《一次無心嘅表白，竟然令到佢同咗我一齊II》: 第五章

坐係cindy樓下呆等其實真係好痛苦，商場又落閘，夏天啲可愛嘅昆蟲又完全漠視社會嘅規模，成11點幾都仲係到大合奏，都唔知邊條友懶醒咁約人而家出嚟！

隔咗陣，終於見到個疑似cindy嘅生物，雖然咁耐冇見，但個樣同小學都係差唔多，只係已經冇咗嗰種稚氣同增添咗一份青春少女嘅氣息。

「冇見咁耐，你好似冇乜點變喎。」對住呢個曾經最熟悉嘅人，呢刻竟然冇嗰種好尷尬嘅感覺，反而份親切感依然存在。

「係囉…不過…點解你好似老咗好多咁嘅？」

我苦笑咗下：「咁每個人每日都係到變老緊架啦！」





點個cindy依然咬住呢個問題唔放：「唔係咧，你個樣睇落似三十幾四十啦喎！」

由於佢已經唔係第一個人咁講，所以我已經放棄爭論呢個問題。

「ok，fine！呢啲叫成熟囉咁！言歸正傳，搵我咩事都好，可唔可以搵個有冷氣嘅地方先，呢昆蟲係咁大合唱我真係頂唔順。」

「嘩，你咁多年都冇變，仲驚昆蟲架！」

「傻啦，呢啲唔係驚，只不過我嘅音樂造詣不嬲好低，唔太識欣賞呢啲咁美妙嘅樂章，我哋行啦。」
最後，我哋係附近搵咗間24小時嘅網吧坐低咗。





「阿恆，知唔知點解我想見你？」

「哦，我知，你一定係做緊個毒撚係重遇舊情人之後嘅反應嘅研究，然後想搵我做實驗咧！」你唔講，我梗知啦天才。

「哈，我哋都算舊情人咩？」

我報以一個微笑作為回應。

「阿恆，你有冇憎過我？」





我一秒嘅猶豫都冇就答：「冇。」

「點解？我知你嗰陣因為緊張我先咁易呷醋同成日管我，我仲咁鬧你……」

「咁我的確有錯吖麻，而且如果你冇鬧過我，以我嘅性格，咪又係會俾第二個人鬧~」

「咁我的確有錯吖麻，而且如果你冇鬧過我，以我嘅性格，咪又係會俾第二個人鬧~」

「哈…我開始明當日點解你會咁做…多謝你當時咁全心全意去愛我……」

我依然用微笑去回應。

之後，我哋突然靜咗落嚟，各自係到睇facebook。過咗陣，電話又響起chloe專屬嘅鈴聲----孤單心事。





「喂，你嗰邊咁嘈嘅，你未返到屋企咩？」

「我同cindy係網吧。」

「吓！！！佢做咩無啦啦搵你嘅？」

「你又知一定係佢搵我嘅！其實我都唔知做乜。」

「睇你而家個心都得返啊邊個邊個架啦，點會有心機搵其他女啫！」

「得啦得啦神探，聽日搵你啦！」

「咁你今晚唔返屋企呀？」

「似係啦，係咁啦，拜。」





一收完線，cindy就好奇咁問：「佢知我係邊個咩？你又會同佢提起我嘅？」

其實cindy個名，我諗識咗我6年以上嘅人真係冇乜邊個唔知……我同佢嘅一段小小嘅故事都俾我對住唔同人分別重複咗咗幾百次，而家已經達至連我啲兄弟都倒背如流之境。

「係呀…你好出名架！我個個知己都識你嘅~」

「唓！頭先嗰個，又係女仔嚟架？」

「嘩，咩又呀，講到我好多女咁嘅…」

「你小學開始已經係啦，扮咩啫！」

「咁係因為冇人當過我係男性ok？」





「都唔知你有乜咁特別，可以成日咁多女係身邊！」

「魅力呢家嘢，以現今科學係解釋唔到。」

睇到呢到，我知實有人心諗：「屌，好悶呀，咩垃圾故嚟架。」但又唔敢講出口怕俾人屌，我明架，唔緊要架，睇睇下就慣架啦！

而我對住cindy，亦都係到諗：「屌你咁啫係叫我出嚟做乜鳩呢？唔係純粹想我聽啲已經唔重要嘅說話呀……」我開始後悔…點解我唔返屋企攤係張床到同我個chloe公主傾電話，而要係網吧用住啲仲廢過屋企嘅電腦。

係我發緊呆，唔知做乜嘅時候，cindy無啦啦開咗勁舞出嚟。

「好耐冇玩啦，一齊玩咯！」

係半秒間，我鼻頭一酸，啲眼淚差啲流出嚟。

我好激動咁話：「我點都唔會再玩。」





「做咩呀你…」

「冇…」

不過我都講過啦，愈冇嘢就愈有嘢，成日扮哂冇事嘅人咪又係想俾人氹下先講。所以，係cindy氹咗我3分鐘至30分鐘左右，我將我同阿靜嘅故事，一五一十咁話哂俾cindy知。