《愛在。貴族學園》: Ch 17 ~ 大小姐駕到 Part 11

Ch 17 ~ 大小姐駕到 Part 11（連載日期：2022/07/29）

同時間，喺學校嘅另一邊，俊軒就帶住新嚟嘅嘉惠，喺倘大嘅校園裏面四圍參觀，等對方可以熟悉一下學校嘅學習環境，同埋各種幫同學學習同休閒嘅設施。
 
不過喺帶住嘉惠嘅沿途裏面，其實俊軒都有少少唔情願，畢竟自己心繫緊，頭先轉堂被眼前呢個女人，惡意人身攻擊嘅韻喬。

同時俊軒心裏面都覺得，參觀學校呢件相對簡單嘅事，其實可以由班上其他人去做都冇問題，完全唔明白點解嘉惠一定要搵幫緊韻喬手嘅自己去做呢樣嘢。
 
「俊軒同學呀，個花園好似好靚喔！不如我地入去睇下吖好冇呀？」嘉惠見到花園嘅環境好似好優美咁，於是就同俊軒提出入去參觀。





但喺俊軒心目中，可以嘅話同女仔行花園呢啲咁浪漫嘅事，對象就梗係要係韻喬啦！
 
「可以入去呀，反正呢個花園都係開畀學生用嘅，既然你想入去嘅話，咁就入去睇下囉！」雖然俊軒都想個小息快啲完，等自己同韻喬有返正常嘅相處時間。

但係俊軒為咗唔想引起嘉惠嘅懷疑，於是俊軒就打開花園道閘，然後就請嘉惠先入去。
 
嘉惠喺參觀過一輪之後就話「嘩！花園呢度啲花真係好靚呀！俊軒同學呀！呢度真係靚過我以前間學校嘅法院好多……果然真係一間貴族學校呢！」嘉惠賞花之後嘅心情都越來越好。
 
「喔！係咩？不過都係因為學校花王平時對啲花草樹木，都有悉心嘅照顧，再加上學校都肯投放資源落去take care佢地，所以咪可以整得咁靚囉！」俊軒好明顯喺度交行貨回應嘉惠。
 




嘉惠繼續喺花園裏面，非常陶醉咁欣賞整個環境，而俊軒就喺一個比較開嘅位置睇住嘉惠。

但喺過咗幾分鐘之後，嘉惠突然開口同俊軒講「俊軒同學呀，我有啲嘢想問下你咖！」然後嘉惠就低頭咬唇。
 
「請問咩事呀嘉惠？你係咪想知道更多有關於呢間學校嘅嘢呀？如果係嘅話，其實你可以…隨便問我！」一邊睇花一邊掛住韻喬嘅俊軒回過神來道。
 
不過嘉惠聽到俊軒咁樣開綠燈之後，突然之間面都紅哂，好怕醜咁對俊軒講「唔係關於學校嘅嘢嚟，而係其他嘢呀！」

「其他嘢？咁係關於咩咖？因為我地先第一日喺學校見面，照道理計，你應該冇咩私人嘢想問我先係真呢！」
 




俊軒越諗就越覺得唔對路，於是出反問一招，去避開嘉惠嘅問題，同時都想喺嘉惠身上得到破綻，所以就話...

「不如我問返你轉頭嘞。其實嘉惠呀，點解你會突然之間選擇轉校嚟呢度，而唔係喺9月開學嘅時候轉？反正，DSE連續三年都係同一班，就算同啲同學相處唔好都好，都應該唔會係呢一、兩個月嘅事掛。」
 
「定係，其實你選擇轉校，係有其他原因，而唔係因為學業，定還是你喺之前間學校嘅時候，同其他同學有相處嘅問題呀？」嘉惠塊面突然之間變得好紅，感覺俊軒已經睇穿咗自己一樣。
 
「俊…俊軒同學呀，其實…其實係……因為…..我…我好….鍾意你，所以….所以我先會同屋企人講…話要轉校嚟呢度咖！」嘉惠突然之間，吞吞吐吐咁將自己轉校嘅事實講出，但同時都喺花園裏面同俊軒表白，甚至想主動捉住俊軒嘅手。
 
「！！嘉惠同學呀，我諗你都應該係同我喺度開玩笑咋可？」俊軒聽罷一臉愕然，雖然平時喺學校，俊軒經常都遇到有女仔向自己表白，但都冇諗過新同學見咗兩個鍾，就話鍾意自己，所以俊軒都反問「不過，我地今日先第一次見面，你咁講會唔會….快咗少少呢？」
 
「俊軒呀，其實今日已經唔係我地第一次見面咖啦！」俊軒聽完嘉惠咁樣講，就不斷喺大腦裏面思索，到底自己幾時有見過眼前嘅嘉惠，但俊軒心諗反正自己都諗唔到答案，所以決定留返畀嘉惠去答。
 
「你唔記得啦俊軒？我就記得喺好耐之前，有一次嘅陳家嘅party之中，我無意中離遠見到你。就由嗰個時候開始，我就開始鍾意咗你！所以，你可唔可以應承我，做我男朋友呀？」

今次，嘉惠終於向俊軒發動肉體上嘅攻勢，主動拖起俊軒隻手，甚至側身用對奶，頂住俊軒嘅手臂，不停喺度磨俊軒。而面對嘉惠突然向自己表白，甚至出動到肉體上嘅引誘，俊軒依然一碌木咁唔識反應，完全冇縮手......





（待續 ~）

IG link https://instagram.com/bear_big_big_writer