我嘅初戀: 第一次見面（2）

當Gorden向我伸手嘅時候，我完全唔識比反應，心諗：「呢個男仔咁主動嘅？一見面就握手，係咪係外國讀過書，所以特別open啲？」因為我之前同交友app嘅男仔第一次見面果陣，即使係app到講得幾熱烈都好，到真正見面果陣都會好尷尬， 更加唔洗講有skinship，所以當佢伸手埋黎果陣，我完全唔知點算好，不過諗左陣，都覺得係一種禮貌黎嘅，於是我都同佢握手，亦同佢介紹一次自己：「Hello，我係Michelle啊。」

大家放手之後，Gorden攞左盒朱古力比我，仲同我講：「第一次見面，唔知買咩好，所以頭先係便利店到買左盒朱古力送比你，希望你唔好介意啦。」哇，都幾surprise喔，因為我完全冇諗過佢會送嘢比我，都係諗住第一次見面，大家食一餐飯、傾下計咁就算，佢咁多準備，我都唔知點算好添，如果下次仲有機會見面嘅話，我係咪都要回禮呢？不過冇理咁多，我最後都係收左佢盒朱古力，仲同佢講左多謝。

因為我地見面果陣已經係夜晚7點啦，朝早11點食到依家嘅我，經歷8個鐘之後，個肚一早已經打曬鼓，所以我地冇講咁多嘢，跟住個app，行去我地決定好嘅果間餐廳。

一去到餐廳，我地就睇下餐牌有咩啱食。因為泰國菜都偏辣，所以我就問佢食唔食得辣。原來佢媽咪係四川人，之前有跟過媽咪翻四川探親戚，而佢係屋企平時都會食辣，所以佢完全唔怕泰國嘅辣，覺得兩種菜都好好味。於是，我地就叫左一碟青木瓜沙律、一碟咖喱雞配薄餅、同埋一個生菜包。呢啲都係食泰國菜必叫嘅嘢食黎。

叫完嘢食後，我就攞紙巾出黎消毒啲碗碟同筷子，因為依家疫情啊嘛，注重下衛生都好啲嘅。消毒完之後，我地除左口罩。嗯，Gorden同Omi張相入面嘅完全冇出入，不過依家個頭髮有啲長，有啲唔好睇（我唔鍾意長頭髮嘅男仔）。之後，我攞酒精比佢搓手。佢突然講左句：「你好似一個媽媽啊，咁體貼嘅，咩都準備好。」我唔知佢係讚我定口花花啦，不過我都有答翻佢：「咁依家疫情啊嘛，搓手液係袋入面必備嘅物品黎㗎，有時出到街邊有咁多洗手間比你即刻洗手喔。」佢只係笑笑口。不過睇佢今日嘅裝扮，一個細袋都冇帶，可能只係帶左銀包同電話，其他乜都冇帶，所以應該都係冇酒精搓手液㗎啦。





講起電話，Gorden今朝同我講佢部電話壞左，個screen睇唔到嘢，我都就住呢件事問佢：「你部電話點壞啊？有冇攞去整？」佢攞部電話出黎比我睇，原來佢部電話唔小心跌左落去一盤水到。雖然佢已經即刻攞翻上黎，但部電話已經入水了，所以個screen完全睇唔到嘢，依家係同冇電話用係冇分別嘅。我有啲想笑佢：「你好蠢啊，依家冇電話真係好唔方便，又冇得睇時間，搭車果陣又冇得睇、打機同聽歌。」佢表示超級同意：「真啊，完全唔方便，冇得睇時間都唔緊要啊，我有帶手錶啊嘛。」之後佢show佢隻手錶比我睇，問我平時有冇戴手錶，我話冇，所以唔係好識手錶嘅嘢。佢係咁同我講，佢隻手錶好貴，係大牌子，琴日買嘅，係咪好靚。我都唔知點答佢好。。。因為我最貴嘅手錶都只係一隻G-shock嘅電子錶，仲要已經係幾年前買，所以覺得我地好似有一段距離。