《愛在。貴族學園》: Ch 17 ~ 大小姐駕到 Part 5

Ch 17 ~ 大小姐駕到 Part 5（連載日期：2022/07/08）

天殷聽到嘉惠頭先嘅問題，都覺得有少少愕然同尷尬，於是心裏面就覺得...

“嘩，呢個太子女講嘢，好似有少少爆咁，咁快就咁樣講說話畀我地全班嘅天才喬喬聽？睇嚟我都係小心啲答啦！”。

喺收拾心情之後，天殷就開始答嘉惠。

「（呃，小嘉呀，不如等我同你介紹一下啦。其實呢個女仔呢，可以話係我地班，甚至可以呢間學校裏面嘅傳說嚟咖！）」





「（下！？點解咁講呀？一個件校服咁舊嘅人，都可以做到學校裏面嘅傳說中嘅人物咁巴閉！？）」嘉惠對天殷嘅講法提出質疑，而韻喬就一邊背對住嘉惠黑面，一邊繼續聽嘉惠會繼續講咩去形容自己。

天殷冇理到嘉惠嘅質疑就繼續解釋「（因為佢係我地高Form裏面，唯一嘅普通人學生。佢個名叫做張韻喬，大家喺學校度都會叫佢做小喬。）」

「（而且我都聽其他Form 1嗰年同佢同班嘅人講話，當年都係校董會，見到小喬佢嘅成績實在太好之後，於是就開咗個好好嘅條件，畀小喬父母同原先嘅學校，將小喬由原本間學校挖角，邀請佢入嚟讀咖！）」

嘉惠喺聽到天殷咁樣介紹韻喬之後，反應就更加大「（咩話！佢只係普通人？！等等先呀天殷，乜呢間學校一直以嚟出哂名，都唔係得啲達官貴人嘅家庭，先可以申請或者派入嚟讀咖咩？之前我見親呢度好多學生嘅屋企，個個都喺香港有頭有面咖喎！）」

「（係就係，不過個傳說我都未講完，你聽我講埋先啦……）」天殷於是就叫嘉惠聽自己講埋落去先





「（小喬之所以可以成為我地學校嘅傳說人物，係因為佢喺轉校入嚟讀之後，基本上就包攬哂學校啲獎助學金，直到依家都仲係冇人打破到佢嘅紀錄，所以可以話小喬佢係靠自己嘅努力同聰明，先可以繼續喺度讀書咋！）」

其實韻喬喺聽到天殷咁樣介紹自己，心裏面都唔係幾好意思，因為韻喬一直都好想喺學校裏面，低調咁去做一個普通嘅學生。但當然事與願違，自己經常成為Secret茶餘飯後話題不在話下。

同一時間就係有更多男同學，刻意用諸多原因藉機親近自己。而俊軒同禮謙心裏面，都為自己心愛嘅韻喬而感到驕傲。但因為事情都仲係發展之中，所以佢地都繼續凝視住天殷同嘉惠嘅方向。

嘉惠聽到天殷對韻喬捧到上天嘅形容之後，就又一次提出質疑，於是就反問天殷話...

「（下，唔係呀嘛！？佢屋企係咁窮嘅話，好心就唔好入嚟呢間學校讀書啦！就算包哂啲獎助學金又點呀？佢始終都唔係同我地同level！）」





此時俊軒、禮謙甚至其他同學，都開始怒啤嘉惠，但嘉惠依然冇發現到。

至於天殷，聽完之後面色都開始有少少奇怪，同時喺心裏面都感到非常不安，因為要喺度猜度，韻喬依家嘅感覺會係點，自己又應該要點樣答嘉惠，閒唔會傷害到韻喬。
 
相信大家都估唔到，呢位新同學第一日返學就爆seed，去指責張韻喬呢位5A之光不是，所以都令到坐喺附近嘅同學都即刻望過嚟。

而天殷就更加係非常尷尬，完全唔知點接落去，所以就話「呃小嘉呀，你咁樣講好似……」

不過韻喬喺聽到呢度之後，認為嘉惠係喺度惡意人身攻擊自己，所以都決定唔再容忍落去。

於是就用帶有殺氣嘅微笑，擰轉身望去後面嘅嘉惠，去打斷天殷嘅說話，同時都同睇唔起自己背景嘅嘉惠講...

「你好呀，小嘉同學啊可！歡迎你嚟到我地呢間學校。不過我想講嘅……」

（待續 ~）





IG link https://instagram.com/bear_big_big_writer