《愛在。貴族學園》: Ch 11 ~ 首次獨處 Part 2

Ch 11 ~ 首次獨處 Part 2（連載日期：2022/01/10）

俊軒好快就意識到一個非常嚴重嘅諗法…….
 
「呀！唔通….唔通….我真係鐘意咗….張韻喬…..呢個暴力狂？！」此時，俊軒已經被自己嚇到面青口唇白。

「冇可能！冇可能咖！我點會有可能愛上佢至得咖？！林俊軒你唔可以，你真係唔可以再亂諗呀！」
 
為咗令自己可以盡快忘記呢個異常危險嘅諗法，俊軒於是即刻跑去洗手間，沖個凍水涼去沖醒自己。





不過，俊軒都為免重蹈兩個禮拜前，因為發夢遲到而被Ms 張當住5A全班面前，鬧到上天花板嘅覆徹。

所以喺沖完換好校服之後，俊軒都即刻跑落樓，然後連早餐都唔喺屋企食，就直接出門口返學。

當然，俊軒就有將早餐帶返學校先食。而喺車上，俊軒都因為怕遲到嘅關係，心跳變得非常之快之餘，仲走去叫司機開快車。

結果俊軒都好似平時咁嘅時間返到學校，喺坐低喺自己位之後，俊軒就喺心裏面就同自己講

“呼！好在啫！如果我又再遲到嘅話，今次實會畀Ms張罰留堂添呀！”然後先再繼續喺個位度食早餐。





不過，當韻喬趕到返班房嘅時候，俊軒又好似之前咁，成個人開始精神緊張起黎，因為自己都唔知道，到底今日韻喬會點樣對自己。

但係俊軒就一邊食早餐，一路就望住一邊玩電話一邊食早餐嘅韻喬。

但係好快，喺一個唔小心之下，俊軒同韻喬居然對到眼，場面於是變得異常尷尬，佢地兩個點頭打招呼之後，都互相回避對方嘅眼神。

同時自己塊面都變得好紅，個身又好似今朝咁好熱。而韻喬仲嚇到即刻搵天殷傾計，但係俊軒就唔知道佢地兩個講咩。

不過，因為今日學校有早會嘅關係，所以大家都要去禮堂度，聽老師甚至校長嘅廢話，因而搞到大家都好眼訓。而喺返上去班房之後，





「呃……小軒呀！」「係！」俊軒聽到有人叫自己，於是就擰轉身一睇，原來係韻喬同天殷，而頭先同俊軒打招呼嘅，係韻喬。

不過韻喬塊面又係紅哂咁，而且仲非常緊張，完全唔敢望住俊軒，但其實俊軒都唔好得過韻喬幾多……

「小喬…早…..早晨呀，請……問你搵我有咩事？」俊軒又一次食哂帶咁同韻喬講嘢，搞到天殷都忍唔住取笑佢地兩個。而且，韻喬仲要喺天殷嘅鼓勵之下，先至敢開口……

「早晨呀小軒，呃……尋日整蠱你嘅事，我……真係……好對唔住，我其實唔應該玩到咁大」韻喬依家就好似一個做錯事嘅小女孩咁，頭耷耷咁「唔知你件校服上面啲茄醬……洗走咗未？」

雖然對於尋日畀韻喬，刻意用茄醬攻擊嘅事，都仲係有少少唔爽。

但係，經過一晚之後，俊軒都覺得同韻喬對抗，對自己同對大家，都唔係一件好事，所以都選擇平心靜氣同韻喬講……

「哦，我叫咗管家幫我拎去洗啦….另外其實我都冇嬲過你，畢竟都係自己處理得唔好在先。」

「但係我覺得，我地都係唔好再糾結喺呢件事上面啦，而且都唔好再喺學校提，因為我怕學校嘅流言蜚語，會影響到你」俊軒回應道





「但係小喬，我自己尋晚都……諗過咖啦，我都應該改變一下自己，希望你都可以接納到我」

不過，因為俊軒尋晚先發完同韻喬有關嘅夢，所以佢一諗起之後，都變得好緊張，而且都唔知道韻喬會點回應。

（待續 ~）

IG link https://instagram.com/bear_big_big_writer