《愛在。貴族學園》: Ch 4 ~ 遲到 Part 3

Ch 4 ~ 遲到 Part 3（追月夜加更）（連載日期：2021/09/22）

(繼續林俊軒視角）

「我再好鄭重一次同全班各位同學講，唔該自己每日睇住時間做人，唔好再返學遲到。」Ms張喺我返埋位之後繼續講......

「將來大個出到社會，遲到就唔係罰留堂、記缺點咁簡單，可能會令到自己同人地有金錢損失。」

「你地好多同學都係來自做生意嘅家庭，Ms張相信你地父母都會教你地守時嘅重要性。」





「所以大家都唔好再學林俊軒同學咁，如果唔係你地是但一個再遲到嘅話，我都會好似頭先鬧林俊軒同學咁閙你地。好啦大家，我地繼續上堂……」

大家都好靜，而且氣氛都好尷尬。唉，一日都係嗰個張韻喬搞出黎！
 
就喺當我返到埋自己個位，拎返本書出黎上堂嘅時候，我聽到喺張韻喬嗰邊，傳黎有人傾計嘅聲音。
 
哦，原來係方文曦同學同張韻喬講野。我同文曦同學對一對眼，用眼神同對方打過招呼之後，文曦就用一個好擔心嘅語氣，同坐喺後面嘅張韻喬講。

「韻喬呀，今次點算啊？」「嗯？咩點算呀文曦？」張韻喬都唔知係真唔知定假唔知，皆因佢個語氣都真係好cool下。





方文曦於是就話「你睇下軒軒呀，頭先Ms張鬧完佢之後呀，佢嗰兩個酒窩都唔見咗啦，嗚嗚嗚……」

雖然佢咁樣講真係好搞笑，但係唔知點解我唔覺得好笑，可能因為都係唔太鍾意佢吧？
 
順便都喺度介紹一下文曦同學。一直以黎嘅佢都好似一個花癡咁，基本上我喺班房裏面做咩，又或者我自己開心唔開心嘅時候，文曦佢都一定會有反應。

雖然都有幾分姿色，而且平時都算幾傾得埋咁，但好可惜佢唔係我鍾意嘅類型囉，簡單啲講，friendzoned。
 
不過原來文曦仲未講完，繼續同張韻喬講「老實講啦，我覺得Ms 張頭先都唔洗鬧到軒軒咁勁下話？佢只不過先遲到幾分鐘咋喎？」





「哈哈，抵佢死啦！鬼叫佢自己咁冇時間觀念呀？而且遲到就係遲到啦，乜原來有分別咖咩？」張韻喬繼續冷冷咁回應文曦。

不過佢突然間講咗句好爆嘅嘢回文曦，殺咗我一個操手不及......
 
「而且，冇人叫佢今朝唔知醒呢，條花心flirt女王呀，尋晚梗係肯定又唔知同邊個定邊堆女仔講電話，又或者喺度stalk女女IG stalk到三更半夜啦都唔訓啦」

喂！張韻喬你唔好屈得就屈好喎！如果唔係尋晚因為喺度發個同你有關嘅夢，我今日使咁seven仲要畀Ms張當住全班面前黎鬧？
 
「嗚嗚嗚，我唔捨得佢畀Ms張鬧到咁呢」文曦回應道。
 
「車，對住呢啲咁嘅人，唔洗咁上心喎文曦，可能平時佢同你講嘅嘢，都有對住其他女同學講過咖呢？死花心仔點可能冇呀！」

張韻喬佢繼續一邊上堂抄筆記，一路去安慰文曦，順便都繼續攻擊我，真係過分到一個點。同時坐旁邊嘅李天殷喺到喪笑-,-。
 
不過我有個問題係，點解張韻喬會知道我有同好多女同學有聯絡嘅？





唔通我個大計已經……畀其他人發現咗？然後呢個人再通知張韻喬？所以我先一直要唔到佢電話號碼？

嗯，我都係一陣問下禮謙，再叫謙謙喺Signal天殷問下先。
 
同時間張、方二人都冇再繼續佢地嘅對話，但係我見到文曦好似仲係好唔開心咁。

所以作為男仔，我都係Singal一下文曦關心下佢，順便叫佢幫我同張韻喬澄清，我冇亂咁溝女嘅事。

「5A方文曦：放心啦軒軒，一陣間我會幫你同小喬講咖啦      08:50」
「5A方文曦：頭先畀Ms張閙完你有冇唔開心呀？我見到都覺得你慘，希望你冇事啦       08:51」

「5A林俊軒：我冇事，多謝關心，你都唔好唔開心啦，笑返啦！唔係就唔靚女咖啦      08:52」

文曦見到之後就都笑返，呢種女仔真係易氹，其實對於懶嘅男仔，都係一個好嘅選擇，不過班女仔一定會話我好渣。





但係，邊似得好似張韻喬咁，搞咗我幾年搞極都搞唔掂咁，唉。
 
至於張韻喬個死黨天殷呢，就完全冇理我過啦，完全不讀不回咁，都唔知道係咪張韻喬教佢咁樣做嘅。

而且我都喺度懷疑，到底今日嘅天殷，係咪平時我識嗰個黎。

不過，喺上堂嘅時候，唔知點解天殷有時會望去禮謙嗰度，唔通天殷佢……鍾意禮謙？

（待續 ~）

IG link https://instagram.com/bear_big_big_writer