我嘅初戀: 失蹤？

同Gorden見面之後嘅日子， 我地都keep住每日傾計，佢覆我嘅頻率都好正常。

隔左兩個星期了，可能自己開始沉沉地船，都想同Gorden約第二次。第一次見面果陣，我地都冇交換到IG，所以都唔知佢真實嘅興趣係咩，如果有機會約第二次嘅話，我都希望可以了解佢更多。而且我地上次食飯，佢比多左錢，對於好執著要AA制嘅我，好想請翻佢食餐飯，比個機會我還翻錢比佢，於是我就主動咁約佢第二次見面。

星期一嘅朝早，我WhatsApp佢：「早晨啊Gorden，你下星期得唔得閒啊，我想約你食餐飯，當還翻錢比你啊。」雖然佢上次見面話佢電話壞左，不過隔左咁耐，佢應該攞左部電話去整/已經買過部新電話？

過左lunch之後，我見WhatsApp都未有通知。嗯，可能佢今日day off，係屋企訓耐左姐，都只係隔左一陣咋嘛，咁就唯有等下啦。不過我對眼成日都望住部電話，一有信息黎，我就即刻check手機，因為我怕會miss左Gorden嘅message。（我自己鍾意秒覆人地。）

時間過得超級快，已經到左夜晚了，不過我覺得今日嘅時間過得超級慢，因為今日等左成日，都仲未收到佢嘅reply。我嘅腦突然好似出現左兩個人咁：一個瘋狂叫我快啲再WhatsApp佢，問下佢有冇事；一個就比左個負面結果我，話我其實完全冇希望，可能Gorden係特登唔想覆我，所以叫我快啲放棄。我掙扎左好耐，因為自己好似真係沉沉地船。究竟佢真係未整部電話，所以睇唔到WhatsApp？但冇理由啊，佢都可以用電腦上WhatsApp架嘛，不過如果佢出左成日街，就冇咁容易覆到我了；定係佢真係已經唔想再同我傾計呢？





我個心同腦都好亂，不過向來好衝動嘅我，最後都係決定WhatsApp佢：Hello Gorden，你係咪唔舒服啊？

OK send！send完段msg之後我一直好緊張，個心都一直跳，我係咪太緊張呢？佢都只係冇覆我一日咋嘛。如果佢真係決定唔再想理我嘅話，咁我就好樣衰啦T_T

就係咁... 我一直等等等，等左一整晚，Gorden都冇覆我。最後我都決定訓覺。唔知點解個心好唔舒服