《愛在。貴族學園》: Ch 9 ~ 嬲到爆炸嘅韻喬 Part 7

Ch 9 ~ 嬲到爆炸嘅韻喬 Part 7（連載日期：2021/12/14）

張生繼續將自己嘅用品放落行李箱裏面，然後一邊講「我地知道啦，乖女，而且我地咁大個人都識照顧自己咖啦，邊似得我地個女讀書咁叻，但原來係一個生活白癡黎嘅！」

「喂呀！爸爸你仲笑人嘅！」韻喬抗議道「好啦小喬夜啦，你都快啲沖涼休息啦！聽日你都仲要返學咖！放心啦，我同媽媽都唔會要你擔心啦！Good night！」張生再道。

韻喬於是就返睡房，拎住自己套睡衣同埋部電話，去洗手間沖涼。

不過，都隔咗咁耐，韻喬先記得自己要同天殷報平安，於是韻喬就打開個Signal，再點入去天殷個chatroom裏面
 


「5A張韻喬：殷殷，我返到屋企啦！           22:33」
「5A張韻喬：唔好意思呀，頭先同爸爸媽媽講耐咗，依家先記得覆機，對唔住呀           22:34」

而天殷都好快就覆韻喬嘅message……

「5A李天殷：good，不過遲咗都唔緊要啦，反正我知道小軒一定可以安全送你返屋企         22:35」
「5A李天殷：而且小軒頭先都Signal咗我報告行蹤          22:35」
「5A李天殷：咁你冲完涼之後都早啲休息啦，今日搞咗你成日都真係辛苦哂……       22:35」
「5A李天殷：係啦喬喬呀，你媽媽頭先同我講呢，佢會同你爸爸一齊返大陸出差十日左右喎，佢叫我要睇住你！            22:35」



「5A張韻喬：我知呀，頭先佢地都同我講咗啦，佢地依家喺度執緊行李。     22:36」
「5A張韻喬：不過殷殷你就放心啦，我係唔會麻煩到你或者你屋企咖！      22:36」

「5A李天殷：唔怕啦喬喬，如果你想上黎我地屋企食飯嘅話，我地都唔會有問題咖        22:37」
「5A李天殷：而且可能我媽媽都好想成日見到你呢？         22:37」

「5A張韻喬:呀..如果成日都打擾你地，都唔係太好嘅，到時候先算啦！     22:38」

「5A李天殷：好啦，我都唔阻你啦喬喬，一陣你搞掂就快啲上床去休息啦。        22:39」
「5A李天殷：仲有呀，今日嘅事唔好再諗太多啦，我地幾個都仲好擔心你！    22:40」


「5A李天殷：頭先呀，小軒打電話同我講呀，話都仲好怕你唔開心，叫我多啲陪下你呀        22:41」

「5A張韻喬：知啦，長氣鬼！好啦，我真係要去冲涼啦，good night！       22:42」
「5A張韻喬：btw今日真係好多謝你，我好鍾意你幫我化個妝同套衫=)      22:42」

「5A李天殷：哈哈！你鍾意就好啦，最緊要係因為你靚吖嘛^v^。good night！       22:42」
 
語畢，韻喬開始除低身上嘅衫褲。經過今日天殷稱讚自己嘅身材之後，韻喬開始注視鏡入面嘅自己，然後同自己講

「殷殷講得冇錯喎，又真係幾好睇呢，嘻嘻」於是韻喬就拎起電話，影低幾張自拍做私密收藏，然後先再開始落妝，同埋沖涼。
 
喺入咗淋浴間之後，花灑嘅水滴慢慢流過韻喬柔軟順滑嘅身體。

但就喺韻喬洗頭、瞇埋眼嘅時候，韻喬居然諗起頭先喺林家大宅，同俊軒拖手，以及喺林太面前，被俊軒親吻aka強吻嘅畫面。



韻喬嘅身體於是再度不由自主咁灼熱起黎，心跳都開始越來越快，而且韻喬自己都感覺到，自己塊面同全身都已經紅哂。

而對於韻喬黎講，呢種咁強烈嘅感覺，從來冇擁有過。但係，韻喬都唔知道，點解會有呢一種反應嘅原因……
 
“冇……冇可能咖！我冇可能而且唔可以對嗰個死人頭林俊軒動情咖！”

“張韻喬呀！你要冷靜啲呀，呢個所謂嘅男人，真係唔值得你鍾個頭埋去咖！”韻喬喺心裏面不斷同自己講。

於是韻喬喺沖完涼後，佢就不停咁用凍水洗面，希望可以令到自己冷靜返同清醒一下。

而喺吹完頭之後，韻喬就同張生張太道別（因為第二日佢地坐早班高鐵去駐馬店），就自己上床休息。

但係好可惜，難得自己可以訓到覺，喺韻喬夢境裏面，居然再一次上演頭先喺林家大宅外嘅情節…
 
「但係，我自己都想可以更加確定，你地之間嘅關係係咪情侶。所以我想你地喺我面前做一樣嘢」林太道



「如果你地兩位，依家夠膽喺我面前kiss嘅話，我就會相信你地兩個之間真係情侶關係」
 
「Auntie，其實……」「啜！」

（待續 ~）

IG link https://instagram.com/bear_big_big_writer