[校園][純愛]《身旁的那一個》: 第六十六章

大家冇估錯

如果我見到個茄哩啡就梗係唔講出嚟，

有邊啲人值得我拎出嚟同大家分享

嚟嚟去去咪又係鍾小姐

事關我去咗商場啦，





嗰陣要揸水就去咗商場廁所先

之後一出嚟就喺附近兜咗陣，

睇下有咩食咁

冇幾耐我就見到佢一條友坐咗喺入面

唔知係咪叫咗嘢食未嚟喇，





因為我見佢個枱面乜都冇

一個人坐喺度，

咁我咪行入去囉

我:「小姐歡唔歡迎搭枱呀」

嵐嵐跟住望一望我好驚訝咁





嵐嵐:「咩風吹你嚟呀

咁快送完人返屋企」

我:「佢住邊你都知㗎啦

可以用到幾多時間啫」

嵐嵐:「我呢啲識做啦

特登畀位你上」

我:「我就係想話你老套到爆呀

我見到你打眼色就知咩事」





嵐嵐:「驚你死蠢唔明丫嘛」

我:「你冇叫嘢食呀

咁冇品入嚟齋坐」

嵐嵐:「叫咗杯嘢飲

時候唔早，

費事食啦又唔係好肚餓」

我:「叫個pancake囉我同你兩個share」





嵐嵐:「原來係你肚餓」

我:「知你鍾意食pancake啫

講明先我唔係痴漢冇跟蹤你，

咁有緣冇理由入到嚟淨係飲嘢」

嵐嵐:「叫啦」

咁多讀者可能睇唔出有咩分別，

不過嗰一刻我覺得坐我對面嘅嵐嵐同平時有啲唔同

少少悶悶不樂唔開心咁囉





對答就冇嘢，

不過我當時feel到佢同平時有啲唔同

純粹感覺嘅啫其實

始終大家識咗咁耐成日都一齊玩同埋傾計，

叫完嘢食之後我都問佢

我:「做咩事呀

悶悶不樂咁嘅」





嵐嵐:「冇嘢呀」

啲女人就係咁㗎啦，

一聽到呢句就知即係有嘢

我:「我唔迫你喇你想講就講啦

靚姐姐咩事呀」

之後我好無聊扮聲玩公仔

嵐嵐:「你哋出咗嚟嘅」

我:「主人話靚姐姐都有啲事喎

咪叫我哋出嚟睇下囉」

嵐嵐:「都唔知話你醒好丫定係蠢」

我:「梗係醒啦使乜講」


嵐嵐:「冇呀今日Oliver同我表白」

我:「嘩咁你有冇應承」

嵐嵐:「梗係冇啦

都唔鍾意佢，

唔想害人」

我:「咁咪冇問題囉已經完咗件事」

嵐嵐:「最麻煩係我成日同佢一齊補習，

佢頭先表白之後問我

我話唔得因為我唔鍾意你當你係朋友，

跟住佢話唔緊要冇嘢

再畀啲時間大家得唔得」

我:「估唔到個仆街咁進取」

嵐嵐:「問題係我成日同佢一齊

我又覺得大家讀書上個idea都好近，

不過問心我又真係唔鍾意佢」

之後個pancake嚟咗

我同佢就切一半share嚟食，

我:「冇問題呀咪一路好似keep住咁」

嵐嵐:「我覺得好似好衰啫」

我:「傻豬嚟嘅點會

我成日都話男同女唔係淨係得拍拖

咁你兩個一齊讀書補習一組夾開

好正常就會一路keep住啦，

佢係要keep住鍾意你

或者亂諗嘢冇辦法㗎喎

就算你刻意保持距離，

都影響唔到佢呢兩方面㗎」

嵐嵐:「又係嘅

佢頭先都問我有咩比唔上人

唔係好激動嘅好冷靜嘅，

我話唔關事㗎喎

我照直同佢講，

我同你一組大家夾得好好，

不過同鍾意拍拖係兩回事」

我:「咁咪得囉你講得咁清楚

傻豬嚟嘅唔好煩」

嵐嵐:「你就好啦巫澤軒

有咩煩惱都自己輕鬆搞掂」

嵐嵐有樣嘢我幾欣賞

佢好明白每一個人都有煩惱，

所以佢成日話我處理得好

而唔係話我呢個人冇煩惱

呢樣嘢要分得好清楚

我:「我唔會畀自己有煩惱咁辛苦㗎喎

有煩惱我一定諗點樣解決，

當然我都明好多嘢解決唔到

呢啲問題嘅時候咁諗嚟都無謂啦

如果有得解決就梗係盡快ko咗佢

可能我男仔同你哋女仔唔同呀，

我覺得讀書拍拖真係可以分開兩樣嘢

如果籃球佬因為你唔受溝跟住影響埋其他嘢

不論影響你定係影響佢自己，

咁都只係佢問題

完全唔關你事

你拒絕佢冇錯㗎

學你話齋唔鍾意咪拒絕囉，

佢接受唔到呢個事實跟住情緒勒索你

我就幫你屌柒佢

就係咁簡單」

嵐嵐:「咁佢又冇

我拒絕咗之後佢話當佢冇講過

大家繼續做朋友，

不過佢希望有一日會令到我接受佢喎」

我:「咁咪好囉冇問題呀非常好

我幾驚佢搞鳩你，

好彩佢都似返個男人」

嵐嵐:「雞仔狗仔馬仔企鵝仔

幫我多謝你主人」

我:「得㗎喇我返去會同佢講㗎喇

得㗎喇我返去會同佢講㗎喇

得㗎喇我返去會同佢講㗎喇

得㗎喇我返去會同佢講㗎喇」

我點解講四次係因為我有四隻公仔

嵐嵐:「真係服咗你

都係嗰句我唔知你係醒定係蠢，

睇唔透」

我:「依家咪幾好開心返晒」

嵐嵐:「你好嘢囉

你食埋佢啦我飽啦，

呢餐我請

獎勵下你咁醒」

我:「多謝主人」

嵐嵐:「低b」

嵐嵐一直以嚟我都覺得佢係一個好擅於管理自己情緒嘅女仔

頭先嗰個情況我好少見，

咁當然我都明，

就算eq點好，

都總會有不知所措嘅時候

我唔敢講頭先我幫咗佢啦

事實上我都唔覺得幫到啲乜

咁但係見到佢依家對比起頭先，

睇到明顯放鬆咗，

其實咁就已經夠.