《愛在。貴族學園》: Ch 23 ~ 施壓 Part 9

Ch 23 ~ 施壓 Part 9（連載日期：2023/02/14）

[熊大大先祝大家情人節快樂，但今日懷住悲痛嘅心情發佈今一集，希望大家好好珍惜眼前身邊嘅人]

（「小軒，你做咩放低餐具唔食野嘅？你係咪唔舒服呀？」嘉惠好溫柔咁，問喺夢境裏面面有難色嘅俊軒。
 
「唔係呀，咁係因為呢度啲嘢好似麻麻地好食啫，食野啦！」「哦！」於是兩個人就繼續食飯。

但係突然之間，俊軒嘅電話響起「唔好意思嘉惠，你等我一陣先，我要行一行開去聽個電話先。」「喔！好呀！」冇為意嘉惠於是就自己繼續食嘢。
 




俊軒好快就聽完電話返嚟，不過表情就由頭先嘅輕鬆自在，變成非常焦急與不安。嘉惠意識到俊軒嘅表情變化，代表有事發生，於是就好緊張咁問俊軒「俊軒，係咪有咩事發生？」

夢境裏面嘅俊軒，見嘉惠可以睇穿自己，表示有少少感到驚訝。但係俊軒都收起自己嘅笑容，然後就話「嘉惠，我有啲緊要事要走先，不過我希望你……以後可以好好對自己，同埋一定一定要幸福，對唔住！！」
 
面對俊軒突然講呢啲說話畀自己聽，嘉惠顯然有啲不知所措「到……到底發生咩事呀，小軒！？點解……點解……你突然間要咁樣講對唔住？慢慢話畀我知發生咩事啦好嗎？！」嘉惠開始聲淚俱下咁講。
 
「嘉惠，我真係好對唔住，我真係無心去傷害你，但係我真係對你唔住，因為……因為呢個人對我嚟講，實在係太重要啦！所以……所以我一定要走……」俊軒連番抱歉之後就抱一抱嘉惠。
 
然後俊軒再繼續同已經喊得好大聲嘅嘉惠講「應承我嘉惠，你以後都要好好照顧自己，好好咁尋找屬於你自己嘅幸福！」說罷，俊軒就開始收拾一下自己嘅物品，準備離開餐廳。
 




「林俊軒！！你答我！？係咪因為嗰個叫張韻喬嘅窮鬼，所以你先要咁做！？」嘉惠自己好大聲對俊軒怒吼，而且大聲到周圍嘅食客，都望住自己同俊軒，氣氛自然尷尬到一個極點，連餐廳嘅侍應生都嚟睇下發生咩事。
 
面對嘉惠再一次估到，自己係因為韻喬，而要離開嘉惠，所以俊軒成個人震一震，然後再對嘉惠話「嘉惠，你要搞清楚一樣嘢，就係無論我係咪因為小喬而離開你都好，成件事都唔關你事。因為無論你點留我都好，我都一定要離開你。而且我覺得同你做朋友嘅話，我會過得比較開心。」
 
「咁點解你要欺騙我感情呀？！點解你當初要同我開始呀衰人？！」嘉惠放聲大哭道。

「我冇欺騙你感情，我由嘗試去令自己進入狀態，但係我……我發現我真係過唔到自己嗰關…」俊軒繼續好冷靜咁講。

「而我選擇祝福你以後可以幸福，係因為我仲想同你做朋友，始終我地都係5A嘅同學，我地兩個決裂嘅話，只會日日都喺班房度面阻阻咋！我就係唔想大家以後都會不和，影響到全班嘅氣氛…」





「而且最重要嘅係，就係嘉惠你要明白，有一種愛，唔係一齊先叫幸福。而且兩個人係咪真係要喺埋一齊，都一定要兩情相悅先得，希望你可以明白。」
 
「最後，好多謝你最近一直畀我嘅愛，林俊軒我心領啦。但係，依家有更重要嘅人需要我去照顧！而且希望你都可以應承我，除咗好好照顧自己之外，我都希望你唔好再叫你家人，向我家人或者朋友施壓。失陪啦，返學校見啦！」
 
俊軒冇等到嘉惠應承與否，就自己一個去收銀處埋單，然後再離開餐廳。而嘉惠就開始喊，喊到自己都醒埋……）
 
「啊！點……點解連發夢我都會輸畀張韻喬呢個窮鬼咖？冇可能，冇可能咖！林俊軒一定係我黃嘉惠咖！我一定可以由張韻喬手上搶到佢返嚟咖！！」嘉惠喺睡夢中驚醒之後，就坐喺床上邊自言自語。

但好快嘉惠都決定一樣嘢「都係唔好啦，我都係聽日返學之前，再叫爸爸早少少幫我先，免得夜長夢多，同時拖太耐只會畀張韻喬呢個賤人有機可乘！」語畢，嘉惠就落床去洗手間洗個面，然之後就繼續訓教。

（Ch 23 施壓 ~ 完）

IG link https://instagram.com/bear_big_big_writer