【愛情/奇幻】《只能用餘光看見你》第一部:陰陽眼的餘光. 某天在學校玩碟仙，結果戀上了女鬼…: 8
「你今日好返啲未呀。」清晨的陽光透過薄紗窗簾洒進房間，她的臉龐透著微光，在我床邊輕聲問著。
不經不覺又過了兩星期，因那次車禍後的大病，我順勢誇大了病情，就這樣在家躺著。
每日她都會準時叫喚我起床，站在我身旁的感覺不再是寒冷刺骨，反倒是像一道涼風。
若不是我能清晰看見她的容貌…
「咳…咳。」病得似乎比我想像中更加嚴重。若不是我的身體狀況，我都會質疑自己是不是車禍後撞壞腦子，這樣看來不是幻覺，我真的與女鬼住在同一屋簷下。
實際生活下來，只有平淡的日常，鬼魂，似乎沒有想像中那麼可怕。
我一直對於食物沒有什麼要求，獨居的我，認為煮食是非常沒效率的事，準備功夫以及事後的清洗碗碟，所花費的時間是我買外賣的好幾倍。
作為學生，我寧願拿著剩餘的時間玩多一場遊戲或是多看一齣劇，我是沒想到…
在廚房裡，劉世檜正在煮早餐，發出陣陣香氣，他拿起一個雞蛋，朝著門口高喊著「你今日想要咩蛋?」
「太陽蛋!」鍾隨心探出頭興奮回應
他聽罷了輕輕敲破蛋殼，一陣清脆的油炸聲音從鍋中傳來，散發出誘人的氣息。
片刻後兩碟簡單的西式早餐放在枱面上，劉世檜看著超市的收據單。 「知唔知最近啲蛋好貴…明明你就唔需要食嘢。」
「你都唔明白，儀式感係好重要!」
「況且我身體唔需要啫，但係我心靈需要。」鍾隨心不斷重復吃著面前的食物。
「明明你可以食我嗰碟，滿足之後我再慢慢食咗佢咪得囉。」
「而家好似浪費食物咁…」劉世檜心中為著生活費發愁。
「點同呢，要尊重㗎嘛~尊 重，咁嘅話咪好似偷你嘢食咁樣。」
劉世檜叉著一條香腸，遞到他的面前「咁樣夠尊重喇啩? 擘大口…呀」語氣像是餵著小孩吃飯。
鍾隨心避開「我又唔係細路仔…」 有些害羞說著
「係喎…我哋一陣間玩尋日嗰個!!」鍾隨心兩眼放光
這幾天也沒有打開個電腦，連電話幾乎也甚少查看，我打開儲物櫃，拿出新買的幾盒桌遊。 「好呀，你輸咗唔準再半夜喺我去廁所嗰陣嚇我!」
晚上的公園，街童圍在一群，凱婷在其中，呆坐在公園看著遊玩設施。
她回憶起那次在酒吧喝完酒，路過這個公園看見余程天默默坐在滑梯…
「Weee~」凱婷滑下滑梯，雙腿鉗著余程天。
余程天顯然被嚇了一跳，他抬起頭，原本還想調皮一下的凱婷看見他雙眼發紅，滿面淚痕，便突然呆住了。「你…喊呀?」
一輛貨車經過，車燈光線掃過兩人，余程天平靜說出「…雪寶?」
凱婷思索了一下他在說什麼，目光轉下看著自己的短裙，臉上瞬間泛起一陣嬌羞的表情，雙手遮蓋自己的短裙，雙腿用力鉗著他的頭顱。「你望乜嘢呀!?」
「抖唔到氣抖唔到氣!!」余程天拍著她的小腿
那天，兩人在公園內一段時間，坐在遊玩設施海盜船的底部。
「點解會落雨㗎…」余程天嘆著氣說
「唔好扯開話題，估唔到你係咁痴心，仲以為你係…」
「狗公呀嘛，我梗係知。」
「我係經常換畫，但係每次我都好認真。」
「聽住先啦，都唔知你呢啲嘢呃咗幾多女仔。」凱婷把手伸向外面，感受著雨點滴在手中的感覺。
凱婷剛想掀開煙盒，便被余程天斥責「Mk小陣啦，你咁樣邊有男人會鍾意。」
「食煙就MK? 我不知幾多人鍾意。」
「我幾肯定佢哋淨係鍾意你肉體，到陣時發現全部都係黑嘅，個肺又黑，個鮑又黑…個心又…」凱婷捉緊了煙盒把他丟向余程天。
「唔好又打我呀!」余程天下意識雙手擋在前，片刻後依然沒有動靜，他才低下手…
凱婷眼淚在眼眶打轉，她撇過一邊頭「你知唔知你真係好黑人憎。」
「你呢啲咁嘅人梗係唔明，點解我要食煙。」
「啲衫件件都貴嘢，喺邊度都一大堆人圍住你轉，成績又好…親情友情愛情樣樣兼得。」
余程天默默走到外邊，撿起那個煙盒「對唔住。」
「唔使道歉，你講得啱㗎，我係冇人鍾意，我就係咁MK。」
「畀個火機我。」余程天伸手向她
「你又想搞乜春秋…?」 凱婷發現他擔起了一支煙，余程天接過他的火機，動作熟練點起香煙。
凱婷呆滯了一下「你都會食煙㗎…睇唔出喎。」
余程天呼出一口煙「其實我好唔鍾意我屋企…」
佢哋永遠早出晚歸，自我有意識以來，每晚晚餐佢哋都幾乎毫無交流，喺嗰個屋企最親嘅反而係菲傭，佢哋嘅話題永遠都係圍繞住利益、數字。 佢哋關注我嘅都係我嘅成績。
物質層面的確睇落去好光鮮，但係，生活好多嘢都唔應該量化，我想要嘅只係，冇計算冇目的，單純嘅交流…心靈上面嘅交流。
「至少好過物質層面都冇，屋企得一個典型嘅垃圾老豆…酗酒爛賭。」凱婷奪過他手上的香菸。
「其他煙濕曬…」凱婷默默把香煙放在嘴邊。「呢場雨睇嚟有排落…」
「睇唔睇戲?」余程天拿著自己的手機
「點解全部都係愛情片…仲有啲韓劇添。」凱婷劃著他的手機
「男人老狗…都可以睇愛情片嘅…」凱婷不知為何此刻沒有揶揄他…
「就呢套啦幾應景…我又未睇過。」凱婷指著鐵達尼號
余程天有些驚訝「咁出名你都未睇過?」
「我平時淨係睇…動畫。」凱婷有些害羞說著
「唔怪之得你鍾意雪寶。」
凱婷一拳打在他腰間上「唔好再提呢兩隻字!」
回憶截然而止「喂凱婷!諗咩諗到笑笑口呀」 一旁的友人遞了一支香煙給她。
「話說之前嗰個潮童佳對你嗒糖喎…你諗住點?」
「冇咩點，唔關我事。」 凱婷擺手拒絕
「藍田佳少? 聽講條友好有米㗎喎，個樣都唔差，你之前唔係話鍾意啲類型㗎咩。」旁邊的友人拿起手機看著他的社交平台帳號。
「藍田佳寶我就知，就算係惠康百佳都唔關我事。」
「今日有啲事走先。」凱婷拿起自己的手袋轉身就走。