我嘅初戀: 第一次見面（1）

當我收到佢個msg嘅時候，我個心好似停左一陣... 係好緊張好緊張，但我隨即覆佢: 「好啊！不過我下個禮拜一朝早要翻intern，只可以約夜晚食飯，你OK？」因為我同Gorden住嘅地方都相隔一段距離，我又唔想入屯門，叫佢出黎市區又好麻煩。所以我地約左第一次見面嘅地方，係大家嘅中間點 - 紅磡。

距離同佢見面嘅日子仲有3日，我都上網搵下紅磡有咩食，不過有選擇困難症嘅我，睇到一大堆嘢食都唔知可以食咩好，又唔想食太貴，但有時見到其他人comment間餐廳好差，就唔敢去試。一開始Gorden話可以去食日本嘢，但我話日本嘢有啲貴，第一次見面可以唔好食咁貴住（其實係自己冇錢）。最後，我地決定揀左一間泰國菜食。除此之外，我地亦係呢個時候交換左Whatsapp，我地就轉用Whatsapp傾計了。

到見面當日，Gorden一朝早就搵我：「Michelle唔好意思啊，因為我部電話壞左，我依家係用電腦開WhatsApp搵你。如果你放工就同我講，我就出門口。同埋同你講定我今日著咩色衫啦。」哎呀，依家呢個年代，冇電話係一件好難捱嘅事，又難同佢聯絡，我怕到時去到果度，靠omi張相都認佢唔到（因為戴口罩）。不過我都照講我著咩衫去見佢，希望佢到時搵到我啦。

經過大半日嘅intern，我覺得超級攰，講真都唔想搭車入紅磡，最好就係依家有張床比我訓覺，搭車果陣，真係企係到都訓得著。

到左紅磡站啦，雖然以前去過一次紅磡，不過都係細個去紅磡站果度集合，然後一大班人好似鴨仔團咁上旅遊巴，跟團去大陸玩，不過都係歷史了，如果依家有免費機會比我翻大陸，我都唔肯翻去了。講完啲回憶，翻翻黎現實生活啦。可能因為紅磡站係連結西鐵（果陣屯門線仲未開通曬，得一期）同東鐵，所以好多人搭呢條線轉線，果陣又咁啱係放工時間，所以車站入面好多人，我都怕自己會認唔到Gorden。行到去我地約果個出口，我見唔到貌似佢嘅人，再望一望個電話，呢個鐘數佢應該出到黎了，於是我就自己行左出去，睇下Gorden會唔會上左地面。





行行下，突然間有人拍我膊頭。我領轉後面望，有個人向我伸手：「Hello，你係咪Michelle啊，我係Gorden啊，終於見到你啦。」

就係咁，我同佢終於見面了。