[重口味]黑貓館: 第五十三回 溫暖的感覺

第五十三回 溫暖的感覺

之後幾個星期亞信都無再去搵少霞.
無咗亞信嚟煩自己,少霞忽然有小小唔慣,每星期都落去飲杯咖啡已經變成習慣,
現在只好自己一個人落去,老闆話:[呢排得妳一個嘅?]

[係呀....]
少霞坐底好似有小小悶悶不樂.

老闆見無乜客於是都坐底:[做乜唔開心咁呀?]



[無乜野.]

見少霞咁於是話:[個肥仔係妳D客?]

[嗯....]

[老闆想問下你,你覺得肥仔諗乜?]

[乜野諗乜?]



[佢....只係幫趁過一次,之後佢都只係比錢同我食飯.]

[乜有D咁嘅傻仔嘅咩?]

[係囉,都唔知佢諗乜.]

[佢諗乜我點知呀,不過妳諗乜我就知.]

[吓,我諗緊乜?]



[妳咪諗緊肥仔做乜唔呢搵妳囉.]

[超...以為你講乜.]

[我見妳地好奇怪,一個只係食野,一個無視對方好似有仇咁,但係有仇就唔做佢生意啦.]

[咁人地比錢丫嗎.]

[我夠比錢妳啦,又唔見妳陪我食飯.]

[妖.....]

老闆笑笑口話:[其實肥仔成日都有過呢食野嘅.]



少霞有D不肖咁話:[唔洗問又係食什扒飯啦.]

[嗱,唔係我自誇,我地D什扒飯真係幾正架.]

少霞耷底頭細細聲講:[死肥仔真係無得救.]

[不過佢好忍得口,次次都係油菜,間唔中就沙律.]

少霞面上出現罕有嘅偷笑笑容.老闆果然係老屎忽挑通眼眉,一睇就知乜野事.
[呀,早排成日見肥仔係前面間7仔做part time,唔知重係唔係到呢.]
講完就起身行開咗.

少霞聽完一啖飲晒杯咖啡然後即刻起身行去門口埋單,老闆又偷望下側邊無人睇到想伸手抽下水,點知少霞一手拍落佢手.[收錢呀.]

老闆笑笑口講:[收咪收囉,唉…有人追就唔識舊相好啦.]



少霞做咗過鬼臉然後就離開茶記,間7仔係街口行幾步路就到.

去到果然見到亞信係到開工,見佢係到搬D氣水入去搬到身水身汗,望落身形真係消瘦咗好多.

少霞慢慢行過去企係亞信後門講:[做乜唔搵我.]

亞信聽到呢句幾乎嚇到掉咗手上D氣水落地,佢放底轉身一望見到少霞企係到.

亞信無諗過會見到佢,只係傻笑:[哈...哈....]

少霞問:[做乜係到返工?]

亞信摸住個頭尷尬咁話:[吓....因為....無錢.....]
咁又係嘅亞信份人工又唔係多,交租食飯搭車都已經洗咗大半,


重要個個星期食個七舊幾水什扒飯,條數都幾襟計.

亞信話:[我無再食什扒飯啦,現在成日食菜,妳睇下瘦咗幾多.]
然後拉起件衫比少霞睇,雖然無一排朱古力,不過總好過六神合體.

少霞笑笑口話:[你減咗肥都係溝唔到女架喎.]

亞信尷尬咁話:[我知.....]

少霞跟跟住講:[不過總算係個好開始.]

佢兩個企係門口望住對方笑,但係側邊行過D人就望住少霞.有幾個亞伯真頭企係到睇野.
鬼咩少霞依舊著住bra top熱褲,引咗成班咸濕佬過呢睇野.

亞信見到咁環境就話:[妳等我一陣.]



[做乜?]

[好快...等一等.]
對於其他人嘅奇異目光少霞一早已經習慣,做得呢行就預咗.

亞信飛快走出呢,手上攞住件7仔制服,佢又一手披係少霞身上,
[妳都係返去先....]

[吓...件衫...]

[我架,遲D搵妳攞返.]

[嗯.]
少霞應咗一句之後轉身走,亞信一直望住佢,忽然少霞轉身對住亞信講:[少霞.]

亞信一頭霧水:[邊個少霞?]

[我個名呀,白痴.]
之後轉身繼續行.

亞信一路只知佢係軒仔亞媽但係從來都唔知佢叫乜名.少霞一路行一邊偷笑,做咗咁多年人第一次有人咁關心自己,只係一件咁薄嘅制服但係感覺好溫暖.

可惜甜蜜回憶都係好短暫,當佢行到樓下望一望個燈箱,又係時候要返去呢個現實世界,吸咗口大氣繼續行返上去開工.

少霞唔夠膽想太多太遠,只希望過得一日得一日.

未完待續