《愛在。貴族學園》: Ch 17 ~ 大小姐駕到 Part 4

Ch 17 ~ 大小姐駕到 Part 4（連載日期：2022/07/06）

「呃…你好呀同學，我係小嘉。請問我可以點稱呼你？」

「小嘉你好！我叫做李天殷，你可以叫我做天殷或者殷殷，以後多多指教啦！」天殷面露微笑咁回答嘉惠。
 
於是嘉惠就再開聲話「天殷同學你好呀。嗯，我想問你可唔可以借一借你本手冊，然後將我地班個時間表比我抄呀？因為Ms張同校務處頭先都冇印畀我，唔該哂你！」

「可以呀小嘉！嗱！」於是天殷就將本手冊，交到嘉惠手上，等嘉惠可以自己抄timetable。
 




「小嘉你可以慢慢抄咖，我依家唔係太急住要用手冊」天殷將時間表嘅一版，揭開到嘉惠面前，一來對新認識嘅嘉惠要有禮貌，二來，天殷都唔想嘉惠，睇到自己手冊前面嘅個人資料。
 
「唔係，如果會阻住你上堂嘅話，都唔係太好嘅，我都係快手少少抄啦！」於是嘉惠就一邊好快手咁抄timetable，一邊同前面嘅天殷講。
 
過咗幾分鐘，嘉惠又拍一拍天殷膊頭「（天殷同學，我抄完啦，嗱，我還返本手冊畀你，唔該你呀！）」
 
「（唔使客氣啦！我地話哂都叫係同學吖嘛！不過我地都係上堂先啦小嘉！）」天殷於是一邊攞返本手冊，一邊同嘉惠講。
 
而喺正式講書之前，嘉惠就趁機環視四周，但好快嘉惠就注意到，坐喺天殷隔離嘅韻喬，原因就係因為韻喬嘅校服比較舊，同班上其他同學明顯有分別。但因為依家上緊班主任嘅堂，所以嘉惠都冇即刻搵天殷問清楚。
 




終於都到轉堂嘅時候，天殷今次就主動擰去後面，問下嘉惠上完第一堂嘅感覺「小嘉！我想知道呢，你頭先跟唔跟到Ms張講書個節奏呀？」
 
其實Ms張喺5A教書個節奏，往往都會比其他班嘅進度快少少，原因就係因為喺5A呢度，有韻喬同俊軒呢兩個天才級勁人喺度坐鎮。

再加上Form 5A整體嘅成績其實都比其他班好，所以都可以喺學校教快少少，然後自己返屋企溫書。

不過，雖然係成績好好，但偏偏呢班個個都有小聰明嘅5A，絕大部分同學私底下其實都好懶，好多時候都好鍾意抄功課，特別係俊軒同韻喬兩個嘅功課，因為都都係高分嘅保證嘛......
 
「（嗯……唔知點解我覺得，Ms張教得好似有少少快咁，我都叫做勉強跟到，但係都好似有少少吃力。不過唔緊要啦，我返去都應該會溫書嘅，天殷同學！）」嘉惠於是一邊翻閲自己頭先所寫嘅筆記，然後一邊同天殷講。





天殷於是就好開心咁講「（咁就好啦，希望你會慢慢習慣啦小嘉！）」

「（多謝天殷你先，但係我都一定會慢慢適應呢！不過天殷呀，我有啲其他嘢想問你，唔知你會唔會好介意？）」嘉惠此時臉色一沉，先瞄一下喺天殷隔離嘅韻喬，然後就好似有氣場咁對住天殷問。
 
「（做咩突然之間咁樣呀小嘉，歡迎你隨便問喎！而且Ms張都有話過，我地要盡量幫新同學融入環境咖嘛！）」天殷仲係笑笑口咁講，基本上對於嘉惠嘅認真毫無戒心，畢竟天殷暫時都睇唔穿嘉惠嘅城府。
 
「（我想問下呢……你隔離個女同學係邊個啊？點解佢身上着住嘅嗰件校服，好似咁舊咁嘅？）」嘉惠喺講嘅時候，指一指住坐喺天殷隔離嘅韻喬嘅背影，然後就問天殷。
 
至於坐喺前面、喺度睇緊自己筆記嘅韻喬，其實係有聽到嘉惠對天殷嘅說話，直覺就知道嘉惠係講緊自己。

但因為自己啱啱先出院，而且仲要食緊出院藥，所以韻喬今日嘅狀態都唔係話太好，而有少少眼訓。

於是本來想自己同嘉惠自介嘅韻喬，就決定等天殷同嘉惠介紹自己嘅時候，先至再同嘉惠講嘢。
 
不過，坐喺遠處嘅俊軒同禮謙，都聽到嘉惠對天殷講嘅呢番說話，於是兩個都即刻面色一沉。





但因為係喺轉堂關係，再加上避免韻喬覺得，兩人仲喺度爭奪自己，所以就冇出到聲，而係選擇喺交換眼神之後，繼續靜觀其變……

（待續 ~）

IG link https://instagram.com/bear_big_big_writer