《愛在。貴族學園》: Ch 17 ~ 大小姐駕到 Part 8

Ch 17 ~ 大小姐駕到 Part 8（連載日期：2022/07/15）

不過，喺韻喬準備再答天殷嘅時候，就有人喺佢地身邊講嘢「呃，早晨呀小喬，唔知你今日精神有冇再好番啲呢？我見到你今日嘅面色唔錯咁！而且喺頭先Quiz嘅時候，我好似見你戰鬥力都好高呢！」俊軒喺無意中，走咗過嚟韻喬個位，問候一下對方。
 
韻喬於是就拎轉頭，見到係俊軒之後，就有少少怕醜咁答「咦，係…係你呀小軒？早晨呀，我其實都已經好好多咖啦，多謝你關心先。但就係因為食咗藥，所以就會有少少眼訓啫！」

俊軒聽到韻喬冇事之後，就即刻好放心咁話「你越嚟越精神咁咪幾好！不過以小喬你嘅實力，都唔會怕去402咖啦，而且你頭先唔係先話過，Mr Ho今次又出份垃圾畀大家咩？」

「喂呀！笑人嘅！」韻喬紅都面哂咁，嘟起個嘴仔喺度抗議，但係會飲水思源嘅韻喬，都要趁呢個機會多謝俊軒一樣嘢...





「不過，我都係多得你我喺醫院住嘅時候，你教得我咁好，同埋份notes又夠詳細，我先可以過到今次個quiz咋，所以……今次真係多謝你！」

「唔使客氣啦小喬！能夠為張韻喬呢位絕色又聰明嘅美女服務，都係我林俊軒……一生嘅榮幸嚟！」說罷，俊軒都主動幫韻喬手，整理手上嘅名單。

當然，天殷聽到俊軒咁講，都一如以往咁喺度笑，而韻喬就非常不滿咁大聲講「林俊軒！你個死人頭又……又喺度口花花flirt我啦你！成日都假到死！唔理你啦！」

「咁小喬你又唔好太辛苦，始終你都係好番唔係好耐…..」俊軒講完之後，韻喬都唔再理俊軒，但都冇抗拒俊軒幫自己喺度整理手上嘅名單。
 
就喺韻喬繼續同俊軒喺度整嘢嘅嘅時候，就坐喺後面邊嘅嘉惠，見到俊軒同韻喬兩個喺度傾計傾得咁開心，於是心有不甘頭先喺轉堂嘅時候，畀張韻喬呢個喺自己眼中，屬於“窮等人家”而冇資格叫自己小嘉，當面指責自己思想古老、離地，於是就強行插入俊軒同韻喬之間嘅對話。





「呀唔好意思呀，呢位咁熟口面嘅男同學，我想問一問清楚，你應該就係林家天榮集團嘅二少爺、林俊軒同學啦可？」嘉惠帶住一股疑問嘅語氣，但又明知故問咁問俊軒。
 
對於嘉惠呢個新同學，可以叫得出自己個全名，仲有屋企公司嘅名稱，但明明今日先係第一次喺學校見面，俊軒當然就非常驚訝。

於是將自己由幫助韻喬整理名單嘅工作之中抽咗出嚟，然後成碌木咁企喺度。

「咳咳…..冇錯，我就係林家二少爺林俊軒。請問嘉惠同學，你有咩事搵我呢？」俊軒回一回過神之後，就一臉正經咁望住嘉惠。

而韻喬就一直喺度一邊做嘢，一邊暗中觀察，呢個頭先同自己槓上嘅新同學，到底同俊軒有咩花臣可以搞。





「果然係你呢俊軒少爺，估唔到會喺呢間學校見返你，而且仲要係同班同學。不過我想請問……唔知你依家方唔方便，幫我去做一樣簡單嘅嘢呢？」嘉惠喺確認俊軒身份之後，就兩眼發光咁，向俊軒問道。
 
「呀唔好意思，請問嘉惠同學你到底想我點樣幫你呢？」俊軒此時已經坐咗喺天殷個位度，然後再次拎起堆名單，準備繼續幫韻喬手去整，而嘉惠嘅表情，都因為俊軒一直幫韻喬手，而顯得非常不滿。
 
「俊軒呀，唔知道你可唔可以呢，依家帶我去行下呢間學校唔同嘅地方，等我可以參觀一下之餘，順便都知道啲特別室呀、小食部之類嘅地方喺邊呢？」嘉惠稍為提高自己嘅聲線，目的就係要韻喬聽到，但韻喬依然不發一言，繼續做佢手上嘅嘢。

（待續 ~）

IG link https://instagram.com/bear_big_big_writer