《愛在。貴族學園》: Ch 17 ~ 大小姐駕到 Part 10

Ch 17 ~ 大小姐駕到 Part 10（連載日期：2022/07/24）

過咗5分鐘之後，不幸錯過咗一段八點檔嘅天殷，好開心咁行返入5A班房...

「喬喬呀，你嘅朱奶！你摸下，佢仲係暖咖！」天殷一臉興奮咁，將朱古力奶輕輕咁放喺韻喬張檯枱上面。

「嗯嗯！同我放低喺度先啦，我轉頭就會飲咖啦。唔該你呀殷殷！一陣我先畀返錢你啦！」韻喬此時正喺度努力咁，壓抑住自己嘅情緒，所以都冇望住天殷，只係繼續頭耷耷咁整嘢。
 
「唔使唔該喎喬喬，橫掂我都係想買少少嘢食嘛…」講講下，天殷已經咬住咗個三文治喺度食...





「你個list搞唔搞得掂呀？搞唔掂就叫我地幫手喎！咦喂，張韻喬呀，軒仔佢去咗邊呀？佢頭先唔係喺度幫你整緊嘢咖咩？」
 
「唔緊要啦，呢啲嘢都係好簡單啫，我自己一個搞得掂咖啦，你食嘢先啦殷殷，唔使理我！」韻喬繼續用cool爆爆嘅語氣咁答天殷，仲要唔想天殷知道嘉惠頭先喺度搞事而講個大話出嚟「至於林俊軒呢，佢就有啲事行開咗，好似話要去幫另一個老師手！」

「哦！原來係咁！」天殷終於都發現到，韻喬突然之間對自己咁冷淡，完全唔係平時自己所認識、會同自己好多嘢講嘅張韻喬。

於是天殷就哄到好埋去韻喬度，去望一望韻喬到底發生咩事。不過韻喬一開始都唔知道天殷望緊自己。
 
「喂！你喺度望咩呀你，李天殷？而且你突然之間哄到咁埋做咩呀？乜我塊面上面有嘢咩？」韻喬喺過咗30秒之後，先發現天殷一直望住自己，然後再用手摸一摸自己塊面。不過韻喬就摸到自己嘅淚水
 




「小喬，你隻眼做咩突然之間紅哂？你頭先喺我行開嘅時候有喊過嚟咩？」天殷非常擔心咁講，然後心裏面就有一股不安嘅感覺湧出，於是繼續好緊張問「係咪又有人蝦你呀？係就唔怕同我地講喎！我地都一定會幫喬喬你嘅！」

雖然天殷講中咗自己因為咩而喊，但韻喬明顯唔想天殷或者其他同學介入，帶麻煩畀其他同學，所以先至開口話...

「傻妹呀！你又諗咗去邊呀？我都話我冇事喎！而且無啦啦喺班房喊乜鬼先得咖？！」不過韻喬依然好冰冷咁回應，同時都繼續去整理手上嘅名單。

但正因為天殷同韻喬真係情同姐妹，就算韻喬不停話自己冇事都好，天殷都已經睇穿咗韻喬，係因為喺轉堂嗰陣，嘉惠針對自己嘅說話同舉動而唔開心。但又為咗可以真正幫到好姐妹，於是天殷都係要直接問韻喬……
 
「張韻喬！我李天殷好認真咁同你講，如果你真係當我係你好姐妹嘅話，你就坦白咁答我！講！你頭先到底係唔係因為小嘉轉堂嘅時候，對你所做嘅事，所以唔開心同喊過嚟？」





韻喬因為畀天殷一眼睇穿，所以内心抖動咗一下。但自己為咗唔想天殷喺度亂諗，或者幫自己向嘉惠報復，而加劇同學之間矛盾。

所以韻喬都放低手上嘅名單，故作堅強咁微笑「我梗係唔係啦，殷殷你今次太多心啦！而且我一直喺學校内外，都見過咁多風浪，我又點會為咗嗰少少事就喊先得咖？」

「如果你冇事就好啦喬喬！不過如果你真係有唔開心嘅話，你記得記得記得一定要同我講喔，而且你有咩事嘅話，我都會同你一齊面對咖！」天殷最後都係講唔過韻喬，但依然深信韻喬一定再有被嘉惠嘅說話所傷害。

「知道啦！多謝殷殷。嗱，依家小妹我就一於畀個機會你幫我手啦！一陣間我搞掂之後，你就幫一幫我對下有冇整錯，唔該你啦殷殷！」韻喬講講下就將名單放到天殷枱面，然後自己就伏喺枱度休息，順便都可以自己喺度偷喊。

（待續 ~）

IG link https://instagram.com/bear_big_big_writer