[校園][純愛]《身旁的那一個》: 第四十四章

點解無啦啦畀樣嘢我呢

其實件事係咁嘅，

首先要講返我同愷晴係禮拜六去迪士尼

禮拜日去嘅話，

禮拜一就已經要返學冇得休息





雖然你哋話射波都得

咁我呢啲乖學生又點會咁做呢

所以就揀咗禮拜六，

至於點解會關嵐嵐事

係因為有一日我終於記得，





我要拎返個零禮拜之前

我同佢去海洋公園影嘅相

於是禮拜五嗰日放咗學

我就過咗去搵佢

我:「係喎我想拎返海洋公園嗰啲相





請問你批唔批准」

嵐嵐:「有冇搞錯呀咁急

部相機喺屋企喎」

我:「我又係衰嘅

啱啱先記得」

嵐嵐:「食個下午茶先講丫

佢哋今日唔得閒呀得我同你.」

話說我同佢禮拜五間唔中都會去食下午茶





呢個行為由中一開始至到依家，

唔會個個禮拜五都食

不過好似今次咁，

講開就會食㗎啦

而且一定係禮拜五喎

其他日子放咗學都唔會去食，

除非真係好撚肚餓啦





始終佢有佢玩開嗰班friend，

我都有我嘅朋友，

而且各自都有嘢做

佢係prefect間唔中要開會

至於我，

你見我喺呢個故事都冇講過玩啲咩運動

就知我唔係一個運動健將啦

咁但係放咗學我都有嘢做㗎嘛，





返去做家務啦

幫老豆老母手啦

我係孝子嚟㗎嘛係咪先

最主要係我真係冇乜興趣

返屋企沖涼上網飲下嘢不知幾舒服

肚餓嘅話又有老母整嘢食

咁我梗係返屋企啦，





正正係因為咁，

大家唔係話咁容易夾啱時間

不過今日有事相求，

咁就一路食一路講啦.


我哋去返我同佢平時食下午茶嗰間餐廳

佢叫咗個沙律，

我就叫咗個西多

跟住就坐喺度講正經嘢喇，

嵐嵐:「你陣間喺我屋企樓下等我啦

畀部相機你」

我:「你啲相拎晒出嚟未」

嵐嵐:「搞掂咗啦

似你咩依家先記得」

我:「我冇記性都唔係第一日嘅事啦

咁快就畀說話我聽」

嵐嵐:「係喎你使唔使帶相機呀

同愷晴去迪士尼點可以唔影靚相呢」

我:「我屋企冇相機喎

我屋企以前有部嘅不過後尾爛撚咗

老豆老母而家冇以前咁得閒

成日都去旅行，

所以佢哋都未買部新嘅

我嘅話你就知啦

我都唔影相嘅，

嵐嵐:「用我呢部囉」

我:「唔好啦我手腳論盡

整爛都唔知點樣賠畀你

雖然我又唔想為咗聽日特登買相機，

我又冇做功課唔知邊部好」

嵐嵐:「臨時臨急用住我呢部先啦

你又識用.」

我:「先小人後君子

整爛我唔賠呀」

嵐嵐:「得喇長氣」

同佢食完之後就跟佢返屋企，

之後喺佢屋企樓下等

冇幾耐佢就落嚟畀部相機我，

嵐嵐:「張sd卡插喺呢度

唔知你條友有冇card reader，

畀埋你

你禮拜一畀返我啦」

我:「我諗我禮拜六影完相已經可以畀你」

嵐嵐:「唔使咁急喎」

我:「咁我到時先算

不過你預我禮拜六畀到你

費事拖住啦」

嵐嵐:「咁好啦」

之後拎返去我就拎張sd卡出嚟插落電腦嗰度，

之後就將上次同嵐嵐喺海洋公園影嗰啲相

擺落去我部電腦入面，

一路睇一路笑

條友真係傻嘅係咁影相

平心而論係幾靚嘅

特別係我同佢喺跳樓機前面影嗰幅

之前我都唔記得講，

嗰張相我係搭住佢膊頭影

對我呢啲毒撚嚟講，

搭女仔膊頭真係一件比較罕有嘅事

呢次係人生第一次

唔知睇緊你哋仲記唔記得，

人生第一次搭異性膊頭嗰陣係咩感覺呢

我呢次到依家仍然記憶猶新，

唔同一般毒撚對住靚女嗰種既定嘅反應，

唔會好緊張，

亦都唔會好拘謹

對住佢永遠都係好自然好舒服.