【校園】【愛情】A0毒男的愛情史: 【一日同居】

【今日靈感極佳，連出兩篇，不過都係要抖抖先。】

同一日晚上 。

「死仔，幫我落去買兩包米。」阿媽無端端走入房同我講。

可惜嘅係我帶著耳機上網聽歌，陶醉在音樂上，絲毫冇聽到命令，接著頭部忽然受到老媽子嘅拳頭重創。

我把耳機掛在脖子上，用手掌不斷按摩著受傷地方「咩事吖，無啦啦旭手打人。」





「幫我落去買兩包米。」

「唔去啊，你個仔我呢兩日發生好多事同埋處理咗好多事，好攰啊。」我發牢騷。

「好啊，唔去嘅話你今晚食空氣啦。」幹，要挾，你是冰女王二號？

「去，邊次唔去啫，你個仔我咁乖係咪。」

「啲錢喺飯檯，自己拎。」阿媽講完就翻咗入廚房。





我找了件外套披上，穿上拖鞋便去惠康買米。

過程唔多講，買咗兩包五公斤嘅金鳳牌米，獨自一人托回來。

只不過返屋企個陣又有故事發生。

夜間寒風凜冽，即使身穿外套的我也冷得要死。

快要回到管理處的我，在遠處看到了一個熟悉的身影，而且還穿著本校的校服坐著。





我雙眼一瞇，試圖將視野收縮，從而看得更清楚到底是何人。

不過因為距離太遠，我也看不清楚，只好親自走過去查看一番。

「啊晴，你坐喺度做咩。」我問道。

「你喺度嘅。」

「幫阿媽手買嘢。」我舉起手上那兩包米。

「咁孝順嘅，咳咳。」

「你著住校服唔返屋企嘅。」

「我鎖匙留咗喺學校，學校鎖咗門，咳咳。」





「咁你屋企人呢。」

「阿爸佢今日去咗大埔探阿爺，唔返嚟。」

「今晚咁凍，你自己一個人都唔係辦法㗎喎。」

「咳咳，邊個叫我咁蠢漏低鎖匙喺學校。」

「不如你上嚟食飯囉，多個人阿媽佢應該都冇所謂嘅。」

「咁點好意思啊，麻煩到伯母。」

「無緊要啦，有咩事我孭，最多畀人鬧一兩句。」





「但係...」啊晴佢非常猶豫。

「行啦，唔通你真係諗住瞓街咩。」我拖起咗啊晴隻手。

「...」啊晴沉默跟住我行。

……

返到屋企。

「死仔，我叫你買米啫，冇叫你順便買埋個女仔返嚟喎。」阿媽哭笑不得。

「唉，得啦得啦，加鎹啊今晚。」我趕緊打發阿媽走。

「咳咳。」啊晴佢應該凍親。





「啊晴你去梳化坐住先，我整杯薑蔥水過你。」說罷我便走到了廚房。

「嗰個女仔邊個嚟㗎。」果然係自己阿媽，八卦程度就是不一樣

「同學。」我開始準備煲水，切薑，蔥白。

「同學？我從來都未見過有人夜晚晚會帶女同學上嚟自己屋企。」

「佢冇帶鎖匙，屋企冇人，返唔到屋企，我返嚟咁啱見到，咪叫佢上嚟囉。」

水煮滾之後，加入薑，小火煮5分鐘，再將蔥白放入水入面，關火谷一分鐘，最後拎走蔥和薑便大功告成。

裝好薑蔥水走出去時，啊晴坐在梳化瞇著了。





這女孩...身形翩若驚鴻，容顏清秀，眉宇間有種淡雅的感覺。

「你咁樣瞓喺人地屋企點得㗎，畀人食咗你都唔知咩事。」我暗道。

「啊晴，啊晴，醒一醒。」我用手背敲打著啊晴肩膀。

「唔...」啊晴剛剛被喚起身，還沒有完全張開雙眼。

「飲咗碗薑蔥水先，可以驅寒止咳。」

「多謝你。」啊晴莞爾，臉上還有小酒窩。

媽的，這女孩到底為什麼這麼有魅力，僅僅一笑也能夠衝擊我的小心臟使其撲通撲通，我怕有天真的按耐不住，做出連自己想不到的事。

「過嚟食飯啦。」阿媽說。

「啊晴有咩食咗飯先再講。」我埋位。

「...」她點頭。

「普通家常菜，靚女唔好介意啊。」阿媽說。

「唔會，唔會，你哋肯請我食飯已經好感激㗎喇，點會嫌三嫌四。」啊晴說道。

「真係有家教。」阿媽還向我的方向不屑看了一眼。

「你同圓仔係同學？」阿媽問。

「係啊，同一班。」

「哦，咁佢喺學校點啊，有冇麻煩到你啊。」阿媽又問。

啊晴先看了看我，我瘋狂眨眼表示「拜託別把我在學校的行為說得十惡不赦，無惡不作。」

「圓仔佢喺學校都幾乖吖。」多謝你。

「個死仔竟然！？」阿媽聽到佢意料之外的答案。

「你個仔我不嬲都乖㗎喇，係你成日覺得我無惡不作。」我附和。

「咁即係上年家長日老師講嘅全部都係大話啦。」阿媽說。

「唔係大話，只不過係佢誇大咗嘅說話，同事實有所出入。」我說。

「咔嚓~」門外穿來鎖匙聲。

這時間點，我大致能夠想象來者是誰。

「砰！砰！砰！」防鎖盜與木門的碰撞聲。

「開門啊！你林家閨女返屋企喇。」這聲音果然係家姐。

由於我地理位置靠近門口，理所當然係我開門畀家姐。

「家姐無端端返嚟嘅。」我一手拉開防盜鎖。

「我掛住你嘛。」整身酒氣的家姐抱著我。

「喂呀，你好大陣酒味啊。」我一臉嫌棄。

「家陣反叛期啊，開始嫌棄家姐喇。」家姐已經開始胡言亂語。

「阿媽，幫幫手，林家鈺條友又飲醉咗，一陣佢發酒顛我管唔住。」我大喊。

阿媽聽到二話不說走過來幫忙，因為家姐佢每次發酒顛，屋企都會變到七國咁亂，然後執屋嘅永遠都冇搗亂者份。

「我冇醉啊，我不知幾清醒。」喝醉的人永遠都覺得自己是神智清醒。

「係係係，你冇醉，我轉頭拎酒同你繼續飲。」當然是謊言。

「飲，好啊，今晚不醉無歸。」矛盾，第一，你已經歸家了，第二，你已經醉了，呵呵。

我同阿媽夾手夾腳抬佢去梳化瞓低，仲幫佢整咗條熱毛巾敷喺額頭上面，試圖令酒氣消退。

「圓仔，又話飲酒，酒呢。」家姐說。

「得啦，你瞌一陣，一刻瞌醒就會有酒飲。」我說。

「你呃我， 同嗰個衰人一鬼樣。」家姐流淚。

「冇呃你，你瞓醒就有酒飲㗎喇。」我說。

「真係？」

「幾時呃過你。」

……

唉，好彩啫，屋企差啲又變戰場喇。

我行返去食飯，阿媽先打破尷尬場面。

「唔好意思啊，畀你見到啲咁嘅畫面。」當然是對著啊晴說。

「唔緊要，不過你姐姐好似喊得好犀利，唔會有事掛。」啊晴擔心。

母愛就是這一回事嗎，你到底還有多少優點。

「哦，冇事㗎，久唔久半年就會發生一次呢啲事。」情傷嘛，對於家姐這種大美人而言，我已經見慣不慣了。

……

食完飯過後，啊晴畀阿媽捉住係咁傾計。

而照顧家姐的重任竟然莫名其妙落在我手中。

當然唔少得爭搶著洗碗的情節。

「姨姨，我嚟喇，話曬我都黐咗一餐飯食。」

「唔好，唔好，過門都係客，點好意思呢，等姨姨嚟。」

「...」大概爭執了五分鐘？十分鐘，都係一個時間啫，爛作者唔係記得幾清楚喇，總之就係非常搞笑。

我也沒好氣走到兩人中間「爭夠未啫，兩個都同我坐低，我嚟洗碗，麻鬼煩，爭咁耐啲碗都一早洗完。」可能是因為在家裡沒有太多外人？我的語氣跟在學校折然不同，多了一份氣場。

兩人都被我氣場所鎮壓到，坐下互相聊起天來。

洗完碗後，還有一個大麻煩存在，醉酒的家姐－林家鈺。

「家姐啊，今次又係邊個仆街搞到你喊成咁。」我把家姐頭上得熱毛巾重新弄熱。

一小時後。

「唔...圓仔？發緊夢？」家姐迷迷糊糊地說。

「發你個死人夢，你喺屋企啊。」我用力搣家姐塊面。

「痛...痛...痛...」家姐一手撥開我。

「有冇水，我依家酒精中毒。」家姐說。

「嗱，喺度。」我把水杯遞給她。

家姐佢從躺著變回坐姿，大口大口地喝著。

「今次又點樣，邊個衰人搞到你喊。」我問。

「唔好提，我唔想諗起佢。」

「okay，我收聲，有咩事再叫我。」

家姐拿起手機不斷敲打著熒幕，應該是與她的朋友訴苦。

我也不打算深入了解，反正她這麼大個人，自己懂得處理。

「啊晴，你使唔使沖涼。」我問。

「我冇衫換。」啊晴一臉不好意思。

「拎家姐啲衫同毛巾咪得，我去拎畀你。」

「咁麻煩曬。」

……

(想睇闖入沖涼劇情？我都想！不過我都冇睇過！可惡！應該特登去發生啲意外，造就不可抗力，咁就...嘿嘿)

啊晴佢著住家姐套棉睡衫褲，頭髮濕透，脖子還散發著洗澡過後的蒸汽，我仿佛看到仙子般，目光移不開。

啊晴被一直盯著也感到害羞，便問道「我套校服擺喺邊度好。」

阿媽搶著回答「拎嚟喇，我幫你擺好佢，你哋聽日仲要返學㗎嘛。」

「咁麻煩姨姨你喇。」啊晴說。

與女神以及暗戀對象住在同一屋簾下，難免會出現一些意外。

例如生理反應，我察覺到自己弟弟佢有反應，我就即刻衝咗入房鎖門，不過冇例行公事，家陣屋企有三個女人，畀人聽到有聲仲得了，我身邊嗰個唔係我包養緊佢嘅女神，任何有損形象嘅嘢我都做唔出，所以只好心無雜念等弟弟佢自然消退，不過合上眼睛後，腦海中全都是啊晴的樣子，看來我的小船已經沉得比鐵達尼號還要深。

半小時後。

「咚咚咚」門外傳來敲門聲。

「邊個。」我明知顧問，呢個時間點阿媽佢一早瞓咗教，家姐仲沉淪在傷痛中，那麼就只有一人。

「我啊。」啊晴說道。

「咣當~」我打開門鎖，當然弟弟也消退了。

「有事？」

「我唔知我應該瞓喺邊到。」啊晴說。

跟我一起睡吧，當然我沒有勇氣說出口，這種被當成癡漢的發言，免了免了。

「瞓家姐間房就得，睇林家鈺個款佢今晚都唔會瞓同佢啲朋友傾成晚唔瞓。」我說。

「...」啊晴仍然站在門外。

「仲有事？」我問。

「我想參觀下你間房得唔得。」

「冇咩好睇咋喎。」

我將房門全數打開「自便。」

啊晴佢四處張望，我房間也沒什麼值得自豪的，應該是整潔加分吧，一堆雜物被我擺放得亂中有序，呵呵，有一個大玻璃展示櫃，裡面放滿御宅手辦和旅遊相片，另外就是碌架床 ，下層是電腦檯，上層用作睡覺，外加一個從滿家姐衣服的衣櫃。

簡單樸素，墻壁以白色為主題，燈光可以轉黃色和白色。

「我都係第一次參觀男仔房，估唔到比想像中整齊。」啊晴說。

第一次！？「你聽邊個講男仔房會好亂。」我說。

「靖欣同曉彤佢哋話男仔房七國咁亂，行步路都難。」

「唔會掛。」

「你仲未瞓㗎呵，難得有咁嘅機會，不如傾下計算吖。」

「你想傾咩。」

「咩都傾下囉。」

「咁啊，不如玩住UNO傾囉。」我從玻璃展示櫃找出一盒UNO。

「好啊，我都好耐冇玩過UNO。」

……

「吓，即係張靖欣暗戀邱君豪(Andy)！！」我驚訝。

「喂呀，你唔好咁大聲，見係你先至講咋。」啊晴說。

「哦，Sorry，不過真係睇唔出。」

「睇得出就唔叫暗戀啦，你都傻嘅。」啊晴用手指在我太陽穴推了一下。

雖然有點痛，不過幸福感佔據了更多，況且我嘴角也不禁上揚。

「咁你覺得佢哋有冇可能啊。」啊晴再問。

「唔...」我托著下巴「我覺得有機會，我未聽過豪哥佢有意中人，如果張靖欣主動啲㗎話，話唔定會一拍即合。」

「哈哈，咁等我聽日返學叫佢主動啲先。」

「喂，圓仔，我入嚟拎衫。」家姐在門外說。

家姐打開門看著我與啊晴兩個坐在地上「唔好意思，打搞曬。」接著便緩緩關上房門。

「打個你頭搞曬，入返嚟拎衫喇。」我向門外大喊。

「冇阻住你兩個咩。」家姐說。

「傾計啫，有咩好阻住。」我說。

「啊晴我想借一借我細佬嚟用，得唔得，好快，五分鐘就得。」

「冇話借唔借嘅，傾咗咁耐，我都係時候瞓教，你兩姐弟慢慢傾。」啊晴接著在我耳邊又說「你都早啲瞓，聽日仲要返學，早抖。」說罷便走到家姐間房了。

「早抖。」我看著她背影說道。

「掂喎o靚仔，咁快追到人，屋企都帶埋上嚟，記住你未夠稱㗎，咪亂嚟啊。」家姐一拳打在我心口。

「仲未追到。」

「咁依家係...」家姐非常疑惑。

「佢冇漏低咗鎖匙喺學校，屋企咁啱好冇人，見到佢咁慘咪唔忍心囉。」

「話唔定人哋屋企係「被」冇人呢。」家姐露出奸笑嘴臉。

「乜嘢「被」冇人，家姐你up乜。」

「冇嘢，聽唔明就算，不過見佢對你嘅態度都唔差吖，應該有機會，加油啦。」

「收啦你，扮曬情場高手，頭先係咩事啊，啲眼淚假㗎。」

「細路仔唔會明㗎喇，好好珍惜你喺中學嘅生活啦，記住唔好畀自己有咁多後悔就得。」

「拎你嘅衫啦，咁多嘢講，走個陣記得熄燈，我都要瞓喇。」

「死仔包，一啲都唔可愛。」

今晚，應該會發一個好夢。

未完待續……