我嘅初戀: 知唔知自己做緊咩

第二日嘅朝早，起身之後第一件事，就係睇電話，睇下有冇來自Gorden嘅message。但結果都係同琴日一樣，Gorden都係冇覆過我。我個腦突然有句聲同我講：「你依家同Gorden只係網友關係架咋，網友係咁㗎啦，悶嘅時候咪搵你傾計咯，忙嘅時候、或者對你冇興趣，咪唔再搵你咯，唔洗咁上心喔。」唉，都係嘅，我地都只係見過一次嘅網友，其實真係唔洗咁上心。所以我暫時放低Gorden嘅事，專心做自己嘅嘢先。

雖然話暫時放低，但其實個心都仲係好緊張嘅。夜晚嘅時候，人係最衝動嘅。我唔理啦，決定send一大段嘢比Gorden，話比佢知我嘅諗法：「Hello，Gorden，唔知你呢幾日係咪好忙呢？呢兩日你冇覆過我，我自己都諗左好多。雖然我地只係見過一次，但我都好想繼續認識你。不過你好似好忙，我唔知你部電話攞左去整未，定係真係好忙，唔想覆我啦，不過都真心多謝你呢段日子陪我傾計，比我認識你。放心啦，我唔會再搵你㗎啦，多謝你。」（如果大家睇到呢到，可能都會覺得我好低能，同埋睇到好核突，點解我會寫啲咁嘅嘢，不過果刻我真係沉船，一到夜晚，人係衝動架嘛，我都唔想㗎，我係有呢句、有果句嘅人黎。依家諗翻起都覺得好樣衰/_\）

send左信息之後，我即刻去刷牙洗面、準備訓覺，希望洗下塊面，令自己醒下，同埋都期待下睇下Gorden會唔會覆我。當我搞掂曬啲嘢之後，睇到電話，Gorden果然有覆我，仲覆得超級快同超級多：「Michelle唔好走啊！我呢兩日真係忙啊，同埋未買新電話，所以覆唔到你message㗎咋。睇到你段message，我真係好開心㗎，見到你咁緊張我。我都好想可以再見到你啊，我地約下一次見面啦。」

好yeah！Gorden終於覆我啦，首先我嘅心情係好開心先。不過再望清楚段message，佢隔左咁耐都仲未買電話/整電話，好似有啲奇怪喔，依家電話對於人黎講咁重要，點會唔會即刻換電話啊，求其買部電話都得啦。不過呢個都唔係重點，重點係佢終於覆我了，我即刻覆左句喊嘅emoji，表示其實我真係有啲唔開心，然後再覆佢message：「你最近忙咩啊，係咪好辛苦？」（依家咁打翻啲嘢出黎，都覺得傻人都睇得出我係沉曬船，真係覺得自己好蠢。）Gorden就冇覆我message嘅事，不斷同我say sorry，都搞到自己有啲唔好意思添，不過我地都一直傾到深夜，都訂好埋第二次見面嘅時間添。