《愛在。貴族學園》: Ch 7 ~ 綁架 Part 6

Ch 7 ~ 綁架 Part 6（連載日期：2021/10/26）

喺過咗20分鐘之後，突然之間有人敲門。天殷於是就一面歉意咁叫停韻喬「唔好意思呀喬喬，可唔可以停一停先？我要去應一應門」

「可以呀，你去應門先啦，我地唔急」「知道，唔該喬喬!」

天殷於是就跑出去門口。雖然呢度係自己屋企。但係天殷就依然都好優雅咁問「請問係邊位？」「小姐，我係蕭管家」
 
天殷聽到係蕭管家之後，就知道對方已經做好頭先自己吩咐對方嘅事，於是就對門外嘅蕭管家話「好嘅！我依家就出黎，等一等我呀蕭管家」同一時間天殷就同喺度玩電話嘅韻喬講





「唔好意思呀喬喬，你介唔介意入一入去洗手間入面，喺裏面等一等我呀！」

雖然對於天殷突然之間嘅安排感到非常奇怪，但身為客人嘅韻喬都冇諗得太過多，於是喺「喔！」一聲應咗天殷之後，韻喬就行入天殷嘅私人洗手間。而天殷就自己一個行去門口。
 
喺天殷打開門之後，就發現蕭管家手上拎住幾套晚禮服，企喺自己房門面前，好細聲問「小姐，請問呢幾套晚裝，你會覺得你同張家小姐都會ok嘛？」
 
「都幾唔錯！」天殷望一望呢幾件晚裝後，心情大好，同一時間喺心裏面諗“我估呢度有兩三條，喬喬都應該啱 size咖喎，而且着出黎嘅效果，我估應該會都幾好睇嘅。“
 
天殷於是吩咐蕭管家「咁你幫我放入我房啊，唔該！記得要小心啲拎喎！」





「知道啦，小姐」蕭管家低聲回應道「另外，我一陣會同太太講，你會出去朋友度並且唔會返黎食晚餐，你就放心去朋友度啦！」
 
蕭管家就慢慢將幾套晚裝，輕輕咁掛到天殷嘅衣架上邊。天殷於是喺蕭管家放低啲衫之後，就感謝對方「唔該哂你呀，你真係好幫得手呀，蕭管家！」

「唔會，呢啲都係我職責所在啫小姐！預祝你同張小姐玩得開心啲」
 
「放心我同張小姐都一定會！」蕭管家於是輕輕一笑「如果冇咩事嘅話，咁我都係出……」

「（一陣間，如果林家二公子同程公子到訪嘅話，麻煩直接開門畀佢地入黎，就可以咖啦，千祈唔好通知我）」





蕭管家聽到之後非常愕然「（小姐，點解……）」「（因為唔可以畀張小姐知道，佢唔知今日發生咩事咖）」

蕭管家喺得知原因之後，就用返平日嘅聲量同天殷講「咁我返出去做嘢先啦小姐」「嗯，唔該蕭管家」之後天殷就將房門鎖上。
 
天殷輕輕將個衣架，推到全身鏡旁邊之後，就同洗手間裏面嘅韻喬講「喬喬，你可以出返黎啦！」「哦！」韻喬於是就喺洗手間裏面行出黎。

但係，聰明嘅韻喬好快就發現到衣架嘅存在，於是喺走埋去望一望之後，就問天殷

「殷殷呀，做咩你個衣架突然間會去咗嗰邊，上面又多咗幾條裙嘅？」「呀！點解小喬你咁聰明嘅？」

「哼！我一向都聰明開嘅！」韻喬突然之間變得好有殺氣「有咩你就快啲從實招來啦，李家大小姐，到底依家發生咩事？你唔好旨意你會呃到我呀！」

天殷見自己都呃唔到韻喬太多，於是就話「喬喬呀，其實一陣間呢，我地有個宴會要出席呀」

「我地要出席宴會？咪住先，你要出席宴會嘅話，咁我想知關我咩事呀？」韻喬好愕然咁反問天殷「而且如果你唔得閒嘅話，我可以早少少返屋企溫書」





「唔係呀喬喬，其實我地…有預埋你去啊，所以我頭先叫管家幫我地預備晚裝咋嘛，嘻嘻」
 
韻喬知道畀天殷過一棟之後，同天殷扮唔開心講「哦！原來你都係有詭計咖囉！李天殷你超衰，喺度呃我嗚嗚嗚！」
 
「唉呀喬喬呀，你唔好咁嘅樣啦，就當一個surprise呀嘛，而且我想趁呢個機會，等你參與一下我嘅生活嘛。」天殷畀韻喬面無表情嘅樣嚇到，於是都開始扭計

「但係，其實我真係興趣唔大呢，我又唔係屬於呢啲場合嘅」韻喬回應道。

「其實我都知道嘅，但係……你唔想趁有我喺度carry嘅時候，出去了解一下呢個世界更多咩？而且我都真係怕你喺學校會冇話題咋！」

聽到天殷咁樣講，韻喬都不得不認真考慮天殷嘅請求......

（待續 ~）





IG link https://instagram.com/bear_big_big_writer