我嘅初戀: 我同佢嘅相遇

我係一個大學生，係大學修讀緊好多女仔嘅科。因為自細都係男人堆到生活，小學升中學都係同男仔fd玩多，高中仲係讀理科班，鍾意一大班人，熱熱鬧鬧咁，所以升上大學果陣，好唔習慣一班入面咁多女仔，而且個個都好斯文。久而久之，我嘅性格都從男人婆，變到好靜好靜... 正確啲應該係話變到好摺，完全唔知點同人溝通，好怕識到新嘅人。即使我中學果陣幾玩得、幾嘈都好，因為我家教好嚴，所以我好多男同學都fd zone左我。當我以為上到U，可以享受「大學5件事」嘅其中之一 - 拍拖 嘅時候，偏偏因為變到好摺嘅性格，令我去到final year都仲係A0。

係21歲嘅生日果年，我down左一個叫Oxx嘅交友App。果次係我第一次用交友App。其實都幾驚，因為成日聽身邊啲人講，交友App好多渣男，只係搵Sp / FWB, 小心我比人食左。我都驚，但因為怕Grad後都繼續A0，所以都膽粗粗down左黎用。

係用Oxx嘅呢半年（其實都冇，中間有幾個月時間因為學業而Del左），我斷斷續續都同左超過20個男仔傾（算多？因為自己好少睇，諗住同每個男仔都傾耐啲先），但又因為自己好驚識新人、唔識開話題、自己對自己冇自信等等... 加埋加埋，真正換到其他聯絡方法嘅，其實都只有4個，而我嘅初戀，就係第四個。

「Hello，你好啊，我係Gorden啊，你叫咩名啊？」