《愛在。貴族學園》: Ch 21 ~ 一巴掌 Part 12

Ch 21 ~ 一巴掌 Part 12（連載日期：2022/12/16）

「我……我幾時有喎！係……係林俊軒自己叉隻腳入嚟話要幫我咋嘛！哼！」經過一輪胡鬧過後，俊軒一行人都翻上班房休息。

而下午嘅課堂，節奏都比較明快，基本上大家都忙於抄notes而冇人可以喺堂上訓到覺。
 
喺打放學鐘之後，大家都收拾好書包，此時嘉惠就行去俊軒個位度，仲冇喺俊軒嘅同意之下，就一下攬住俊軒嘅手臂，然後問俊軒「小軒呀，你今日放學之後有冇嘢做呀？我想你陪下我得唔得呀？」
 
此舉當然令目睹一切嘅天殷同禮謙側目，而韻喬此刻就感到非常莫名嘅心痛，同時間韻喬塊面都變得非常黑。所以就算有幾唔願意都好，韻喬佢地三個人先行離開，而且都要避免嘉惠嘅懷疑。
 




「呀嘉惠同學呀，真係唔好意思啦，我今日有嘢要幫老師手，所以依家要留喺學校遲少少先走！」俊軒當然冇忘記今日係要幫韻喬，對付眼前呢個狐狸精。之後俊軒就離開班房，留低嘉惠喺度，然後自己就去會合韻喬、天殷同禮謙。
 
上到教員室之後「準備好未呀你地？由其係你呀，小喬！」「我ok啦！」「我地都ok！」韻喬、天殷同禮謙都話ok之後，俊軒就通過對講機搵Ms張。

而Ms張好快就出嚟見佢地「你地想一個人一次過講哂，定係想一人講一part？」Ms張見到俊軒同韻喬佢地幾個之後就問。
 
喺佢地交換眼神考慮過之後「Ms張呀，不如都係等我一次過講啦，因為我怕韻喬同學等陣會講得唔清楚…」

「ok，咁你可以開始！」俊軒於是就將整件事嘅來龍去脈交代清楚，而其他三人都耐唔耐點頭表示俊軒所講嘅都係正確。Ms張同時都有jot notes同錄音，以方便自己同訓導組之後跟進。
 




「唔該哂林俊軒同學。估唔到黃嘉惠同學一入嚟，就搞咗咁多嘢畀大家，而且仲要到去學校外面都要咁樣…」Ms張無奈嘆息道「張韻喬同學，你就真係辛苦啦，啱啱先大病出院嚟，就即刻有人同你搶男朋友。」
 
韻喬同俊軒聽到Ms張話同對方係男女朋友之後，即刻紅都面哂，而且都唔知道應該要點樣答Ms張至好。同時間，天殷同禮謙都各自拍一拍韻喬同俊軒膊頭，以示支持佢地兩個。
 
「俊軒、韻喬同學，呢件事學校一定會嚴肅處理，因為本身打同學就已經犯咗我地校規，需要記缺點同埋打電話通知家長……」Ms張停咗一陣之後再一次講「但至於喺party發生嘅部分，因為件事喺校外發生，Ms張暫時唔可以答實你地學校會點樣處理，我要再同訓導組開會，睇下會唔會考慮一次過以影響校譽為由，處分埋嘉惠同學。」

「而呢幾日，我都會見埋嘉惠同學，睇下佢會點樣解釋呢件事，同時都會叫班長同其他科嘅老師留意一下嘉惠，睇下佢平時嘅情況係點。好啦，如果冇咩嘅話，你地可以放學啦。」
 
「多謝Ms張！聽日見！」四人道。語畢Ms張就番入教員室。





「嗱，小軒幫咗你告發嘉惠啦，小喬你就相信Ms張會幫你討回公道啦」天殷喺行開之後，就拖起韻喬隻手話。
 
「好多謝你地呀！但係，我怕嘉惠知道咗你地幫我告佢之後，佢會搵埋你地麻煩就真呀，如果最後搞到你地嘅話，我真係唔好意思呢，成日都帶麻煩畀大家！」韻喬感激嘅同時，又一次感到非常自責同内疚。
 
「唔使怕喎小喬，我地幾個嘅感情咁好，有咩事咪一齊面對囉！一定會齊上齊落咖嘛，係咪呀？天殷、禮謙！」俊軒帶小激動道，但係天殷就即刻喺度笑「哈哈！做咩突然之間咁熱血呀小軒？」
 
「啊！」「嗯？做咩事呀禮謙？突然間大叫都有嘅？」禮謙突然喺走廊叫咗一聲，但因為叫得太大聲嘅關係，唔少未走嘅同學都望過嚟，而韻喬都即刻關心一下對方到底發生咩事。
 
禮謙於是就即刻同大家道歉「呃，小喬呀，我差少少唔記得咗今日我要去補習呀，所以我要走先啦。小喬、小軒、殷殷，今日陪唔到你地一齊啦，Sorry呀。」
 
「哦，仲以為你有咩事添，不過唔緊要啦，反正我地日日返學都會見到啦！」韻喬道。

「咁你自己補習都要加油啦！！聽日見啦謙謙！bye！」天殷又有少少期待道。

「Bye！」道別之後，禮謙就消失於走廊之中。




 
「好啦，咁我地去圖書館啦做功課啦，好冇？殷殷你都應該會同小喬一齊咖可？」俊軒提議嘅同時，都確認天殷會陪自己同韻喬上去。

「我會呀喬喬，而且我都想喬喬呢個天才，可以教我功課吖嘛！嘻嘻！」天殷笑意盈盈咁回答俊軒。
 
「好呀殷殷！快啲行啦我地！唔好浪費時間呀！」韻喬非常開心咁講，然後就即刻拉住天殷，快步咁跑上去圖書館。
 
「喂，你兩個使唔使快到好似保特咁呀？等埋我得唔得呀？」俊軒抱怨道，但係兩個女仔都冇理到俊軒，一支箭咁跑上圖書館。

落後嘅俊軒就唯有苦笑一下「佢地兩個真係呀！又會跑得咁快都有嘅！」然後自己都加緊腳步上去圖書館。

（Ch 21 一巴掌 ~ 完）

IG link https://instagram.com/bear_big_big_writer