《愛在。貴族學園》: Ch 11 ~ 首次獨處 Part 1

Ch 11 ~ 首次獨處 Part 1（連載日期：2022/01/06）

經過漫長一日嘅整蠱之旅之後，俊軒喺返到自己間房嘅時候，成個人都已經畀韻喬玩到散哂⋯⋯

「今日真係好攰呀！連續畀嗰個張韻喬整蠱兩次，真係呀！」然後俊軒都即刻將自己沾有番茄醬嘅校服，拎去畀工人清潔。

「不過，會唔會係因為喺星期六當晚，我同張韻喬講嘅説話，其實都唔可以令到張韻喬放心呢？」

「如果，真係要令到張韻喬對我改觀嘅話，我仲可以做啲咩呢？但我又唔想畀佢發現，我為咗滿足佢刻意改變呢？」





結果，今次嘅事，就令到俊軒意識到，要先改變自己嘅行為，先可以有女仔會係真心鍾意自己。

然後喺有個真正嘅女朋友之後，自然就可以唔去相睇party，或者呢個先係林太嘅真正用意。

不過，今日被韻喬連續報復兩次之後，對俊軒嘅震撼實在太大。所以喺俊軒上床休息之後，張韻喬都下意識咁，再次出現喺自己嘅夢裡面……

（林俊軒視角）

「小軒，今日嘅你，真係好靚仔呀！」韻喬心心眼咁同我講。當然，張韻喬今日條乳白色長裙，都將佢嘅優點散發出黎，

所以我都話「你今日都好靚女呀，小喬，條裙真係好襯你」

「係咩，多謝你呀！……喂呀，你做咩咁樣望住人地咖！人地都會…怕醜咖！」張韻喬紅哂塊面咁同我講，或者都係因為我讚佢條裙靚、着得好睇啦。

不過，我點都要氹下佢開心咖啦，所以我就話……

「咁，好睇嘅嘢，唔係應該要望多幾眼咖咩？」「咦！你又口花花啦！都唔知邊個叫你對女仔……咁口甜舌滑咖？」

張韻喬連嘟住個嘴個樣，都好可愛呀。唔知點解當張韻喬對住我微笑嘅時候，佢就好似有一種魔力咁，令到我不能自拔。





「冇呀，我只係會對住我鍾意嘅人，先會咁樣咋喎！」喺呢個令人亂紅心跳嘅氣氛裏面，我都自然要好好配合啦。

喺同一時間，張韻喬塊面已經白裏透紅，含情脈脈咁，但係又回避我嘅眼神……

「小軒，我有啲嘢想同你講呀」「係咩呀，小喬？」張韻喬佢之間有嘢想同我講，但係佢又喺度扭扭擰擰咁，唔知……會唔會係我想佢講嘅嘢呢？

但係，張韻喬佢隔咗好耐都唔出聲……

睇黎身為男士嘅我，都應該係時候要鼓勵一下佢，於是我向張韻喬企前咗一步「又話有嘢想同我講嘅？」

「係……係……不過……我唔知點開口呀」張韻喬塊面都越來越紅

但係，喺過多三十秒之後，突然之間張韻喬就將我緊緊抱住，然後講

「小軒，我愛你呀！你可唔可以做我男朋友呀？！」

韻喬佢居然一口氣，好快咁講咗一句説話，但係我都load咗好耐，我先有反應

張韻喬佢……居然同我表白……

（回復第三人稱視角）

「鈴鈴鈴鈴…….」

隨住鬧鐘討厭嘅聲音徐徐響起，將浸沉喺浪漫嘅戀愛氛圍嘅俊軒，由夢境拉返黎現實。

同時俊軒打開眼之後，就發現自己已經返到自己間睡房。
 
俊軒於是就嚇到即刻成個人彈咗起身，同時不停咁拍一拍自己塊面，希望自己清醒返，脫離唔真實嘅夢境。





喺坐直個人兼撳熄咗個鬧鐘之後，俊軒一邊喺度R頭，一邊自言自語咁講

「嘩！好在我醒到啫！但係，我做咩呢排好似經常都發到，同張韻喬有關嘅夢咁嘅？」

不過，喺經過非常短暫嘅思考之後，俊軒好快就意識到一個非常嚴重嘅諗法…….

（待續 ~）

IG link https://instagram.com/bear_big_big_writer