【校園】【愛情】A0毒男的愛情史: 【巧遇午膳】

「叮噹叮噹~~叮噹叮噹」美妙的鐘聲響起表示時間已經到了中午放飯。

「喂，各位食咩好。」我哋正在面臨全世界最大同時也是最困難的問題---中午食什麼好。

「食大家樂囉。」force提出。

「你懵咗吖，琴日咪食完囉。」Andy反駁。

「咁食咩啊，你諗喇。」force說。



「商場個邊最近咪開咗間新餐廳，你各位不如就去試下伏囉。」我提出。

「妖你，咁不如去食大家樂。」force說。

「你真係食唔厭㗎喎大家樂。」Andy說。

「冷靜兩位，說話唔好咁樣講，做人點都要有啲新嘗試㗎嘛，食古不化就死得啦。」我說。

「...」最後他們兩個都同意我的意見，懷著試伏的心情走起。



「港原味」這三個字就是這家餐廳招牌，一開始見到呢間餐廳個陣笑到傻，同音字講完未。(令我諗起YouTube某條片講一個人送貨同保安嘅搞笑對話。)

「唔該3位。」我拿位子。

「麻煩掃咗安心出行先。」前台接待說。

「寫紙吖唔該。」我對她說。

「喂，jim幫手寫埋。」他們兩個同時說。



「頂你班死懶鬼，唉得啦得啦。」我歎氣。

快手搞掂之後，量埋體溫就有人帶我地入去。

「唔好意思三位，依家中午繁忙時期冇咩位，你地介唔介意搭下枱，如果介意嘅可以等下，要5分鐘左右。」帶我地進來的工作人員說。

「點啊，等定唔等。」我望向他們兩個。

「冇乜時間喇，我哋搭半就要返到去，無所謂喇。」force說。

埋位嗰陣我驚訝了，由於係六個人嘅卡位，我哋撞正班花三人組喺正對面，其中一個還是我暗戀了多年的女生--汪芷晴Yuki。

「小姐，唔好意思，麻煩你哋搭一搭枱。」工作人員說。

隨後我們三位便坐下了，氣氛有些尷尬，她們3個平時雖然係同一班，但冇咩交集，冇辦法，咁佢哋女仔鐘意咩韓星、星座、講八婆嘢， 都根本冇可能傾得埋。(我冇任何歧視以上嘅行為，只是單單陳述事實。)



出生社交能力點滿的Andy先打破沉默「咁啱嘅，你哋都嚟試新餐廳啊。」不虧是Andy，面對任何場合都從容不迫，我心底暗中佩服。

「係啊，見佢最近新開張，咪過嚟試下好唔好食囉，依家仲有學生優惠九折。」啊班花Amy微笑回應。

「哦，咁你哋叫咗嘢食未，我想睇睇個餐牌有咩好食。」Andy說。

「我哋叫完㗎啦，你地慢慢睇。」Amy邊說邊把餐牌遞過來。

「唔該。」Andy禮貌回應。

而我只能夠坐在角落裡瑟瑟發抖聽他們說話，一來我的社交水平為負數，應該開完口就會直接dead air，二來是因為我過分內向的性格，面對著不太熟悉的人無法好像平時健談，因此我只好安安靜靜地坐著玩手機game。

「誒，你都有玩呢隻game啊。」Yuki對著我說，Yuki她是3E班上的焦點，為人性格開朗活潑，無論是男生，女生跟她都能夠玩在一起。



「...」我被她突如其來的問題所嚇到，腦袋暫時時間變得空白一片。

我玩的手機遊戲是叫做「皇室戰爭」是一款塔防遊戲，雖然好像很簡單，但卻需要經過種種的計算，思考，以及出戰的八張卡牌它們的互補性，也算是一種訓練大腦和心態的遊戲，為何要說它能夠訓練心態，因為你會經常被氪金大佬的滿等級卡牌虐成智障，毫無還擊之力。

先把話題拉回來，剛剛Yuki問完我問題，我還沒有回答她，氣氛一度冷落了下來。

「原來Yuki你都有玩皇室架，對於女仔嚟講好少會有。」Andy跳出來救場。

「係啊，不過我玩得好渣成日輸。」yuki說。

「係喎，jimmy佢玩皇室都幾勁架，有成5600杯，你可以叫佢教下你點樣玩。」Andy成功將話題完美地掉給我。

「唔...你有咩唔明嘅都可以問下我。」我鼓起有機會dead air 的勇氣對著Yuki說。

「哦，好吖，你加咗我WhatsApp先啦，我遲啲問你。」Yuki把手機號碼給我。



就這樣機緣巧合之下，我成功得到了我暗戀對象的電話，果然今天來這家餐廳是正確選擇。

「你哋諗好食咩㗎喇可。」Andy對我們說。

我舉手Ok，force 點頭，男生的簡單語言。

「唔該。」Andy舉手要叫嘢食。

「要個常餐B 腸仔 沙爹汁，凍檸茶走甜。」Andy下單。

「欵...要個吉列豬扒 腸仔 白汁 熱奶茶。」我下單。

「椒鹽豬扒飯，凍檸茶。」force 下單。



「靚女呢。」 侍應問埋佢哋。

「哦，我哋頭先落咗單喇，唔該。」Amy說。

十分鐘後，一名外表清秀的女生捧著餐盤過來認真仔細一看我還非常熟悉這個人。

「誒?細佬你喺到食飯嘅。」我家姐說。

「家姐你點會係到返工，唔洗返學咩。」我說。

「哦，大學個邊冇堂，咪嚟返下part time，揾下零用錢。」家姐說。

「喂圓仔，你睇上咗佢哋邊個呀，想追人嘅等家姐教你兩招啦，一定有用。」家姐係我耳邊用氣音說。

「...」我狠狠盯著她，示意叫她不要多嘴。

「咁你慢慢食，記得唔好遲到就得，今日我翻屋企食飯，幫我同啊媽講。」家姐說罷便去另外一檯工作了。

「你幾時有個咁靚嘅家姐架，從實招來。」他們兩位同時問我，眼神還很嚴肅帶點殺氣。

「係囉，你家姐真係靚到冇話符。」女生們也成功加入話題。

「你想我講啲咩，我家姐住hall，一個星期得一次半次翻屋企，你哋冇見過都正常。」我作答。

「喂Jimmy，想問有冇你家姐IG。」Amy問。

「佢淨係用私人賬號架，你哋應該加唔到。」我回答。

這餐飯在聊聊上課日常和諧地度過了。