《愛在。貴族學園》: Ch 17 ~ 大小姐駕到 Part 7

Ch 17 ~ 大小姐駕到 Part 7（連載日期：2022/07/13）

正當天殷準備收禮謙Signal嘅時候，畀韻喬連環炮轟、寸到一棟都冇嘅嘉惠，當然都唔會就咁認輸、屈服喺自己睇唔起嘅人之下啦，於是怒髮衝冠咁講...

「你你你……你個張韻喬幾好嘢！一個窮鬼，居然夠膽用咁樣嘅語氣同我講野？！哼！你今次死緊啦！我….我唔搞死你嘅話，我就以後都唔姓黃！」
 
不過，嘉惠一講完呢句之後，班房嘅氣氛就瞬間凝結，因為教數學嘅老師Mr Ho就急步殺入5A班房，然後再一次投下震撼彈...

「大家即刻收埋書，依家突擊測驗！照舊都係唔合格嘅，派卷嗰日放學同我去402做數！！」一下子5A全班又一次陷入兵荒馬亂之中。
 




「唉，又玩突擊測驗！求carry呀學霸軒，我唔想去放學又去402呀！」畀Mr Ho嚇到面色蒼白嘅禮謙，又一次向死黨俊軒求救。
 
雖然自己成績幾乎全班最好，但係俊軒一直都對Mr Ho呢個測驗狂魔敬畏三分「真係呀！Mr Ho真係玩極都唔厭咖喎！放心啦謙謙，我唔會睇住你死，然後等你畀天才喬笑你要去402嘅！」俊軒拍哂心口咁講，但同時都暗寸禮謙成績麻麻。
 
講起數學突擊測驗，自從喺過咗10月之後，Mr Ho玩突襲測驗嘅次數都開始加密咗唔少，基本上每次都有同學，因為溫書溫得唔夠快而稍為失手，而被逼放學之後要去402室留堂做數學練習。
 
至於喺班房嘅另一邊，當然都有人對成績好嘅同學，發出求救信號啦「天才喬呀，Mr Ho又喺度發癲啦！麻煩幫幫大家手啦好冇！」天殷寫咗張memo紙，直接貼喺韻喬張枱上面。
 
「得啦長氣，照舊就包喺我身上啦！不過唔該你地呀！勤力啲溫書呀！」韻喬於是就直接將呢句，寫返上memo紙上面回答天殷，廢事自己會放水嘅事，畀後面嘅嘉惠知道。當然天殷都即刻多謝韻喬。
 




不過Mr Ho都好快發現嘉惠嘅存在，因為一個本來嘅空位，突然之間多咗個人，都好難會唔發現。

所以Mr Ho就同嘉惠打招呼「咦，乜你地5A多咗個新同學呀？你好，我係5A嘅數學老師，姓何，你可以叫我Mr Ho。請問新同學你叫咩名？」
 
嘉惠聽到Mr Ho叫自己之後，好快就起身同Mr Ho介紹自己「你好呀Mr Ho，我個名叫黃嘉惠，今日第一日喺呢度返學，請你以後多多指教！」
 
「好嘅，唔該嘉惠同學。不過今日真係唔好意思啦，就算你今日第一日喺度返學都好啦，都係要同佢地一樣接受突擊測驗。不過都好嘅，今次測驗順便都可以等我睇下你嘅水平去到邊度，一陣間盡力做啦！」

「知道Mr Ho！」Mr Ho之後一邊講一邊派卷，然後一開始大家就開始做quiz。





過咗大概40分鐘，突擊測驗就結束「唉呀！天才喬呀！頭先個quiz點解可以咁難咖！？我真係好怕放學又要去402，然後畀Mr Ho嘅日月精華折磨至死呀！」天殷喺收卷之後，就即刻同韻喬抱怨Mr Ho出卷太深。
 
佢地之所以可以講Mr Ho壞話講得咁大聲，咁就因為依家已經到咗小息時間，大家都開始討論頭先個quiz。

而且諷刺嘅係，Mr Ho直接用一個quiz，就咩書都冇講過就賺到一堂嘅人工。
 
「李天殷呀！你到底有冇溫書咖？！頭先Mr Ho嗰份嘢，咪又係一貫嘅垃圾，仲淺過之前啦，如果你有溫書嘅話，就自然會識咖啦！」韻喬又再一次擺出一副不屑嘅表情，去諷刺Mr Ho出卷太淺，同時開始喺櫃桶裏面，拎出一堆名單喺度整理。
 
韻喬之所以要整理名單，係因為今朝班主任堂嘅時候，Mr張要求韻喬去做嘅班務工作。

而天殷又一次聽到韻喬咁大口氣去評價Mr Ho嘅測驗，就即刻扁哂嘴咁喺度扭計「大姐呀！你自己就話係天才啫，但我地其他人都唔係呀嘛！都唔知點解次次我地班嘅quiz，都係幾乎全級裏面最難嗰份嚟嘅！？」
 
不過，喺韻喬準備再答天殷嘅時候，就有人喺佢地身邊講嘢...

（待續 ~）





IG link https://instagram.com/bear_big_big_writer