《愛在。貴族學園》: Ch 30 ~ 思念（下） Part 6

Ch 30 ~ 思念（下） Part 6（連載日期：2024/12/21）

之後，大家一如平時咁樣收功課、點名。然後，因為今日係星期一嘅關係，所以學校都會有非常無聊嘅早會。

今日嘅主題，就係講陸運會嘅注意事項，因為學校陸運會喺星期四，就會舉行初賽日，所以今日學校就要向同學交代定，以求當日同決賽日嘅所有賽事都會順利舉行。

而喺成個小息之前嘅堂，喺5A班房裏面都冇咩特別事情發生，就算喺大家出去上選修課嘅時候都一樣。而唯一有嘅麻煩位，就係俊軒一直等緊一個機會，將尋日買嘅戒指送畀韻喬。
 
不過就喺小息嘅時候…「喬喬呀，你覺唔覺得呢謙謙呢，今日好似好奇怪咁呀？」





「嗯？！點解咁講啊殷殷？」韻喬用一個非常奇怪嘅語調反問天殷。

「佢啊！今朝到頭先上堂嘅時候，都無啦啦對住我甜笑，然後今日又一早買野飲畀我！」天殷好緊張咁捉住坐喺位嘅韻喬問。

而就喺呢個時候，禮謙都正好離開咗班房去洗手間，所以天殷先會咁樣問。

「下！我都唔知發生咩事喎，不如小軒啊，你就去幫殷殷問下啦，可唔可以呀？」韻喬搖搖頭表示唔知道「而且你都知啦，有啲嘢呢，男仔都會怕醜咖嘛，可能謙謙都係為自己面子，或者怕天殷拒絕而面對失敗，所以先唔夠膽講出嚟掛…」
 
俊軒聽到韻喬同天殷有呢個要求之後，就覺得有少少無奈，雖然自己唔係好想做呢啲角色。





但始終天殷搵到韻喬出面，所以俊軒都冇辦法拒絕自己個女朋友嘅要求…「呃，咁好啦，我去幫你地問下佢啦！」

「唔該你啦軒仔！」俊軒於是就接受女朋友嘅要求，出去洗手間睇下禮謙咩事。

點知俊軒一打開洗手間度門，禮謙就喺裏面行出嚟「喂禮謙，啱啦，我有啲嘢想要同你講！你跟我過一過嚟先！」「哦！好呀大佬！」
 
於是俊軒就拉禮謙去學校樓梯間其中一個暗角度，禮謙間俊軒突然之間咁樣都顯得有少少驚，於是就即刻問俊軒...

「軒少，你做咩要搵我搵到嚟個暗角度，而唔係番去班房先講呀？」
 




「我就係唔想大家kam，所以先喺呢度同你講咋！」俊軒有少少唔耐煩咁答禮謙。

禮謙聽完之後梗係覺得奇怪啦，於是就反問俊軒「無啦啦點會尷尬啊？」

「話唔話得畀我知，做咩今日無端白事一早幫天殷買維他奶？」俊軒非常直接咁去問禮謙今日買維他奶嘅事「頭先天殷覺得你今日好奇怪，然後就喺班房同我女朋友講。」

「而且天殷仲話你，今朝擺低維他奶同頭先上堂嗰陣，你都有對住佢甜笑……」
 
「嗱，我之所以要帶你嚟暗角，就係想你講真話。依家喺度得我同你兩個就講啦，你到底係咪鍾意咗天殷？」

「如果係嘅話，點解你之前仲要同我爭小喬？如果畀小喬知道咗嘅話，你知唔知你咁做會hurt到佢咖？」
 
禮謙聽到俊軒直接講出「係咪鍾意咗天殷」呢七個字之後，成個人面色有少少奇怪「你咪玩我啦軒大佬，盒奶……我都話係我今日唔小心買多咗囉，咁我見天殷好似好想飲咁，所以咪送畀佢飲囉！都唔知點解你地係要喺度小題大做？」
 
「而且我都同你地再三強調，我之前對小喬嘅感情都係真心嘅，我係真係鍾意小喬佢。不過，最後你自己都證明咗，小喬同學係鍾意你吖嘛。」





「所以呢，你地就同我放心啦，我絕對唔係當天殷同學係水泡咖。如果我真係鍾意天殷，我絕對唔係將對小喬嘅情感放落天殷度！」

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer