《愛在。貴族學園》: Ch 23 ~ 施壓 Part 7

Ch 23 ~ 施壓 Part 7（連載日期：2023/02/07）

嘉惠喺聽到自己爸爸講完一大輪自己完全唔啱聽嘅愛情偉論之後，隨即反駁黃生道「我畀人話係狐狸精、畀人地睇唔起咁又點呀？！只要我黃嘉惠可以同我愛嘅人喺埋一齊，我自然就會得到幸福咖啦！使乜理其他人講咩啫？！」

黃生聽到個女依然執迷不悟，當然搖搖頭表示不同意，然後輕輕拍嘉惠嘅膊頭講話「呀女，你就相信我一次啦，爸爸以前都後生過，而且都見過呢啲咁嘅事，最後輸咗嗰個真係好慘…」
 
「無論你之後選擇點做都好，爸爸只可以同你講，如果你咁樣去錢迫一個，可能唔愛你嘅人同你一齊，就等於一座天秤裏面，其中一邊被不斷強家砝碼，而開始變得唔平衡，最後過分被愛嘅一方，自然會覺得深受壓力，係因為覺得自己付出得唔夠對方多，產生内疚感而選擇離開。」
 
「而另一方就因為做咗大量不對等嘅投資，落去對方身上，但最後都係換來分手兩個字嘅話，就真係欲哭無淚啦，而且，受過傷害之後都好難會再相信愛情。所以嘉惠，你就聽下爸爸講啦，你依家咁做長遠嚟講，你真係唔會幸福咖！」





嘉惠聽到呢度之後放聲大哭「夠啦！！點解連爸爸你都走去幫住張韻喬嗰個死人頭喎！！連自己個親生女都唔幫！好！既然我點做都好，我都唔可以同我鍾意嘅人係埋一齊嘅話，咁我生存仲有咩意思喎！？我都係去自殺好啦！」說罷嘉惠就離開客廳，跑去厨房，然後就拎起一把菜刀面向自己，走去自己爸爸面前。

黃生見到呢個情況，當刻要制止嘉惠傷害自己「喂！呀女你冷靜啲……放低把刀先啦！你有咩訴求都可以慢慢講，但真係唔好做傻事！爸爸唔係唔想幫你！」

「咁點解連你都要勸退我呀？」嘉惠嘅情緒都係非常激動，好大聲咁同黃生講嘢。
 
「爸爸唔係要勸退你，我想講嘅係，呢個世界有一種愛，叫做默默守護，而係唔需要講出口嘅。雖然爸爸唔贊成你用咁樣嘅方式去拆散人地，畢竟你咁做傷害咗另外兩個真心相愛嘅人，其實係真係好自私。」
 
「不過呢，爸爸為咗個女嘅安全同幸福，我都係冇辦法啦，睇嚟爸爸都真係要出手啦。但最後你可唔可以得到林家二公子呢，我就唔擔保啦！」





嘉惠聽到爸爸以上最後一句話，就慢慢放低把隊住自己嘅刀，然後收起脾氣道「爸爸，你咁講嘅意思係……？」

黃生之後走埋去嘉惠旁邊，拍拍膊頭道「我係話，爸爸會盡量搵方法，令到林家二公子，心甘情願咁同你喺埋一齊，好唔好呀？」

「不過爸爸只係會幫埋你最後一次，因為你依家真係大個女咖啦，你其實喺遇上任何事情嘅時候，都應該要學下自己解決問題，而唔係遇到有咩事，就即刻叫爸爸媽媽出面幫你手，知道未呀？」

嘉惠聽到黃生最後都會幫自己之後，就即刻點點頭報以微笑道「多謝爸爸！我都話過爸爸係全天下最好嘅男人啦！錫哂你！」
 
「真係冇你呢個皇帝女收呀！不過，爸爸好認真咁再同你講多次，我今次只會盡量幫，而且只會幫一次，最後得唔得就真係睇你地造化啦！」黃生用帶點無奈嘅語氣講，不過嘉惠因為沉醉喺爸爸幫自己嘅歡樂之中，而察覺唔到黃生真正嘅意思。
 




「知道啦爸爸，我一定唔會浪費爸爸嘅一番好意，一定會將林家二少爺追到手，同時都令張韻喬呢個窮人，徹底咁離開俊軒！」嘉惠胸有成竹咁講，同時都收起自己嘅眼淚。
 
「好啦，小嘉你唔好再扭計啦，快啲上去沖涼然後做功課啦！」黃生講嘅時候都摸下嘉惠個頭，試圖令嘉惠冇咁難過，但係都唔知道呢個微細嘅舉動，都係寵壞緊自己個女。

「知道！」之後嘉惠就好開心咁返番自己睡房。

（待續 ~）

IG link https://instagram.com/bear_big_big_writer