《愛在。貴族學園》: Ch 16 ~ 麻煩的一天 Part 5
Ch 16 ~ 麻煩的一天 Part 5（連載日期：2022/05/25）
「今晚，好在你地兩個都聽我講咋！」天殷先開口同兩個男仔講「如果你地兩個可以繼續好似今晚咁，我相信小喬應該都唔會太過介意你地喺度爭嘅…」
「但係，如果你地喺韻喬返學之後，再好似過去呢幾日咁，互相用啲咁難睇嘅手段去爭嘅話，我諗好大機會去到最後，你地兩個都唔會得到小喬…」
「所以我希望，你地兩個可以進行君子之爭，由其係你呀林俊軒，唔好搞咁多小動作啦！居然叫其他女仔唔好接近禮謙，喺度杯人，我都唔知道你地到底想點！」
「咪就係囉！好心你就唔好真係當學校班女，真係你啲後宮至得咖！」禮謙加入指責俊軒嘅行列。
不過俊軒就反駁話「咩呀！？我幾時有叫佢地杯你呀？！你地兩個唔好打橫嚟講喎！」
「下！我明明聽到5C同5D都有人咁講喎，最好真係我聽錯啦下？！一個話就可能話冇啫，但我聽到成十個喎林俊軒，你點樣解釋呀？」禮謙喺度反駁俊軒嘅說話。
「咁林俊軒你自己呢？又要同我爭住追小喬，但你自己又私底下繼續搵其他女仔，仲要畀我地捉到，咁你又點解釋呀？」
「咩呀！我都係教佢地功課咋嘛，而且佢地都自己走嚟搵我嘅！而且唔係你話要我對其他人有禮貌咩？！」俊軒反駁禮謙嘅說話。
禮謙今次真係嬲到爆炸，所以就忍唔住話「係呀，不過我係叫你對我地好禮貌啲，唔係其他蝴蝶呀！」
之後，就喺兩個男仔繼續你一言我一語咁人身攻擊對方，剩低嘅佢地三個人最後喺電話，都因為俊軒同禮謙就爭奪韻喬問題而激烈爭吵，最後不歡而散......
終於去到星期四朝早，“DDDD” ，喺聽到鬧鐘嘅響聲之後，休息多時嘅韻喬準時起身。
韻喬照過房裏面嘅鏡，見自己今日都好似好精神之後，就同自己話「不如，今日都係返學啦，橫掂我自己一個留喺屋企都冇嘢做嘅，不如返去學校見下大家都好！」
所以韻喬好快就落床，然後快快手沖個涼幫自己提神，之後換過校服同收拾好返學要用嘅嘢，再落街行出英皇道搭巴士返學。
但隨住天氣都越嚟越涼，韻喬今日都要加件長袖冷衫返學，同時都帶定一條頸巾，以備不時之需。
8點05分，韻喬拎住喺上車之前買嘅早餐，打開Form 5A班房門口，然後好開心咁同大家講「早晨呀各位，我終於都返嚟啦！」
而Form 5A嘅衆人見到韻喬踏入班房之後，都好高興話「咦，係張韻喬同學喎！早晨呀小喬，你終於都返嚟啦！」
韻喬於是點點頭「係啊，咁既然醫生都放我出院囉，咁我即係冇事啦，咁我仲宅喺屋企做咩喎？！梗係第一時間返嚟學校見下大家啦！」韻喬喺位坐低之後，就開始一邊食早餐，一邊同個幾禮拜冇見嘅大家傾計。
「又係嘅，一向充滿上進心嘅你，先至係小喬你嘅風格吖嘛！」「誇張啦你地！」
「話說呢小喬呀，你鍾唔鍾意我地5A之前送畀你嗰張心意卡吖？」又喺度做緊功課嘅班會主席趙建龍，坐喺位上面問韻喬。
「我鍾意呀建龍，而且我喺醫院嘅時候，都有影低張卡擺上ig咖！我見到你地都有Like過張卡，而且嗰日喺醫院度，喺程禮謙同學拎出嚟嗰陣，我心裏面真係感受到你地好有愛，我見到都好開心。好多謝你地！」韻喬一邊記起當日嘅事，一邊感謝大家對自己嘅愛。
「哈哈，你真係客氣啦小喬，對於我可以親手，將5A嘅愛心送到你嘅手上，都係我嘅榮幸嚟呢！」喺位嘅禮謙聽到韻喬多謝自己，於是就好有禮貌咁回應韻喬對自己嘅感謝。
「除咗謙謙之外，你當然仲要多謝Ms張、天殷同埋我啦！」俊軒一返到班房就即刻插嘴，同時都怒啤禮謙搶自己風頭。
韻喬聽到係俊軒把聲，就即刻將焦點轉到對方身上「咦，早晨呀林二少爺！做咩你……今日咁遲嘅？」韻喬一邊繼續咬麵包，一邊好好奇咁問俊軒。
「早晨呀小喬，因為屋企附近有少少塞車，所以咪遲咗少少囉，反正我冇遲到就已經得啦！」俊軒回答道「不過小喬……你係咪真係好返哂咖啦？Ms張其實有畀你休息多一日喎，你又有醫生紙，點解你唔請埋日假佢嘅？」
「我得咖啦，啊“爸爸”，你就少擔心張韻喬我啦。而且，我爸爸媽媽都仲未返嚟香港呢！屋企得我一個對住啲櫃同電視機咪仲無聊！？」韻喬答返俊軒。
「既然係咁嘅話，咁我不如返嚟學校，同大家一齊上堂同玩唔好？而且喺學校有人可以陪我傾計，我仲開心添呀！」
「咁老實講又真係嘅。不過張韻喬呀，你呀，記得要…..」「準時食藥呀嘛！」韻喬同天殷一齊答俊軒，搞到俊軒都即刻無嘢好講。
然後韻喬又繼續抱怨話「你呀，真係好煩呀！成部錄音機咁！長氣到死！」
「小喬講得你冇錯呀！小軒你真係好似一部人肉錄音機，不停咁喺度重複又重複！就咁睇嚟，俊軒同學你將來都好有potential去做高官！只要不停重複同一堆說話去答記者同議員就已經得！」一旁嘅大家聽到之後都哈哈大笑，俊軒此時塊面紅過個布冧。
一輪嘻嘻哈哈同食早餐過後，又到打鐘正式上堂嘅時間.班主任Ms張好快返到班房同大家點名。
Ms張第一眼就見到韻喬坐咗喺位度，所以第一時間就同韻喬打招呼……
（待續 ~）
IG link https://instagram.com/bear_big_big_writer