【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 34
「係囉，又會咁橋嘅?」佳少不懷好意的說著
凱婷留意到自家門口一大片紅油漆，整個人沉下來握緊雙拳，一腳踢向鐵閘，隨即立刻高喊「錢卓鏗! 你又嚟?」
「一場嚟到唔請我入去你屋企坐下?」佳少雙手插袋，嘴角微微上揚。
「喂，世伯。你好彩呀，我同你個女好friend㗎，你筆數比你遲多幾日。」佳少刻意高聲喊着
厚重的木門緩緩被打開，穿著白背心的邋遢頹廢大叔從門縫中偷偷探頭出來「真係嘅?」
「梗係啦，有咩開門先講。」
凱婷咬緊牙關，垂下頭一言不發，自己的老爸此刻像一隻毫無尊嚴的小狗，快步收拾桌上的報紙馬經，由來回走到廚房斟茶遞水。
佳少當作自家般，周圍翻揭抽屜，整間屋只有簡陋的一張碌架床，普通的梳化和書枱與一部陳舊不堪的舊式電視。
「部電視古董嚟㗎喎，呢個年代仲有呢啲嘢㗎咩?」 佳少同行的兩人坐在梳化上說著
「係呀唔舒服咪走囉。」凱婷坐在自己的床邊，佳少隨即坐在他旁邊，伸手拿著床頭的一隻芭比娃娃。 「婷姐，咁有童心呀?」
凱婷一手奪回接著說道「你究竟想點呀?」
「點可以咁樣同你講嘢! 對唔住我個女係咁。」 凱婷老爸把些薯片啤酒和剛才沖好的熱茶放在桌子上 。
「點講嘢唔好呀而家? 你又爭人哋幾多呀。」
「一餅嘢啫。」 佳少輕輕說著
「十皮? 你究竟想點撚樣?」 凱婷怒吼著
「好小事啫，對老豆講嘢咁樣㗎咩。」佳少拿起香煙「嗱，世伯。見你個女同我咁friend，打個折頭畀你都仲得。」
凱婷老爸連忙從褲兜中拿起打火機，幫他點起香煙。「咁…咁樣點得呀。」嘴角卻已經不自覺上揚。
「我出街先，唔阻你哋年輕人慢慢玩呀。」 凱婷老爸拿起鎖匙便離開
佳少拿出手機便說著 「話說你而家好紅喎。」螢幕裏的是他們探靈時的影片。
「我仲要搵到你個friend嘅IG，原來佢有錢仔嚟嘅，唔怪得啦…而家啲人咩都放上網，佢住嗰頭私樓嚟㗎喎，又成日去呢間Bar…」
「早啲講吖嘛，呢間bar老細我識得喎，我可以幫佢打個折頭。」
「你究竟想點?」凱婷開口問著
「上次單嘢就唔同你計…前題係…」佳少意味深長的說
余程天在自己房間，在檯燈的照耀下埋頭細心注視一支細針，顫顫抖抖的雙手，穿過毛線中的小洞。
「呀!」余程天看著指頭出血，輕輕舔了一舔。
「天仔，出嚟食飯啦。」工人姐姐在門外喊著
客廳的大圓枱，只有兩張椅子，工人姐姐與余程天在當中的一個吃著普通的三餸一湯。
「蘇菲，你覺得呢條圍巾點樣?」 余程天拿出有著三尖八角的雪人圖案的頸巾
「送畀女仔㗎?」工人姐姐會心一笑
「答咗我先啦。」
蘇菲看一眼他貼著膠布的雙手「如果我後生有男仔送畀我，我會好開心。」
「即係唔靚啦…」余程天苦惱的看著圍巾。
蘇菲搖搖頭一笑「我之前社區中心嗰度識咗個姑娘，佢織嘢好叻㗎。」
「你睇下佢幫唔幫到你。」蘇菲拿起手機便找尋他的聯絡簿。
「但係我後日就要…常小姐?」余程天看著聯絡人的頭像猶為面熟。
「我幫你問下啦。」蘇菲摸一摸他的頭，隨後收拾好自己的碗筷。
余程天飯後拿起手機，一條信息彈出，凱婷社交平台有新貼文。
他輕輕點開「嗰個係…」翹起的二郎腿放回地上。
余程天仔細注意貼文的背景，貌似是一張床，凱婷與佳少在床邊的合照，內文寫著「不計前嫌」加上一個愛心符號。
他點開私信，猶豫了片刻…
「在忙嗎?」一條信息彈起
凱婷坐在床上，愁眉苦臉的弄著自己的手作，總算是完成了，她拿起手機，見到是他的訊息，立馬曲起雙腿。
打了數隻字後又緩緩剷除，最終只傳了一個「?」
余程天仔細琢磨著自己的字，想要問卻不敢那麼直白。「見到你個Post，你而家同緊佢一齊?」
凱婷在被窩中輾轉反側不斷思考怎樣回答，幾許後。
「唔係，各種意義上。」
「搵我有事? 」
余程天放下了懸起了的心，緊張的繼續打著「你後日得唔得閒?有啲嘢想搵你幫手…」
後日便是七夕，凱婷固然知道，只是…「呢幾日夜晚李彤都要去補習，你可能要等佢補習完。」
余程天打了白痴兩字又刪除了「咁你嗰日得唔得閒?」
「勉為其難…幫下你啦。」
佳少:「聽日見，婷姐。」另一條信息彈出，凱婷忐忑的看著自己親手做的錢包。
余程天同一時間受到另一條短信 「Hi，我聽日得閒呀，中午過嚟酒吧好唔好?」
滿心歡喜看著自己編織的圍巾，徐徐回答「OK!」
翌日，余程天帶著圍巾來到了彼岸花酒吧。
「估唔到竟然係熟人。」 余程天拿出了圍巾。
「你已經織曬呀…要重新拆過曬…你可能唔夠時間整。」 常日羲看著那條圍巾說著。
「錯咗就冇辦法返轉頭，除咗全部重新嚟過。」她指著沒縫好的地方說
同一時間凱婷獨自前往昨天的手作工藝店，找了個位置繼續弄著那個禮物，直至完成作品的那一刻，她才驚覺原來已經過了一整天，看著明媚的夕陽，深深吸了一口氣。
她打開手機，「在哪?」佳少的訊息打斷了這美好的心情。
充滿煙頭的後巷，牆壁立著一張不顯眼的海報，這裏有部舊式電梯，凱婷走進其中，電梯到了十四樓緩緩打開大門，面前時雨電梯一樣狹窄的空間，地上放滿一箱箱啤酒。
電鈴按下後，不顯眼的大門被打開，瞬間響起某人歡呼的聲音。
凱婷盯了一眼，除了佳少那群人外，酒吧內還有五六名與自己年齡相仿的同性，正圍坐在一群猜枚。
「飲返杯先啦，婷姐。」佳少遞了一杯酒給她。
「嘩，今日著到咁密實做咩呀，信咗伊斯蘭教呀?」 佳少搭著他膊頭便拉她一起坐下
凱婷接過酒杯，凝視著酒面淡黃的色澤，熟悉不過的酒今天格外苦澀。
「考慮成點呀?」佳少輕輕一笑
凱婷把酒一飲而盡，緊緊握著手袋裏頭的手作禮物…
「唔好意思，我點都唔會做你條女，之前得罪你嘅我再飲多杯。」凱婷出奇地客氣的說著
「之後你鍾意淋佢紅油又好，淋屎淋尿都好，唔關我事，我走先。」
毛月永一直在打掃著空無一人的酒吧，直至余程天離開後，他才緩緩開口。
「你仲咁得閒教佢織頸巾……」
常日羲淡淡說著「係啦，我幫手拖地啦。」
毛月永停下手頭上的動作「我唔係講呢樣。」
「時間差唔多，上面批咗。」毛月永拿出了數張新的死亡名單。
按照時間排列，劉世檜的名字再次出現浮現在名單中，排在第二的位置，並且特別標註:死因:特殊處理。
常日羲忽然憶起往事「我哋係咪做咗當年……最討厭嗰種人?」
「我哋已經唔係人。」 毛月永淡淡回覆