【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 33
某幢公屋樓下的公園，佳少漫不經心地吹著煙圈，直至看見旁邊巴士站小心翼翼下車的孕婦，他才隨手掉低煙頭，走向巴士站。
佳少走近孕婦，有些不耐煩從衫袋內遞出一封信封「呢度五千蚊，得咁多。」
孕婦無表情的收下「以後我哋冇挐冇掕。」
「啊玉，唔使咁絕情呀，傾多兩句呀。」 佳少嘴角微微上，佛牌當中的鬼靈卻在躁動，瞬間現出原形，在一旁惡惡狠狠的盯著孕婦的胎兒，似乎對他有非比尋常的怨恨。
與此同時，佳少注意到她手頭上的蛋糕盒「你咁樣仲食蛋糕?」
「唔係我。」孕婦輕輕回應
「係喎，今日係你死鬼家姐忌日。」鬼靈越發靠近兩母女，啊玉頓時感到身體有些不適，頭痛想嘔。
「唔該你尊重啲佢。」啊玉嚴肅的回應，正當她雙唇發白，感覺要倒下的時候，後方有人一把手攙扶著她。
「冇事吖嘛小姐。」藝術家大叔左手扶著啊玉，右手拿著一袋裝滿畫筆的膠袋，四處張望之後徐徐說著「扶你過嗰邊坐下先，慢慢呀。」
「唔該曬你……」啊玉弱弱一笑，鬼靈在他們身邊蠢蠢欲動。
當她在公園坐下休息的時候，佳少用力拉起他衣衫「死肥佬，點解你又會喺度，你跟蹤我呀!?」
藝術家大叔打量他全身，摸摸他衣衫，隨後緩緩把手摸著他胸前的佛牌「係囉又會咁啱見到嘅，幾型呀你呢身裝扮……」
鬼靈感到被冒犯隨即把兇惡的眼神移到他身上，藝術家大叔依舊在談笑風生，忽然一把手用力捉緊佛牌。
「呢啲嘢冇咩用㗎，孽隨身報，多多都擋唔住……」 話音剛落之間，上一秒想要出手的鬼靈，下一秒隨著大叔雙眼露出剎那綠光，瞬間灰飛煙滅，佛牌在大叔手中亦隨即碎裂。
「冚你個……你整爛我個佛牌!」 佳少激動的幾乎面貼面靠向他
「係囉，又會咁脆弱嘅，掂一掂就碎。」 藝術家大叔依舊笑著說「咁啱返工成日見到你啫，唔使下下都咁緊張。」
「佳! 算啦，停手。」啊玉勸著他
「你又執返條命啦，死肥仔!下次出街小心啲。」佳少漸漸遠去
「你都係，之後出門口都要小心啲，記得抬頭望下個天。」藝術家大叔似笑非笑的回應。
「你都係唔好惹佢好啲……佢黑社會嚟。」啊玉好言相勸
「唔驚啦，爛命一條，係呢，點稱呼?」
「姓鍾，頭先好彩有你扶一扶我，如果唔係跌親可大可小……講起上嚟今日都遇到幾多好心人。」
「咁啱嘅我都係喎，鍾小姐，放心啦你個bb一定會安全出世，不過單親媽媽唔易做。」
「你點知我係單親媽媽? 」啊玉依舊淡淡地說著
藝術家大叔豎起食指和拇指，作了一個L形「90度。」
「……直覺。」
啊玉臉上漸漸泛起了笑容，藝術家大叔接著說「笑下咪好囉，多啲笑先對bb好。」
「我頭先見到你，點解你要避開? 你想去邊呀?」 鍾隨心不斷在街上跑著
不知不覺中來到了公園前，她定睛一看，眼前的孕婦尤為眼熟「我頭先居然認唔出……」她淚水無聲地滑落。
「又踢我~而家返屋企喇我哋好唔好?」 孕婦站起來與自己擦身而過，一瞬間鍾隨心眼神中透露出一絲悲喜交織的情感。
一隻黑貓出現，打斷了她的思緒「睇嚟你啲記憶返曬嚟，係咪呀?」
鍾隨心驚訝回頭，黑貓繼續說著「果然你喺佢身邊，靈魂都修復得七七八八。」
鍾隨心正想說點什麼的時候，黑貓再次跑遠「……等陣呀!」她再次提腿追趕。
劉世檜剛表露心聲後的早上，起來的他看見桌上的信件，沒有多說什麼，只是把它放在抽屜裏。
「冇反應嘅你唔驚佢走咗唔返咩?」李彤嘴角輕輕上揚
「佢既然話咗會返嚟，咁就一定會。信任OK?」 劉世檜回答
「差啲唔記得問你，你個friend鍾意乜嘢?」李彤打開了手機筆記簿
「余程天? 佢應該鍾意打籃球…Kobe…飲酒… 你哋要送禮物呀?」劉世檜輕輕一問
「有冇啲物質少少嘅? 即係會攞嚟送畀人嗰啲呢。」李彤眼神有些茫然忽然又逐漸變得專注「定係你試下通靈Kob…」
還未說完便被他打斷「大佬呀你唔好咁痴線啦。」
「叫凱婷諗下有咩連埋禮物畀佢好過啦…情書呀之類…」
「硬係要講佢鍾意啲咩…迪士尼嗰啲卡通人物囉，你睇個樣唔覺但係條友好鍾意迪士尼㗎!」
「之前佢睇完冰雪奇緣2，嗰個禮拜係咁喺我耳邊唱Into啲銀窿。」
李彤到走廊穿起鞋「係呀，我今日約咗凱婷去諗下整咩，過兩日七夕吖嘛，你要唔要都過嚟?」
「唔使預我，我要打機，好啦拜拜。」劉世檜話畢便關上門。
留下李彤一個在走廊處，她無奈的歎氣一聲「唉，佢一走咗又打回原形。」
某間工廈酒吧裏頭，一群人圍坐在梳化上煙酒交集，桌面還殘留少許白色粉末。
一個平頭的年輕人眼中充滿血絲，面露笑容「佳少，仲有冇啲勁啲?」
「你開到聲一定有㗎，嚟緊仲有隻新嘢添，不過就唔係畀你食嘅。」 佳少眼尾看了一眼坐在一旁的那群MK妹。
一個中年健碩的男人走進酒吧「喂，啊佳有嘢要你幫手。」
「呢條數拖咗好耐，幫我搞搞佢。」
同一時間，李彤與凱婷在某間咖啡館内，商量著要製作什麼禮物。
「爆炸盒…但係而家週街都係…同埋好唔實用喎。」凱婷埋頭苦惱思考，看著窗邊街道上人來人往的行人，剛好看見一位女士被撞跌了手袋，包裏東西都被撞跌出來，凱婷
茫然凝望她匆忙的收拾過程，視線注意到地上的錢包…
「係喎，銀包! 送個手工嘅好畀佢好唔好?」
李彤飲著手上的咖啡，聽到這個建議覺得不錯，隨後的下午時間，兩個女孩手裡拿著清單，在街上尋找製作手工禮物的地方和材料。
她們來到一家手工藝品店前，開始四處搜索，手拿著各種材料，仔細挑選每一種顏色和紋理。
李彤為她提供配色的意見，最終在草圖上簡單擬定了告白禮物的草稿。
手工錢包用籃球顏色的橙色作為主調，加上黑色的紋路，而裏頭灰白色底色，偷偷畫一隻雪寶圖案，把情書內容寫作一段訊息，然後列印成QRcode的紙張放在錢包裏頭…
「不如再加多張Kobe閃卡?」 凱婷越想越起勁，拿起手機便搜尋起來「上網一百蚊有一張喎，但係你知唔知有咩唔同…?」
「大佬呀你唔好咁痴線啦。」李彤模仿著早上劉世檜的語氣
「諗下有咩心意連埋禮物畀佢好過啦，例如你哋嘅合照之類嘅呀。」
「合照…我同佢邊會有咩合照…」凱婷翻找自己的手機相簿，視線停留在其中一張相，兩人穿著浴袍在酒店時隨手的自拍。
「過嚟…!」李彤忽然一臉緊張拉著她到貨架後，示意她不要出聲，用口型說出四個字「 余程天呀」
兩人探頭在貨架後偷偷觀察，看著不知為何會出現在這裏的余程天，他擾攘數分鐘似乎在仔細地挑選著什麼，待他走到收銀處面前。
凱婷悄悄聲問道「佢過嚟做咩?」
「睇唔到佢買啲咩…」李彤矇起雙眼注視著收銀檯前的東西。
待他走遠後，凱婷鬆一口氣「嚇死我，咁都會撞到佢。」
「佢會唔會同你諗嘅一樣，想七夕同你表白?」凱婷有些陰沉說著
李彤轉頭看著凱婷安慰她道「係都唔緊要，反正我都唔會接受。」
「唔好放棄!」李彤輕輕拉起她的臉頰。
整個下午，他們到了一間手工皮革錢包的店舖，埋頭苦幹著那個錢包的大概模樣。
「我要返補習社，要走先!」李彤說著
凝望時鐘原來已經七點多，凱婷連忙收拾好材料「咁我都聽日先繼續整，反正仲有時間。」
「我哋一齊走啦。」直至搭地鐵回家，凱婷心中依舊有些猶疑，低頭注視袋中的材料，心頭牽起了一絲懼怕。
倘若失敗了，還會是朋友嗎，凝望著月台上玻璃門的兩人的倒影，自己感覺連自己也感到煩厭，自己也不喜歡自己，別人會喜歡嗎?
對照著旁邊李彤，如今細看起來，她充滿氣質又飽讀詩書，自己能夠比得上嗎。
「係呢，余程天之後有冇搵過你?」凱婷輕輕一問
「冇講過咩特別嘢，放心啦，我唔會同你爭嘅。」李彤笑著說
列車緩緩駛近月台，凱婷打開手機專注其中，刻意不去思考，如像平常一樣回家。
電話頁面停留在剛才拍賣網上，一堆Kobe的週邊「如果你害怕失敗，那你就有可能會失敗」-Kobe Bryant，凱婷默默盯著這句說話。
回到那間舊公屋當中，打開電梯門，低頭踱步走過那彷彿無盡的走廊，經過重重覆覆的鐵閘後，拿起鎖匙。
「好耐冇見喇，凱婷!」一把令人厭惡的聲音響起，抬頭看，佳少與兩名同黨擋在了自家門口。
「點解你會喺度㗎!?」 凱婷一臉驚訝問