《愛在。貴族學園》: Ch 4 ~ 遲到 Part 5

Ch 4 ~ 遲到 Part 5（連載日期：2021/09/26）

(繼續林俊軒視角）

「頂你！」

「仲有呀，你有咁多女仔電話，你最好唔好同我爭呀！」禮謙最後講咗一句，擺明就係想自己追張韻喬同學啦。

於是我就回敬一句「好啦下你程禮謙！你係要追張韻喬嘅話，你咪自己去追飽佢囉！關我咩事呀？！」去結束對話，然後我地就返去班房。





不過，喺當日放學之後，我都再喺屋企，諗返起呢兩日嘅事。

我就覺得唔知點解，當我面對其他同學，或者面對殷殷同謙謙嘅時候，我個人就會比較有自信，而且都好容易知道要點樣同佢地溝通。

但係，我就真係唔知點解，當我要面對張韻喬嘅時候，就會整個人都會變得緊張起黎，心跳都變得特別快，個人都會好似發燒咁。

如果換轉係我問其他人拎電話號碼，根本上我就唔會好似尋日放學嘅時候咁食哂帶。

而呢種緊張嘅感覺，打從四年前，當張韻喬以插班生身份，加入我地班嘅時候，就已經存在。





由其係當年佢第一日加入我地，佢第一次對我微笑嘅一刻。而相遇嘅呢一幕，我都仲記得好清楚……

「Good Morning Ms Lee！」「大家同學早晨，靜少少先！」Form 1E嘅班主任Ms Lee同我地講，同時我望到班房外面，企咗一個生面口嘅女同學喺度。

「今日開始，我地班會有一個新同學」

大家聽到有新同學之後，都變得無比興奮，由其係班男同學，因為大家都見到出面企嘅，係一個女仔。

至於班女同學，就冇咩反應，好似都想睇下到底呢個女同學係咩人，先決定要點樣相處

「好啦，大家靜少少，依家我地請佢入黎，等大家認識佢，大家記得唔好蝦新同學呀，知道未？」「知道！」

大家回應Ms Lee之後，Ms Lee就同外面嘅新同學講「張同學，請你入黎啦！」

新同學於是就推門，喺入黎之後，就企喺黑板面前。不過，班男同學就即刻嘩嘩聲起鬨。

而我，就即刻畀眼前嘅佢吸引咗，因為佢真係好可愛「張同學，麻煩同大家介紹一下自己先」

新同學一開始好怕醜，面都紅哂咁。不過好快都開口講

「大家好，我個名叫張韻喬，大家可以叫我做小喬，我來自香港真光中學」

「平時都鍾意睇書同跑步，希望可以同大家好好咁相處，同埋做到朋友，多謝大家」

嘩！佢個名好好聽呀，韻喬，好似好有氣質咁，真係人如其名，笑嘅時候都好有氣質。不過，點解佢會喺真光中學轉過黎嘅？

如果有機會都可以問下，點解佢會有真光唔讀，要走黎呢度嘅？而且我咁做嘅話，我順便都可以認識下小喬。

自我介紹完之後，Ms Lee就安排座位畀韻喬同學。不過，

「張韻喬同學，麻煩你坐去嗰邊，林俊軒同學嘅旁邊」「知道，唔該Ms Lee！」

咩話，Ms Lee居然要我同新同學坐？！OMG「林俊軒同學，請你好好咁帶住張韻喬同學啦」

得到Ms Lee嘅“關照”，我成個人都即刻戰戰兢兢起黎，於是我就食哂帶咁話「知…知道」

不過我班同學見到我咁，就即刻哈哈大笑。

張韻喬同學於是就慢慢走過黎我呢邊，然後拉開我隔離張凳坐低，再同我做多次自我介紹

「你好，我叫張韻喬，你可以叫我做小喬，以後多多指教啦」佢再一次用好甜嘅微笑同我講，搞到我都有少少hang機添

「你……你好呀小喬，我……我叫林……林俊軒，以後……多多指教！」啊，我塊面已經好紅啦。

不過，喺小喬同學微笑嘅時候，佢塊面都好似好紅咁……

「哈哈，放心啦林同學，我唔會……食咗你喎。咁呢排真係辛苦哂你，要你…帶住我……」

原來，微微一笑很傾城，係真係存在……至少對我黎講

所以，結果喺我面對張韻喬、準備要問對方要電話號碼嘅時候，我就居然完全唔識反應，最後都梗係咩都冇啦，然後夜晚又發埋呢個奇怪夢，搞到我今朝遲到。

而且喺夢境裏面，我同現實一樣，對住張韻喬嘅時候，心跳都係會變得好快……

唔通，我真係鍾意咗張韻喬？而且仲要喺Form 1嘅時候已經開始鍾意？





但係，話哂我都係出身貴族，我林俊軒點解會鍾意呢個平凡嘅暴力女學霸咖？！

點解呀？我到底……到底之後應該要點做呢？

（Ch 4 遲到 ~ 完）

IG link https://instagram.com/bear_big_big_writer