【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 17

「噹噹」打開酒吧大門，常日羲正拿著燈籠俏皮伸出小舌頭自拍，剛剛發佈便有近數千個讚好。


「毛嘜我哋自拍呀~」


毛月永嚴肅的對著她說「嗰日，點解要幫佢哋?」 


常日羲還在自拍「你講咩呀? 」






毛月永一手拿過手機「你知我講乜嘢，嗰架車應該係會撞到佢哋兩個。」 說罷把將之前的死者名單放在桌面。


「同埋…佢應該唔會突然全開陰陽眼。」毛月永輕輕彈了一下她的額頭 


「李彤 年齡十七歲 死因:車禍導致失血過多，被未知原因修改，死亡時間…」






「劉世檜 年齡十八歲 死因:心跳休止，被未知原因修改，死亡時間…」


「逆天而行從來都冇好嘅下場，日羲。」 說罷他便銷毀了這兩張已廢掉的死亡名單 


「…我知道」常日羲看著那個綠色的燈籠，片刻接過下個月的名單。






「… 年齡十八歲 死亡時間: 二零三五年七月六日  死因…」常日羲只能看著這段文字感嘆。


「呢個交畀你，今次唔好再干涉。」 毛月永再三提醒 


「噹噹」酒吧大門再次被打開，死亡名單在日羲手上不知何時變作了菜單。


「又見面啦，你好~」常日羲變回了熱切的侍應，露出了標誌性的燦爛笑容。


進來的兩人是余程天與劉世檜，隨便找了個位置坐下來後， 余程天注意到劉世檜的眉頭深鎖，似乎有什麼心事在困擾著他。






他單手托著下巴，微微皺起眉頭問道 「估唔到你會揀嚟呢度食嘢。」


「你最近究竟有咩事? 你唔似係我識嘅劉世檜。」余程天繼續說道


「唔想講。」劉世檜喝了一口水，淡淡地回答道


「最近李彤好似同你傾得好埋…啱啱仲要專登去二手店…係咪發生咗啲咩事」余程天的目光閃爍著。


「放心，李彤好好。」 劉世檜輕輕地說道，聲音充滿了安慰和堅定。






「我唔係問佢，我係問你! 係咪張通靈紙搞到你?」 


「唔係」劉世檜平靜地回答道，他的臉上依舊沒有任何表情。


「咁嘅話你做咩突然咁緊張，專登返去搵邊個係賣家?」


常日羲走近打斷了他們的對話「唔好意思呀，你哋諗好嗌咩未呢?」 


兩人點餐後，余程天見他不想回應便沒再過問，毛月永調製特飲，默默看了一眼劉世檜，手掌憑空多出了一顆黑色丸子，他捉緊拳頭，丸子化成粉末散落在那杯飲料上，攪拌數下後便消失在飲料中。






常日羲來拿飲料的時候，眼角瞟了一眼特飲，隨後假意打瀉飲料，匆匆走到吧檯內，尋找清潔用具。


來到毛月永身邊，她表情似乎有些不悅「毛月永，你啱啱先自己提醒過我。」


「我哋唔可以直接干涉佢哋，你都成功咗一半，唔爭在等埋落去。」 常日羲捉住他的手，小聲說道「我唔想再同你分開，唔好再做傻事。」


毛月永沉默不語，輕輕應了一聲便調製新的飲料遞給他們，就在這時劉世檜忽然緩緩開口 「…唔」


「我想問下，你哋呢度係咪有一個綠色嘅燈籠?」 聽罷，一旁的常日羲下意識注視毛月永。






這個便是劉世檜來這裏的目的，毛月永面無表情隨後緩緩說出 「有呀，你飲住嘢先，我入去搵畀你。」


在身後的常日羲冒著冷汗，忽然一個電話打斷正準備喝飲料的劉世檜。


電話另一頭是位女聲「你好呀，呢度係織塵二手店打嚟㗎…啱啱搵到出售嘅紀錄，賣嗰張玩具通靈紙嘅客人係叫…劉世檜。」


「吓!?」劉世檜思疑自己有沒有聽錯。


「上面原來仲有個佢留低嘅訊息…喂? 你好? 喂?」毛月永在門後面色凝重，雙手輕輕一捉緊成拳頭，電話便斷了線。


回頭開門的瞬間，毛月永便來到了二手店內，其他人彷彿看不見他的存在，他走到店員面前，手輕輕在她眼前一掃…


女店員重新致電給劉世檜「喂，係呀原來佢仲有一封信，係要我哋連埋一齊畀客人。」


 「可唔可以講多次嗰個人叫咩名? 同埋嗰封信介唔介意而家話畀我知係大概講乜嘢…」劉世檜緊張的詢問 


 女店員重新看著店內的記帳簿…「奇怪…頭先係呢個名㗎咩…?」


「封信… 」


毛月永輕輕在她耳邊說著 「係你睇錯，冇呢封信。」


「我睇錯，冇呢封信。」女店員不知不覺跟著他讀


「唔好意思頭先睇錯咗，搵唔到賣家個資料」毛月永接著說 


「唔好意思頭先睇錯咗…搵唔到…賣家個資料」女店員像複讀機跟著說 


 電話掛斷後，毛月永擦一擦頭上的冷汗。


「係呀…唔該你。」劉世檜掛斷電話後，忽然余程天一手把他拉著走。 


 「突然做咩呀??」


余程天一面緊張地說「李彤佢哋，出左事。」


大門剛剛閉起，毛月永重新在雜物房走出來，手上拿著充滿陰氣的燈籠。「睇嚟時候未到。」


「我哋之後一定要出手? 有冇可能會畀佢走得甩…」常日羲傷感地說出，似乎話中有話。


毛月永凝視著手上的燈籠「唔會，因果相連，佢走唔甩。」 忽然燈籠抖動了一下，劉世檜的面孔出現在燈籠內，不斷在敲打那片玻璃。


「當人間嘅死結解開，我哋就要重新執行職務。」


「劉世檜同埋鍾隨心…所有唔應該存在於呢片塵世嘅嘢… 到時…」毛月永沒有說下去 


「但係死結…你已經試咗咁多次…今次可能…」常日羲彷彿看著遠方。


「唔會再有變化，我肯定。」毛月永看著常日羲的背影，心中想著倘若完成不到任務的懲罰。 


同一時間在某間咖啡室內，秋老師參加著舊同學的聚會，其中先前在學校見過的易醫師亦在其中。


不知不覺，他們談論起學生時期，秋老師說著「我覺得一齊玩電影學會嗰個時期嘅小易係最吸引。」


眾人也點頭贊成，開始回憶起往事，聲量不知不覺越來越大，話題轉到易醫師那邊，他喝著咖啡凝望街道的風景，輕輕說著 「嗰陣嘅事已經冇咩記憶…」


「我對其他中同嘅記憶都開始模糊，好似上個月見到個舊同學，諗咗一陣先記得佢個名。」 


「點估得到我哋間學校…會因為政治理由直接殺校。」


「係咁㗎啦，呢十幾年都慣咗…聽講我哋舊校嗰邊而家變咗探靈地點!」 


「唔係啩!? 」


「真係㗎上次我老公先去完嚟，最好笑嘅係佢見到女廁嗰塊鏡嘅血印… 仲話佢去到嗰度撞鬼，我心諗你繼續吹呀，跟住忍住笑仲要扮曬好擔心咁樣繼續聽佢噏。」


秋老師忽然說起「嗰塊…我記得係嗰時我哋拍電影用嘅道具…」


「係呀係呀就係嗰塊!」 


「我仲記得嗰陣嗰個女主角叫做… 」


「鍾隨心。」易醫師輕輕說著