《一次無心嘅表白，竟然令到佢同咗我一齊II》: 第六章

就係咁，我不知不覺講咗成晚。其實原本諗住佢冇事我就走架啦，不過住係東涌呢啲外太空最大嘅壞處就係通宵車好貴，對於我呢啲條底褲穿窿穿到得返條橡筋都要日日著住佢嘅死窮鬼，唯有勉為其難同隔離嘅舊情人傾計。

到咗第二朝，我想啦啦臨趕頭班車返寢宮瞓覺嘅時候，cindy用一副楚楚可憐，又帶點誠懇嘅樣講：「我哋識咗咁耐，好似未試過一齊食早餐架喎，如食埋先走啦。」

我再一次敗係佢個懇樣底下。

我相信睇緊呢個故嘅生物，應該會有人覺得cindy想食回頭草，甚至會認定我係嗰啲饑不擇食嘅禽獸，不過你哋實在誤會咗我啦。

首先，我係個正人君子嚟，乘人之危嘅嘢一定唔會做。第二，雖然我咁講好仆街，不過都市傳說話佢中學嗰陣啲仔換得仲快過換月曆，試問我咁乖，點會接受到呢啲同連詩雅同一個層次嘅生物呢。





當我好悲哀咁食完個仲貴過我搭通宵巴士嘅早餐之後，就送咗佢返屋企。8年前，8年後，同一段路，同一個人，但所有嘢都已經今非昔比。人類永遠係失去先識珍惜，得唔到嘅至覺珍貴，或者有啲嘢，就算重新開始都已經無辦法同過去一樣，可能呢啲就係遺憾之美……

雖然經過呢晚我冇即刻看破紅塵，但個心好似釋懷咗好多…

返到屋企，通咗成晚頂嘅我理應攤落床就瞓得著，不過…我典咗成半粒鐘，依然處於肉體好攰，大腦好精神嘅狀態，我暫且稱之為精神病。

而既然咁痛苦，梗係搵啲藥食下架啦，所以我拎起咗電話：

「嘟…嘟…」





「嗯？」想當年第一次聽到chloe未瞓醒把聲，我係興奮到不禁露出形同金魚佬式嘅笑容。不過再燦爛嘅煙花都有凋謝嘅一日，morning call咗咁多年，金魚佬都變咗古惑佬。

「起身啦仆街！」
「嗯…」
「屌你咩，起身啦仆街！」
「嗯…」
「起身啦啦啦啦啦啦啦啦啦啦啦啦啦啦啦啦……」

然後每2分鐘打一次去重複以上對話十幾次左右，呢粒藥應該會醒。





Chloe清醒後第一句並唔係串我，而係：「嘩，你係咁早起身定啱啱先返屋企呀？」

「啱啱返到嚟，典咗好耐都瞓唔著，見掛住你咪打俾你囉。」

「多謝先啦，你掛返你個邊個邊個啦。」「係喎，佢噚晚搵你咩事？」

「基本上呢，噚晚就…………………………………………就係咁上下啦。」我將成晚係網吧到聽埋啲禪佛偈嘅事，講咗俾chloe知。

「咁啫係搵你做咩呀？」

「佢應該又因為啲仆街有第三者而分手掛。」呢個係我嘅結論。

然後，chloe真係可以完全發揮安眠藥嘅作用，聽佢講演講咗半粒鐘唔夠…我瞓咗。

不過我要為chloe講返句公道說話，佢講嘢真係好有趣架，一啲都唔悶架，係我眼瞓咋麻！大家知啦，我同689一樣，從來唔講大話嘅！





瞓醒之後，見到我託佢幫我搵人買嗰domo公仔嘅fd係msn搵咗我好多次。

Fd：「佢話會開團購咁買，咁你ok嘅就過數去佢戶口啦。」
「喂喂，收唔收到？」
「死咗未？」
「……」

過完數之後，我簡單咁回咗句：「真係麻煩哂你~感恩~」

大家唔好奇怪點解我咁好禮，呢啲只係對普通朋友嘅掩眼法嚟架啫。所以話，睇關係呢家嘢，識睇一定係睇對話，既方便又快捷。

光陰似箭，日月如梭，其實我都唔知乜嚟。總之時光飛逝，等咗成個月嘅嗰set麻煩的domo都苦無結果，眼見其他人陸續係個status到留言話收到，我就更加心灰。

我打開msn嘅話話視窗，搵我個fd講：「唉，成個月我都未收到嗰set咗囉…」





「但我見到佢話寄咗出去架啦喎。」

「係吖，我都見到啲人話收到添……」

「可能你住得遠，要耐啲啫…」

「算啦，我出咗名地獄黑仔王，仲係黑到有pattern嘅添……」

「我幫你問下啦。」

「唔該。」

基本上我對呢set嘢都已經絕望架啦，不過做人嘅嘢，點估到衰運會由呢set嘢開始，將我推到去一個更谷底嘅層次先得架……