[校園][純愛]《身旁的那一個》: 第一章
首先
故事要去返會考a level嘅年代
都十幾年前喇
睇緊嘅你哋可能有啲陌生
循例講下啦，
以前唔似依家dse咁
可以自由選科
我哋個年代去到中四揀科嗰陣
一定要喺文科商科理科揀一樣
咁點解呢個故事要喺中四開始講
其實冇㗎純粹覺得初中冇乜特別
我又懶呢費事講咁多啦
諗諗下大學生涯亦都唔見得好精彩
我自己又覺得高中都勉強算係人生一個階段
咁就喺度開始講啦
我條友同大部分男仔一樣
都係揀理科
文科寫到我手都跛
初中嗰陣都有涉獵過歷史文學嗰啲，
唔係講笑完全唔掂
所以好快就知我呢條友完全唔係文科嘅材料
以前讀嗰啲都話一個禮拜一兩堂啫，
遲啲有幾年對住佢
真係死俾你睇
所以我嗰陣啲功課都係抄
當然啦，
轉下啲字眼換下啲段落咁囉
照抄唔捉你都對唔住自己啦
抄都要醒目啲㗎嘛，
同埋累到人就唔好啦，
我又畀人屌以後又冇得抄
係咁㗎啦鬼叫我唔爭氣咩
求人係要低聲下氣㗎喇
而最撚好笑嘅就係
上年畀我抄嗰個今年竟然都係揀理科讀
佢係邊個
呢條仆街我都識得佢耐
佢個名叫鍾曉嵐，
我中一已經同佢同班
頂佢個肺初中嗰幾年全部都係同佢同班
依家大家又同一科
暑期上互聯網見到，
咁好彩又係同佢同班
因為我哋學校文科理科各有兩班
真係唔知咩事成日都同佢同班
又畀佢條賤種喺度抽水呢樣嗰樣
句句窒住晒佢就最叻
不過無可否認佢讀書係好撚勁
基本上咩科都讀得掂
以前嗰啲歷史文學就係抄佢，
佢條友雖然成日開口夾著脷
不過又幾有義氣嘅
以前抄佢嗰啲歷史文學又或者讀書報告
專問你睇法嗰啲呢，
佢寫完之後，
跟住會喺佢份功課入面
用鉛筆寫住次序
例如佢自己嗰份功課有四個論點
當係abcd順次序咁啦
佢畀我之前會喺佢份功課mark住abcd嘅次序，
例如佢會喺b嗰段隔離寫住1，
d嗰段隔離寫住2，
代表我陣間要寫b呢個point先
寫完b就寫d，
我次次都係聽佢吩咐
咁耐都冇畀人察覺到
佢犀利嘅
同埋次次我寫完之後佢都會幫我對
可能你哋會問，
有咁多時間嘅咩
老師要收簿㗎嘛，
咁真係唔好意思喇因為佢就係科長
老師又好撚懶
次次都係佢收齊一疊簿之後再交畀老師
所以嗰年我啲功課就係咁樣搞掂.
至於我同佢點樣識
我上面咪話中一開始同佢同班嘅
其實就係中一第一日正式上堂
老師分配座位嗰陣，
安排咗我同佢一齊坐
咁就識咗啦
一路熟到依家
至於你哋最關心嘅樣，
好多人話佢靚女囉
我又唔係好覺
正正常常咁啦
唔係豬扒嘅哈哈哈
的確我都知有啲狂風浪蝶嘅
不過佢真係冇興趣，
一嘢就推咗人
例如有時有啲柒頭考完試放早搵佢食飯
嗰啲柒頭冧佢冧到出面
而佢次次都話唔得唔食咁
之後一係搵我食
一係就搵佢啲friend食，
我有時都會問佢唔係啩
可以食免費飯喎
咁都唔食
佢都話費事畀假希望人
冇興趣咁不如唔好應約啦
挑扮清高
驚冇嘢講就冇嘢講啦
嗰班裙下之臣真係畀佢呃咗
佢條仆街平時對住我成日都屌鳩我
講句嘢都窒住晒
唔溫柔㗎頂你
你哋唔知咋傻仔
就好似嗰日咁，
學校互聯網公佈咗分班結果
佢就打左畀我，
佢:「又同你條傻仔同班
」我:「咁咪好囉
你又可以搵我做藉口避開你班兵
」佢:「唔好亂講從來冇收兵
」我:「係真係假你先知啦
」佢:「我收嘅話第一個收你啦
幾聽話係咁講都唔嬲嘅
」我:「唔係個個好似我咁笨柒
」佢:「你都知你笨柒呢
係喎，
愷晴同我哋同班呀
係你出手嘅好時機啦東爺
」我:「我同你講過你個friend幾靚啫
使唔使係咁講
不過係喎有呢啲靚女做同班同學真係唔錯
」佢:「我知你讚緊我嘅東哥
」我:「咁都畀你發現咗
你都幾靚㗎
」佢:「多謝
」我:「厚面皮到呢
愷晴嗰度交俾你喇我要埋你堆做狗公
」佢:「你條友又搵我過橋
」我:「幫幫手啦嵐嵐
我啲friend冇一個同佢熟
你哋都叫同一堆friend丫
」佢:「有嘢幫手就嵐嵐
平時就喂，賤種
」我:「我知你唔介意嘅嵐b
」佢:「得啦唔好再講啦好核突
盡量幫你啦
」我:「講笑啫食飯嗰度唔使一齊
你嗰堆friend我淨係同你熟
」佢:「你諗多咗啦冇諗住叫埋你食飯
我哋一齊做班會咪得
愷晴最鍾意人哋勤力做班會㗎喇
」我:「信你都戇鳩
肯定係想搵條友幫手拎嘢搬嘢
」佢:「唔係呀佢真係鍾意㗎
」我:「一定係咁啦
」佢:「好咁我哋預埋你
」女人啲記性真係好痴線
我只係有一次同佢講，
你個friend幾靚女咩名
佢就以為我鍾意愷晴
事實上愷晴真係幾靚嘅
白白淨嬌小玲瓏少少包包面
好可愛㗎
嵐嵐其實佢都好白淨不過就高啲
隻眼再大啲
不過佢唔講嘢個樣其實都幾西
好似全世界得罪佢咁樣
愷晴親和力就好似好啲
起碼三九唔識七見到佢都會微笑點頭嗰種
嵐嵐呢個仆街行過對到眼神都好q惡
佢聲稱唔係心情唔好
係冇表情個樣就係咁
女人好鬼蠱惑呀信不信由你，
佢咁講咪咁聽.