《愛在。貴族學園》: Ch 22 ~ 心動 Part 1

Ch 22 ~ 心動 Part 1（連載日期：2022/12/20）

喺上到圖書館之後，俊軒、韻喬同天殷佢地都放低書包，然後就開始做功課。席間大家都低聲咁互相討論功課嘅内容，但其實主要都係要韻喬同俊軒去carry天殷一個。

當然啦，俊軒同韻喬兩個學霸之間，有時都會就自己唔清楚嘅嘢去問對方，而且都習慣對方所做嘅筆記。
 
過咗差唔多個半鐘，韻喬就做到開始有少少攰，於是就想去搵其他書睇下，所以二話不說韻喬就搵俊軒陪自己「（小軒呀，我做功課做到好悶呀，你陪我去搵幾本書睇下可以嗎？）」
 
面對韻喬咁誠懇嘅請求，再加上難得心目中嘅女神，會主動去搵自己，做自己喜歡嘅事，所以俊軒唔使點樣考慮都即刻點點頭話「（好呀小喬！殷殷呀！失陪先，我要陪小喬去行下搵下書睇，一陣再返嚟教你功課！你望一望睇下明唔明先！）」





天殷當然都非常識做，知道要製造多啲機會，畀俊軒同韻喬獨處，同時等韻喬對俊軒嘅好感度繼續增加，所以天殷就話「（ok呀，咁你地慢慢啦！但你同我好好咁照顧喬喬喎！）」俊軒點頭答應之後，就同韻喬一齊去搵書。

講起閲讀嘅習慣，韻喬自細就好鍾意睇書，上至天文地理科學，下至狗血至極嘅X登愛情小說，韻喬有時間有興趣嘅話都會睇，而喺屋企裏面都有大量嘅藏書。

但偏偏佢睇完一大堆愛情小說之後，韻喬都係唔明到底咩叫愛情，仲可以將自己嘅感情事搞到一塌糊塗都有......
 
至於俊軒，其實平時都係好鍾意打機，不過睇書對於佢嚟講，其實都係佢另一種消磨時間嘅“活動”，而且，今次既然係由自己心愛嘅人提出，俊軒都無托到韻喬手肘，於是就跟住韻喬一齊睇書。

喺書架裏面行咗無耐，韻喬自己就發現到心頭好，不過韻喬都發現個問題，就係本書就放到好高，高到自己隻手伸直都拎唔到，於是就同自己講話「咦，呢本咪係我想借好耐嘅書嚟囉！欸！不過好似放到好高咁喎，不如……我自己試下跳上去，睇下可唔可以攞落嚟先！」
 




之後韻喬就嘗試喺冇任何幫助之下，跳高去拎自己想要嘅嗰本書，跳咗幾下都係唔成功。

但係喺最後一次嘗試嘅時候，韻喬一個唔小心就扯到一堆書，然後連埋自己想要嘅書，一次過跌哂落嚟，於是韻喬就「哎呀！」咁叫咗出嚟。

而喺幾個身位之外，但背對韻喬嘅俊軒，喺聽到韻喬嘅呼叫聲之後，就即刻衝過去接住嗰堆跌落嚟嘅書。但萬幸嘅係，就係因為俊軒有即刻跑去接住堆書，所以韻喬先冇畀書打到個頭。
 
俊軒企返穩個馬步之後，就笑笑口同韻喬講「（小喬呀，你做咩咁唔小心，一下就扯哂啲書落嚟呀？等我睇下你有冇整親先！）」
 
之後俊軒就非常仔細咁，檢查一下韻喬有冇受傷，然後輕輕摸一摸韻喬個額頭之後就話「（嘩！好在小喬你冇整親咋！你個傻妹真係呀，明知啲書放到咁高，做咩唔過嚟叫我幫你手拎落嚟呀？如果唔係你因為咁整親嘅話，我會心痛咖！）」





韻喬並冇抗拒俊軒摸自己嘅額頭，然後喺聽到俊軒咁講之後，就笑笑口咁同俊軒講返「（多…多謝你幫我接住啲書呀，小軒！頭先因為我……唔想阻住你睇書嘛，所以咪想自己拎落嚟囉，點知一下子全部扯哂落嚟喎，仲要你即刻衝過嚟救我，真係唔好意思啦！）」

不過，當韻喬抬起頭、望向俊軒，講出上面呢番話嘅時侯，韻喬嘅眼睛就碰到俊軒溫柔嘅眼神。

突然間，呢個世界嘅時間，就好似停止咗咁，仿佛身邊嘅所有人都消失咗咁，然後剩番佢地兩個......

（待續 ~）

IG link https://instagram.com/bear_big_big_writer