《愛在。貴族學園》: Ch 24 ~ 心碎 Part 1

Ch 24 ~ 心碎 Part 1（連載日期：2023/02/17）

好快就到咗第二日，5A班上各人都如常返到學校準備上堂，同埋一大清早嘅5A 班房裏面，都仲有同學喺度趕功課。

不過，同平時唔同嘅係，今日俊軒居然比起平時，早返咗成15分鐘左右，大家於是都望一望佢。
 
「早晨呀，軒仔！？做咩今日咁早呀？你唔係不嬲都成8點兩個字、差唔多打鐘先返到咖咩？」講呢句說話嘅，係天殷。

不過天殷跟住就選擇舊事重提「我仲記得你試過因為遲到，而畀Ms張鬧到上天花板咖喎！做咩呀?見過鬼怕黑呀？哈哈！」
 




「早晨呀殷殷。哎呀，啲樣衰掃興嘢好心你就唔好提啦，乜嘢見過鬼怕黑呀！」俊軒反哂白眼咁答天殷「不過呢，我都係見我今日自己早醒咗，橫掂喺屋企都冇嘢可以做囉，咁不如早少少返學校唔好咩？」

「又冇話唔好嘅，至少你唔使畀人閙先啦…」天殷嘟住個嘴咁講，但俊軒見到之後，就認為係一個可以玩返天殷轉頭嘅好機會，所以就口輕輕話「做咩呀李天殷？你依家掛住我呀？嘻嘻！」

「你都癡線咖林俊軒！我無啦啦掛住你做咩呀？！你呀不如問下你自己，係咪掛住人地，想見耐啲，所以就早咗起身，然後又早咗返學仲好啦！！」天殷瞪大自己對眼反駁，同時都暗示俊軒掛住韻喬所以早返。
 
「頂你，唔建議你咁講啦！」俊軒好無奈咁回應寸到自己一棟都冇嘅天殷「仲有呀李天殷！做咩依家你喺學校都咁爛口咖你？信唔信我同你媽咪講呀啦？」

「車！你咪又係咁！信唔信我同林Auntie投訴你呀啦！？」
 




就喺天殷同俊軒繼續喺班房裏面打鬧嘅時候，禮謙都靜靜咁返到班房「早晨呀各位同學！咦，軒少你……今日做咩咁早返學嘅？好少見喎！」

不過，禮謙見到俊軒之後，就用一個奸笑樣望住俊軒，就好似知道少少嘢、準備恥笑對方咁。
 
「死仔！做咩咁嘅樣望住我呀？！哦！依家連你都學埋李天殷，寸埋我一份啦喎係咪？」俊軒喺被發現之後，就有少少不滿咁講「一定係李家大小姐，尋晚將尋日圖書館嘅事講咗畀你知啦！？」
 
天殷同禮謙兩個既不承認，但係都唔否認俊軒嘅指控，只係喺度忍笑。

禮謙跟住就話「阿林大哥，其實你都識咗我咁耐啦，乜我似係啲咁嘅人咩？不過呢，我都真係會睇好你同小喬嘅，加油啦你！」然後禮謙都拍一拍俊軒膊頭。





喺旁邊嘅天殷聽到禮謙嘅說話之後，就終於都忍唔住而喺度笑「謙謙王子，你話今次點算好啦？真係唔係親眼睇嘅話住都冇人信呀！同你開心share下啦，尋日啊，喺拉巴嘅時候，親眼睇到小喬對住軒仔嗰個心動樣，諗起都覺得好笑！Sweet到爆呀！」禮謙聽到之後都笑到肚都攣埋。

而俊軒聽到天殷咁挖苦自己同韻喬，唯有搖搖頭苦笑道「喂喂喂！邊有sweet到爆咁誇張呀李天殷？！但係講真啦，當我同小喬互相對望嘅時候，我自己都心都突然之間跳得好快，快到好似就快跌出嚟咁！」之後天殷同禮謙都wow咗一聲。

喺見過俊軒同韻喬經歷過咁多嘢之後，禮謙早就知道自己輸咗畀俊軒。

而且喺經過尋日圖書館韻喬同俊軒嘅事之後，禮謙自己都深知，再磨落去都冇意思，於是鼓起勇氣對俊軒講……

「俊軒，既然依家小喬嘅選擇，幾乎都已經呼之欲出啦。咁，當係為咗小喬同學同你嘅幸福又好，又或者為咗防止嘉惠同學介入都好，我都係唔好再浪費時間喺小喬身上啦！」

俊軒聽到之後好得戚咁對住禮謙講「車！謙謙公子，我一早都同你講咗啦！小喬到最後鍾意嘅都係我！」

（待續 ~）

IG link https://instagram.com/bear_big_big_writer