咁衰㗎啦，

鍾意拉人落水.