《愛在。貴族學園》: Ch 16 ~ 麻煩的一天 Part 4

Ch 16 ~ 麻煩的一天 Part 4（連載日期：2022/05/24）

喺餐廳搵到位坐低之後，佢地幾個就即刻點咗一堆食物。而喺個湯底都開始水滾之後......

「Cheers！慶祝我張韻喬戰勝肺炎出院！Yeah！」韻喬有少少high咁同大家講，四人互相碰杯。

而俊軒佢地見到韻喬喺度自high之後，就有少少尷尬咁喺度陪韻喬笑。
 
「我真係服咗你呀，張韻喬！」天殷依然好無奈咁講。





「小喬你呀，以後你感覺到自己唔舒服嘅話，就一定要即刻出聲呀。如果覺得自己好似病病地咁，就更加要睇醫生同埋要準時食藥呀！知道未呀？」俊軒再一次回復上禮拜嘅“爸爸”本色咁去提醒韻喬，順便就將一件獅子狗放入口中。「好食！」
 
「嘩呀救命呀！林爸爸！你真係過咗成個禮拜，都仲可以咁長氣咖喎！完全就好似政府高官啲人肉錄音機咁！不如呢，你大學畢業之後，去政府考AO啦，薪優糧準之餘，又可以坐住個腦返工又唔使OT！」韻喬鼓起泡鰓抱怨同揶揄俊軒。
 
俊軒畀韻喬呢一句徹底KO，完全無力反駁「你！……」

「小喬呀，軒仔咁樣提醒你，都係因為佢關心同在乎你，同埋出於好心啫。不過好老實講呀，如果換轉係我同天殷，我同佢都會好似軒仔咁一樣會咁叫你都唔出奇…」禮謙一邊夾牛肉一邊同韻喬講。
 
「禮謙其實講得冇錯呀，而且今次我地照顧你，就當畀我報答返你平時喺學校度，carry我同文曦佢地嘅恩啦，不過你就算覺得我地長氣，我地都要再講多次，經過今次之後，唔該你真係要學識照顧自己呀！知道未呀張韻喬？」天殷最後補充道。
 




「知道啦！你地三個長氣鬼！不過好坦白同你地講啦，其實我一直都唔係太習慣畀人carry！而且今次仲要你地班有錢人嚟carry我，搞到我都唔知點還返啲人情畀你地……」韻喬喺煲裏面都夾咗片牛肉畀自己食。
 
「你就梗係唔習慣畀人carry啦，因為你實在太聰明啦，搞到全級喺學業上，都冇一個人可以carry到你，呢，就除咗軒軒一個可以之外……」禮謙喺講出事實嘅同時，俊軒同韻喬都一齊將白眼反到上天花板。
 
韻喬於是一臉嫌棄咁講「誇張啦你程禮謙同學！」

「我都係講事實啫張韻喬！」禮謙反駁韻喬嘅抱怨。

「不過呢，好在呢幾日都係靠俊軒carry我功課同書本上嘅嘢，如果唔係，我之後都唔知點catch up，所以今次我要多謝佢就真！」韻喬紅住面咁講，然後再舉起杯同俊軒敬飲一杯。
 




「Cheers！都係舉手之勞啫小喬！」俊軒都連忙舉杯表示感謝「不過，如果要配合小喬個level可以carry到佢嘅話，我就真係要慶幸自己成績同你差唔多先得。但我都好多謝你，今次畀咗個機會我，等我可以carry你一個禮拜。再同你Cheers！」俊軒都好有禮貌回敬韻喬。
 
「哈！識咗你咁多年，都仲講呢啲都有嘅，快啲食嘢啦你，因住搞到個煲燶啦！」韻喬見到之後就喺度頂嘴。

「咁你之前到依家當我係咩先？」俊軒於是試探性咁問韻喬對自己嘅睇法，而呢條問題，自然都引起禮謙嘅注意。

「嗯……初初都當你係朋友嘅，但係你後來就衰啦，成日喺學校度Flirt女，我就覺得你好濫啦！」

「原來你咁睇我咖？！」俊軒有少少尷尬同時都微有不滿咁講，但係韻喬就繼續講落去話「不過，最近呢，我都發現我自己都開始慢慢接受返你……不過都仲係好朋友嘅階段咁樣囉…」

韻喬嘅回答，令俊軒感到其實對方仲當自己好朋友而已，或者自己都繼續需要加倍努力、時間同埋耐心，去令韻喬鍾意自己。

或者令韻喬對自己有友達以上、戀人未滿嘅感覺。雖然係咁，但對於同樣對韻喬有意思嘅禮謙，就依然唔能夠可以安心。

呢個開心嘅飯局就繼續進行，大家都喺度講下是非，又或者分享係自己平時生活嘅趣事，等大家都比平時喺學校，更加深入咁了解大家。





當然重點係，今餐飯都令兩個男仔對於韻喬，有更深入嘅認識。
 
佢地食咗差唔多兩個幾鍾之後，就先送韻喬返上去，喺同韻喬道別過後，其餘三個人都各自登上自己嘅座駕歸家。

喺大家都返到去梳洗之後，四個人都喺電話裏面，傾咗一陣功課同其他嘢，但最後韻喬因為食咗藥而非常眼訓，所以就第一個收線，先上床休息。

而天殷就繼續同俊軒、禮謙繼續傾，而且都傾到感情嘅問題……

（待續 ~）

IG link https://instagram.com/bear_big_big_writer