[校園][純愛]《身旁的那一個》: 序章

大家好

我叫做巫澤軒

我相信咁精明嘅你哋，

睇到呢個名嗰陣，

已經知我呢個名會成日俾人哋拎嚟講笑





所以呢，

好多人都叫我做東仔

細細個嗰陣都會解釋我唔係叫呀東

慢慢發覺原來冇人理嘅

我點樣解釋都好，





佢哋都係叫我東仔

久而久之，

呢個名就變咗我學生時期嘅花名

咁依家出到嚟做嘢，

就梗係唔係呢個名啦





你知啦寫字樓啲八婆乜都講一餐

上至國家大事下至隔離鄰舍，

乜都會拎嚟講一餐，

我呢啲別無他求嘅啫，

安安分分打份工

準時收工就算

有見及此，

所以我都係求其搵個英文名就算





事實上讀完書之後真係好少人叫我東仔，

有時出街撞到同學朋友，

聽到真係唔係好慣

跟住電話一響收到message，

就有見到東仔呢兩個字出現

好嘅唔靈醜嘅靈

即刻睇下佢講乜鳩先





主席:「東仔好耐冇見喇

今次畀啲驚喜你」

我:「做咩事呀大佬」

主席:「今個禮拜五得唔得閒先」

我:「未知喎，

做咩事」

主席:「你有睇group㗎啦

Davis佢咪同Manus結婚嘅」





我:「我知呀

佢哋早幾個月有喺個group講.」

主席:「打嚟咪就係為咗呢單嘢喇

佢哋諗住禮拜五派帖畀我哋呀

頭先Davis搵我問我可唔可以幫手做搞手

約晒你地成班出嚟順便當聚下食飯，

你知啦我條友成日做埋呢啲嘢嘅





咁咪問下你哋得唔得閒囉」

我:「度下先

禮拜四覆實得唔得」

主席:「其實咁嘅我都知好難約時間

唔止你

其實有啲人都未落實，

而我都叫咗人幫手負責聯絡人

得我一個點樣搞得晒丫」

我:「辛苦你喇」

主席:「咁點呀

初步預唔預你好」

我:「預我嚟到先啦」

主席:「好

我:「咪住先

你咁熱心好似伏伏地喎

依家又唔係你結，

好蠱惑喎大佬係咪猜輸咗整蠱我」

主席:「真係㗎

我冇問咁多呀得閒咪幫下手

你知啦我同佢讀書friend到依家

做到咪做.」

我:「問下啲八卦嘢

係咪請晒全部舊同學」

主席:「以前我哋嗰班咪有幾個邊緣人嘅，

嗰兩三個冇份囉

其他嘅都有

做乜無啦啦咁問」

我:「好奇問下啫

咁你私底下再搵我傾啦

我同你都近

如果你冇搬嘅話」

主席:「定係你想我約埋Hazel

反正你同佢咁熟

我地三個又識

如果到時你禮拜五嚟唔到，

我再約你兩個出嚟食飯順便再講」

我:「到時真係嚟唔到先

都係嗰句

應該嚟到嘅，

禮拜四覆實」

主席:「好啦咁你到時搵我」

跟住就收咗線

我哋呢班讀完高中之後就各散東西，

好彩嘅係大家都叫維繫到

出咗去外國讀書嗰啲人就少見啲，

不過我近幾年都少咗同佢哋見面啦

純粹大家真係太忙，

就唔到時間

自己收工之後都想搞返私人嘢

咁咪變咗冇見囉

不過收到呢個消息真係幾開心

雖然我同新郎新娘唔係特別friend

不過始終都叫識咗咁耐，

睇住點溝女去到依家

出咗嚟做嘢咁耐，

有時諗返起以前讀書嗰啲生活都開心嘅

玩得好癲啦

做過好多痴線野

依家做唔返喇

咁多年一定有苦有甜，

不過回望返過去嗰陣，

總係有啲感慨

亦都係因為呢啲突然其來嘅衝擊，

勾起我鋪癮，

想喺度同大家分享我嘅故仔

可能你哋會覺得好悶

事實上係嘅

的而且確唔係啲咩多姿多彩嘅生活，

戴定頭盔先

至於真好假好唔重要啦，

信不信由你

有時我自己分享出嚟而有人睇已經好開心

哪怕只係一兩個讀者都好，

就算真係好差喇冇人睇，

起碼可以當係一個記錄

他日記性冇咁好嘅時候，

都可以喺度重溫

好啦唔好咁多廢話

即刻開始.