《愛在。貴族學園》: Ch 18 ~ 鬧翻 Part 7

Ch 18 ~ 鬧翻 Part 7（連載日期：2022/08/27）

（Penana版本600喜歡加更，多謝大家一直嘅支持，同希望大家都繼續喜歡我嘅故事，我先可以繼續加更落去）

入場之後，韻喬都被眼前嘅佈置同規模嚇到。而喺會場嘅工作人員帶領之下，林家一行都到達主人家安排嘅位置就坐。
 
「小軒呀，我要陪住爸爸一齊去搵天榮啲生意夥伴打招呼先，你就同小喬去搵你地啲朋友同同學先啦！」喺坐低冇耐之後，林太就同俊軒講。

「我知道啦媽媽，一陣我地再見啦！」林氏伉儷於是就行開咗，就喺冇遠見到陳氏伉儷言談甚歡。
 




「小喬，不如我地都行一陣先啦，順便睇下謙謙同天殷佢地到咗未啦！」「好呀，小軒。咁今晚…就靠你帶住我啦！」

「My Pleasure！」韻喬今晚就好似乖兔兔咁，全程都跟住俊軒行，不過佢嘅表情，都已經將自己嘅不安感徹底出賣
 
「Waiter，麻煩我地要兩杯fruit punch……唔該！」俊軒於是喺接過兩杯fruit punch之後，就將其中一杯交比韻喬。「啦小喬，你依家就飲杯野先啦，你睇下你依家幾緊張，cheers！」「哦！Cheers！」兩人於是就碰過玻璃杯。
 
「呢個fruit punch好唔好飲呀小喬？」俊軒喺自己父母唔喺身邊嘅時候，自然都對韻喬比較恭敬，而且都唔敢主動再拖起韻喬隻手，除非韻喬想拖住自己。

「幾好呀！飲落好似甜甜地咁！唔該你呀小軒。不過話時話啦，點解你地啲有錢人，會有咁多呢類嘅party嘅？」頭先韻喬喺會場裏面，聽到另外嘅一啲賓客講，話下個月又可能有party會搞，所以覺得好奇就問俊軒。
 




「哦，其實原因都係因為班大人想要拉攏生意搵錢嘛，做生不如做熟，而且多個合作夥伴好過多個競爭對手呀嘛，所以啲生意人咪利用呢類party，去維繫佢地嘅合作關係囉，又或者可以借住呢種場合，去認識更多唔同嘅生意人去，尋求潛在合作嘅機會。」

「咁當然啦，頭先我都有講過，呢啲場合都會有好多政府高官出席，所以有部分想借政策去優惠自己嘅商人，都會把握呢啲機會，直接同局長甚至司長去傾，盡量爭取自己想得到嘅嘢。所以呢，大家喺電視成日講嘅官商勾結，其實都係真咖！」俊軒繼續同韻喬解釋呢啲場合嘅用意。

「呃，原來平時大家講嘅嘢都係真實，估唔到香港真係咁黑暗…」韻喬聽完之後就搖頭嘆息「但係小軒呀，你好似仲未同我解釋，既然呢度都係大人傾生意嘅地方，咁點解你地都會喺呢啲場合出現嘅？」
 
「哈哈，小喬你終於都會問點解我地會喺度出現呢！」「係呀！你快啲講啦！我好想知道原因呀！」韻喬再飲一啖punch之後再追問俊軒。

「我地出席呢類party嘅原因，其實都係班大人，想我地啲細嘅可以喺度交朋友….」韻喬聽到之後就側住個頭。





「等大家私底下互相認識之後，就可以假以時日，等喺將來公司交棒畀我地呢啲後生接手之後，自然可以有合作嘅機會，所以依家喺度交嘅朋友，都係長遠嘅合作鋪定路。」

「就好似頭先我daddy mammy打招呼嘅，就係公司嘅合作夥伴陳家。不過我印象中，佢地有對孖女千金應該同我地差唔多大，不過今晚喺會場度，好似唔多見到佢地兩姐妹咁。」俊軒講完都即刻要飲punch。
 
「所以簡單啲嚟講，大家都係為咗“錢”，同埋“利益“呢兩樣嘢而嚟，食飯都只係其次，係咪咁嘅意思？」韻喬聽完俊軒一大輪嘅解釋之後，就總結俊軒嘅答案，然後再飲一啖punch。
 
「你….可以咁講嘅小喬。不過，因為你本身都唔係屬於呢個圈子，所以今晚其實真係可以當識多少少朋友就得，唔使太過緊張同介懷嘅嘅…」俊軒繼續安撫韻喬。
 
「知道啦小軒，一場嚟到，咪當認識下，見過你地嘅圈子私底下到底係點囉。不過呢，其實呢種場合，對我嚟講真係好唔習慣…」韻喬又鼓起泡腮喺度抱怨。

「所以呢小喬，你今晚跟住我就得咖啦。係呢，禮謙同埋天殷呢？點解好似唔覺見到佢地兩個嘅，你有冇見到佢地兩個呀？」

（待續 ~）

IG link https://instagram.com/bear_big_big_writer